«Демография» нацпроект весьтӧ Комиын кыпӧдасны юркарын Тентюковса да Сыктыв районын Кунибса керка-интернатъяслы выль корпусъяс. Та йылысь юӧртіс регионса юралысь Сергей Гапликов республикаын социальнӧй юкӧн сӧвмӧдӧм кузя сӧвещанньӧ дырйи.
Пӧрысь йӧзлы выль олан стрӧйбаяссӧ кыпӧдӧм вылӧ ковмас 867 миллион шайт. Сы лыдын 95 прӧчентсӧ шуӧма вичмӧдны федеральнӧй сьӧмкудйысь. Такӧд йитӧдын воӧма нин юӧр, мый 2020-2021 воясӧ проектсӧ збыльмӧдӧм вылӧ Россияса бюджетысь лоӧ вуджӧдӧма 588,6 миллион шайт. Коляссӧ вичмӧдасны 2022 воын.
–Тайӧ лои позяна регионса да федеральнӧй министерство-ведомствояслӧн ӧтув зільӧмӧн федеральнӧй национальнӧй проектӧ пырӧдчӧмӧн. Тадзи жӧ колӧ вӧчны и республикаын социальнӧй тӧдчанлуна мукӧд национальнӧй уджтас ас кадӧ олӧмӧ пӧртӧм могысь, – пасйис Сергей Гапликов.
Выль стрӧйбаясас босьтчыны шуӧма локтан воын, а эштӧдны на кузя став уджсӧ 2022 во помын. Тентюковса керка-интернатын лоӧ стрӧитӧма 90, а Кунибын – 70 места вылӧ выль корпусъяс, кӧні вӧчасны ыджыд арлыда да вермытӧм йӧзлы лючки-бура овны став коланасӧ.
Казьтыштам, Комиын талун дас куим керка-интернатын олӧ 3.052 пӧрысь да вермытӧм морт. 2017 вося апрельсянь республикаын абу нин татшӧм учреждениеас веськалӧм могысь ӧчередыс. Но выль корпусъяссӧ стрӧитны шуӧма водзӧ вылӧ артыштӧмӧн, мый регионын абу этша ӧтка пӧрысь йӧзыс, кодъяс талун вермӧны на ас бӧрсяыс видзӧдны, но, гашкӧ, гоз-мӧд во мысти ковмас нин найӧс дӧзьӧритны. Сэсся и кыдз Тентюковын, сідз и Кунибын колӧ бурмӧдны ыджыд арлыда войтырлысь оланінъяссӧ, вӧчны став коланасӧ, мед лючки найӧс дӧзьӧритны. Сідз, Тентюковса керка-интернатын талун олӧ 285 морт. Выль корпуссӧ шуӧма кыпӧдны куим судтааӧс. Олан жыръясысь кындзи сэні лоасны бурдӧдчан кабинетъяс, а сідзжӧ спортзал, бассейн да сауна, мед татшӧм ногӧн тшӧтш ёнмӧдны арлыда йӧзлысь дзоньвидзалунсӧ.
Кунибса психоневрологическӧй интернатын ӧні дӧ-зьӧритӧны 311 вермытӧм мортӧс. Сэні сідзжӧ кыпӧдасны куим судтаа выль стрӧйба.
–Тайӧ проектсӧ збыльмӧдӧм бӧрся видзӧдны колӧ оз сӧмын министерство-ведомствоясысь чина йӧзлы, но и муниципалитетъясӧн веськӧд-лысьяслы, кӧні кыпалӧны социальнӧй тӧдчанлуна стрӧйбаясыс, – кывкӧрталіс регионса юралысь.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.