РФ-са Госдумаысь депутатъяс коймӧдысь донъялӧм бӧрын ошкӧмаӧсь оланпас бала, код серти позяс кыйсьыны-вӧравны ньӧввужйӧн да арбалетӧн. Татшӧм ӧружиесӧ вермасны ньӧбны на-йӧ, кодъяслӧн эм вӧ-ралан билет, а сідзжӧ кыйсян ружье видзӧм да сыӧн вӧдитчӧм вылӧ колана документ. Содтӧд на, ньӧввужсӧ ковмас регистрируйтны Росгвардияын. Окота юавны, кыдзи ті донъяланныд депутатъяслысь тайӧ вӧзйӧмсӧ? И кодӧс эськӧ верманныд кыйны миян парма-ягысь татшӧм ӧружиенас?
Дмитрий Дробато, Коми Республикаысь вӧралысьяслӧн да чери кыйысьяслӧн котырса правлениеӧн веськӧдлысьӧс вежысь, Сыктывкар:
–Чайта, та йылысь сёрнитнысӧ водз на. Нинӧм на помӧдз абу «ошкӧма». Оланпас баласӧ Думасянь ыстасны на президентлӧн администрацияӧ, сэсся видлаласны Федерация Сӧветын. Оланпас дорас ковмас на урчитны ньӧввуж сертифицируйтан пӧрадок, кыдзи да кӧні видзны да сідз водзӧ. Вӧравны тайӧ выль ӧружиенас позяс во кык мысти на.
Тайӧ оланпасыс колӧ. Ӧд став мирас ньӧввужйӧн да арбалетӧн вӧралӧмсӧ лыддьӧны, кыдз шуласны, высшӧй пилотажӧн. Ньӧввужйӧн лыйсьысь кыйӧ звер-пӧткасӧ ружьеа морт серти 10-15 пӧв этшаджык. Та вӧсна мукӧд странаас ньӧвйӧн лыйсьысьяслӧн вӧралан кадыс кузьджык, лицензияыс донтӧмджык, а угоддьӧас некод оз шковгы ружьеысь. Ньӧввужйӧн вӧравны зэв сьӧкыд. Ӧд звер дорас колӧ матыстчыны 15-30 метр ылнаӧдз, медым стӧча лыйны.
Кодӧс позьӧ кыйны коми пармаысь ньӧввужйӧн? Ӧні эмӧсь сэтшӧм ньӧвъяс, кодъяс отсӧгӧн Африкаын кыйӧны слӧнӧс, носорогӧс, левӧс, леопардӧс да буйволӧс. Со и думыштӧй, тырмас-ӧ смеллуныд петны ньӧввужйӧн ош да йӧра вылӧ. Ӧтуввезйын йӧзӧдӧма ньӧввуж отсӧгӧн чери кыйӧм йылысь уна ролик. Ньӧв-гарпунас кӧрталӧма жилка. Тадзи кыйӧны гырысь чери, весиг скатсӧс да акулаӧс.
Валентин Новиков, «ОхотАктив» лавкаын вузасьысь, Сыктывкар:
–Оланпасыс абу на да, ми ог на вузасьӧй вӧралан ньӧввужйӧн да арбалетӧн. Но миян лавкаын эм татшӧм тӧварыс. Сы отсӧгӧн позьӧ лыйсьыны спортын ордйысьӧмъяс дырйи. Медся дона ньӧввужйыс 8 сюрс шайта, ньӧвйыс 100-600 шайта. Чайта, донъясыс повзьӧдасны сідз-тадз лыйсьысь-ясӧс. Ӧд шӧркодь вӧралан ружье позьӧ ньӧбны
20-30 сюрс шайтысь. А бур вӧралан ньӧввужйысь ковмас мынтыны 100-250 сюрс. Содтӧй та дорӧ бур ньӧвъяс.
Михаил Игушев, Кӧрткерӧс районысь вӧралысь-любитель:
–Ӧдвакӧ кодкӧ мунас вӧрӧ арбалетӧн, вывті дона сувтас. Ме ог-а.
Андрей Мишарин, ОНФ-ын зільысь, вӧралысь:
–Миян пармаын оз шогмы кыйсьыны ни арбалетӧн, ни ньӧвйӧн. Ӧти-кӧ, сьӧкыд ветлӧдлынысӧ, быдлаӧ крукасьлыны кутан. Мӧд-кӧ, татшӧмнас зэв сьӧкыд веськавны пӧткаӧ. Пищальысь кӧ лыян, уткаыд быть усьӧ, дрӧбйыс разалас да. А ньӧвйыд кытчӧ на лэбас. Либӧ тӧкӧтьӧ веськалыштас да, ранитас сӧмын. Кӧин да ош вылӧ арбалет-ньӧвнад некод оз мун. Коймӧд-кӧ, тайӧ вывті дона удовольствие. Шуам, ӧти патроныс сулалӧ 16-20 шайт, а ньӧвйыд 100 шайт гӧгӧр. И висьтала тай, зэв сьӧкыд сыӧн веськавны. Ас кадӧ уджалі этнопаркын, кӧні восьтлім арбалетӧн да ньӧвйӧн лыйсян тир. Сӧмын спорт ордйысьӧмын лыйсьыны татшӧм ӧружиеыс шогмӧ, а оз вӧравны.
Александр Полугрудов, пенсионер, Ухта:
–Аттьӧ государстволы миян вӧсна тӧждысь. Сетісны позянлун чукӧртны пӧрӧм пу да рос. Ӧні со позяс вӧравны ньӧввужйӧн. Чайта, регыд Госдума вынсьӧдас оланпас, код серти мӧдам гӧрны пу гӧрйӧн.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.