Роч, татарин, азербайджанеч, белорус, немеч, чуваш, мари, армянин, башкир…
Сёысь унджык сикас войтыр олӧны миян регионын. И ставныс найӧ видзӧны ассьыныс нэмӧвӧйся культуранысӧ… мойдын.
Коми Республикаса Национальнӧй библиотекаын босьтчӧмаӧсь збыльмӧдны «С миру по сказке» аслыспӧлӧс проект. «Творческие люди» федеральнӧй проект весьтӧ тайӧ уджтассӧ збыльмӧдӧ Коми Республикаса библиотекаяслӧн «Чукӧр» ассоциация.
–Дасьтам аудиоколлекция. Чукӧртам республикаын олысь уна сикас войтырлысь мойдъяс, – висьталӧ проектӧн веськӧдлысь Наталья Ветошкина.
Гижӧмаӧсь нин роч да мукӧд кывъя 40 мойд. Найӧс позьӧ кывзыны «Культурная карта Республики Коми» сайтын «С миру по сказке» юкӧнын.
Унаӧн нин шыӧдчылӧмаӧсь. На лыдын регионын нималана йӧз: республикаса опера да балет театрын сьылысь Алексей Петров, шылада-драмаа театрысь артистка Ангелина Смирнова, журналист, Россияса гижысь котырӧ пырысь Григорий Спичак, филолог Нина Баканова. Уджтасас пырӧдчыны окотитӧны стрӧительяс, рабочӧйяс, велӧдысьяс, ичӧт кагаа мамъяс да пенсионеръяс.
–Зэв нимкодь, кор шыӧдчӧны бать-мам челядьыскӧд! – юксьӧ сьӧлӧмкылӧмъяснас Наталья. – Пыравлісны миян дорӧ Сыктывкарысь Захар Бивол Ксюша нылыскӧд. Батьыс лыддис нылыслы пӧвар да боярин йылысь молдаван йӧзкостса мойд, кӧні пусьысь-пӧжасьысь пӧрйӧдлӧ горш да бӧб озыр мортӧс. Волӧны мойдны и гозъяӧн. Шуам, Елена да Эмир Джалиловъяс лыддисны рочӧн да табасаран кывйӧн «Котомка с яблоками».
Шыӧдчылісны нин эз сӧмын юркарысь, но и Ухтаысь, Усинскысь, Воркутаысь, Емдін районысь, тшӧтш и Россияса мукӧд регионысь мойд лыддьысьяс.
Кыдзи пырӧдчыны проектас? Аудиогижӧд вӧчӧны Национальнӧй библиотекаса торъя жырйын. Позьӧ и ас кежысь диктофон вылӧ лыддьыны, но мед та могысь техника боксянь став коланаыс вӧлі, да некутшӧм ковтӧм шы да сёрни эз кыв.
Аудиобиблиотекаӧ кызвын мойдсӧ чукӧртӧмаӧсь нин, и позьӧ нин сигӧртны уджсӧ, но библиотекаын зільысьяс водзӧ на кӧсйӧны гижавны мойдъяссӧ: киргиз, мари, лезгин, удмурт, мордва, казах, ненеч, чечен, осетин, корея, калмык, кумык, грек, кабардин, ингуш, ханты, гагауз, вепс, туркмен, якут да мукӧд кыв вылын.
–Проектыслӧн ыджыд позянлуныс, ӧд республикаын олысьяс радпырысь пырӧдчӧны сэтчӧ, – нимкодясьӧны уджтас дасьтысьяс. – Кутшӧмсюрӧ мойд вӧзйисны и регионын национально-культурнӧй автономияяс. Шуам, немеч котырӧ пырысьяс окотитісны мойдны «Картофельный король», а азербайджанечьяс – «Красивая девушка и рыжая корова».
* * *
Октябрь 20 лунӧ Коми Республикаса Национальнӧй библиотекаын гала-концерт дырйи кыпыда нимӧдасны мойд лыддьысьясӧс.
Казьтыштам, мойд вӧзйыны, лыддьыны либӧ проект йылысь ассьыд видзӧдлас висьтавны позьӧ ino@nbrkomi.ru электроннӧй пошта пыр.
Юалӧмъясӧн шыӧдчыны (8212) 255-422 (содтӧд 557) телефон пыр.
Екатерина ЧЕРНУХА.
<> Комиӧдіс Екатерина МИКУШЕВА. Снимокъясыс ӧтуввезйысь.