Луздор районса Малый Рудникын котыртлісны аслыспӧлӧс гаж, кытчӧ волісны тайӧ грездас олысьяслӧн некымын кӧлена.
Котыртісны кыпыд аддзысьлӧмсӧ Наталья Кузнецова да Олеся Сивергина, Савва Степанович Захаровлӧн да Михаил Александрович Урнышевлӧн внучкаяс.
Малый Рудник грезд меститчӧма гажаинын, кӧні позьӧ и тшак-вотӧс чукӧртны, и чери кыйны, и сӧстӧм сынӧдӧн лолавны.
«Рудник» кывйыс артмӧма татшӧм ногӧн: Ляпомоз ю вомын, Мишаково грездсянь Луза ю кузя улӧджык, овмӧдчылӧмаӧсь чудьяс. Найӧ новлӧмаӧсь пӧчинокысь кутшӧмкӧ мугӧмгӧрд из да шуӧмаӧсь сійӧс рудаӧн. Сэсся тайӧ рудасӧ кылӧдлӧмаӧсь пуръясӧн Луза ю кузя.
Грездсӧ 1917 воын котыртӧма Кӧдж грездысь Михаил Яковлевич Безносиков. 1918 воын заводитӧма стрӧитчыны Евсей Галактионович Безносиков, а 1921-ӧдын татчӧ воӧма Александр Антипович Урнышев. 1937 воын Русаысь Рудникӧ вуджӧмаӧсь овны Савва Степанович Захаров да Иван Евстигнеевич Ракин.
Айму вӧсна Ыджыд тыш дырйи быд керкаысь чужан му дорйыны мунӧмаӧсь мужичӧйяс, воюйтӧмаӧсь асьсӧ жалиттӧг. Пӧшти ставӧн воӧмаӧсь гортаныс доймалӧмӧн, наградаясӧн… Ленинград бердса Синявскӧй нюръясын 1941 вося вир кисьтана тышын усьӧма Степан Евсеевич Безносиков, а Кирилл Михайлович Безносиков юӧртӧг вошӧма.
Водзын грездын вӧлі быдса бригада: скӧт видзисны, быдмӧг вӧдитісны, быд овмӧсын сулаліс крепыд кӧзяйство. Олісны ӧта-мӧдлы отсасьӧмӧн, ёртасьӧмӧн.
Но том йӧз коді кытчӧ разӧдчисны. Колис сӧмын вит керка. Гожӧмнас грездыс ловзьӧ, да и тӧвнас мукӧддырйи гӧсьтъяс волывлӧны.
Малый Рудник грездын олысьяс медводдзаысь паныдасьлісны 1991 воын, мӧдысь – 2011-ӧдын. И со коймӧдысь нин аддзысим!
Воисны 40 гӧгӧр морт, 13 машина! Быдӧнлы вичмис Малый Рудниклӧн эмблема. Грездса юкмӧс дорӧ лӧсьӧдім кузьмӧс пызан, вайим пӧль-пӧчлысь лабичьяс, мича пызандӧра. Мыйыс сӧмын эз вӧв пызан вылын! И Анна Александровна Урнышевалӧн пачын пӧжалӧм шаньгаяс, и пражитӧм сир, и чӧскыд салатъяс, и морс да самӧварысь тшай. Мужичӧйяс жаритісны яй.
Кыпыд гажсӧ восьтісны Олеся да Наталья. Быд керка петкӧдліс неыджыд чолӧмалӧм: кодкӧ кывбур лыддис, кодкӧ пӧль-пӧч йывсьыс висьталіс. Вӧлі зэв нимкодь, мый внукъяс аддзисны да петкӧдлісны Малый Рудникын медводдза олысь Яков Мишлысь фотоснимоксӧ.
Аддзысьлӧм вылӧ воліс и Василиса Савватьевна Туркина, Савва Степанович Захаровлӧн нылыс, коді и котыртліс грездсалысь медводдза паныдасьлӧмсӧ. 93 арӧс вылӧ видзӧдтӧг сійӧ воис чужан грездас и ӧнія чукӧртчылӧм вылӧ, аддзысьліс тӧдсаяскӧд, висьталіс Рудникын олӧм йылысь.
Поводдяыс тайӧ лунӧ ышнясьыштіс, ёна зэрмис, но вӧвлӧм бригадир Михаил Александрович Урнышевлӧн керкаӧ ставӧн тӧрисны. А зэрыс эштіс да, ставӧн бӧр ывлаӧ петім.
Ёрта-ёрткӧд сёрни костын нуӧдім Рудник историялы сиӧм конкурсъяс. Шуам, кутшӧм вӧлі телефон номерыс тайӧ грездас, коді рудниксаяс пиысь председателяліс Занульеса сиктсӧветын да кутшӧм нимтысяна кывъяс паныдасьлісны семьяясын.
Тайӧ чукӧртчылӧм вылӧ козинъясӧн воліс и Занулье сикт овмӧсӧн веськӧдлысь Иван Леонидович Старцев. А рытнас грездын кылісны мыла сьыланкывъяс.
Рытпукыс ставлы воис сьӧлӧм вылас. Уна фото лои вӧчӧма чугуна-самӧвара-джодждӧраа фотозонаын.
1991 воын нин Малый Рудник грездсӧ лыддисны быранаӧн, но тайӧ абу тадз! Ӧтуввезйын эм котыр, кӧні рудниксаяс сёрнитӧны-варовитӧны, чукӧртӧны история, юксьӧны фотоясӧн. Сідзкӧ, бара на аддзысьлам, Рудник!
Наталья РУДНИКСКАЯ.
<> Комиӧдіс Екатерина МИКУШЕВА. Снимокъясыс ӧтуввезйысь.