Емдін му вылын эм мичасьыс-мича ин – От гӧра. Сэні сулалысь дас куим грезд лыдын эм и Семуков. Буретш Енлы кӧсйысьлӧм Крест праздник лунлы воча, сора 13 лунӧ, и пасйим ми Семуков сиктнымлы 300 во тырӧмсӧ.
Водз асывнас шызьӧдіс онялысь ывласӧ жыннянлӧн гажа звӧн, корис ставӧс чукӧртчыны пӧль-пӧчӧн на лэптылӧм Микӧла Чудотвореч вичко дорӧ. Эз тай ковмы дыр виччысьны, кывтыдсянь и катыдсянь тэрмасьӧмӧн ыльӧбтісны вежаинлань ас сиктса войтыр. Да тшӧтш и дона гӧсьтъяс буретш та кадӧ жӧ воисны. Батюшка Серафим нуӧдіс молебен, отсасис сылы Сыктывкарын Емдінса землячествоысь Павел Алексеевич Яруков. А сэсся став войтырыс вежа ӧбразъясӧн петісны ывлаӧ, медым бурсиан сьыланъясӧн гӧгӧртны муса сиктнымӧс помсянь помӧдз, вежӧдны чужанінлысь быд пельӧс. Со тадзи заводитчис тайӧ дыр виччысяна луныс.
Дас часын культура керкаын пансис сиктнымӧс нимӧдан гажлӧн медводдза юкӧн. Ичӧтик жыр тыри йӧзӧн. Часӧн-джынйӧн муніс сиктса аньясӧн котыртӧм петкӧдчӧм, грезд пуксьӧмсянь да ӧнія лунъясӧдз лои казьтыштӧма татчӧс войтырлысь олӧм-вылӧмсӧ. Быд кадӧ йӧзсӧ сулӧма бурыс и лёкыс: мир пасьталаса медводдза тыш, революция, гражданскӧй война, кулакалӧм да мыжтӧг мыждӧм, 1941-1945 воясся вир кисьтана тыш, войнабӧрся курыд да сэсся шуда 1970-1980 вояс…
Дзикӧдз тай со бӧръя кадас бырны кутіс муса сиктным, а ӧд кымын нималана войтырӧс чужтыліс сійӧ. На пиын Степан Васильевич Матвеев – РСФСР-са заслуженнӧй велӧдысь, кодлысь тӧдчана уджсӧ вӧлі пасйӧма Гӧрд Звезда да Ленин орденъясӧн, Александр Иванович Одинцов – генерал-полковник. Эм миян и асланым вежа морт, видзысь да мездысь – батюшка Всеволод Иванович Потеминский, кодӧс гудыр да пемыд 1937 воын мыжтӧг мыждісны да лыйлісны. Эмӧсь асланым кывбуралысьяс, серпасасьысьяс, нималана велӧдысьяс…
Казьтылӧма лои ставнысӧ, кодъяс аслас олӧмӧн да уджӧн нимӧдісны чужан мунымӧс республика да страна пасьта, найӧс, кодъяс вуджис-ны сьӧкыд война кад да сы бӧрын сувтӧдісны кок йылӧ чужаніннымӧс, найӧс, кодъяс Сӧвет кадӧ водзӧ зілис-ны сиктлы бур вылӧ. Пасйӧма лои и найӧс, кодъяс ӧні видзӧны пӧль-пӧчлысь оласногсӧ да пыкӧны сиктын олӧмсӧ. Кывзысь-видзӧдысьяслӧн син-ваныс доршасьліс, сы выйӧдз сьылан-висьтыс сьӧлӧмнысӧ налысь вӧрзьӧдіс да. А кыдз нӧ синватӧ чепӧс-йӧмысь кутан, ӧд ставыс тані ас, дона да матыс. Ок, мыйта ӧд шогсӧ йӧзыс пыклісны, сӧн орйӧдлан сьӧд уджсӧ бергӧдлісны да некодлы тай некор эз норасьлыны. Овлісны бурӧн да ла-дӧн, ас выланыс да Ен вылӧ надеяӧн. Унаӧн эновтісны нин таладор югыдсӧ да колисны ас йывсьыныс бур казьтылӧм. Еджыд экран вылын здук кежлӧ петкӧдчыліс налӧн тӧдса чужӧм-мыгӧрныс, и тайӧ здукъясас быттьӧ йитчылісны вӧвлӧмыс и ӧніяыс, и локтан кадыс.
А сэсся гаж нуӧдысьяс корисны ставнысӧ чукӧртчыны школа кыр йылын, ӧнія «Незабудка» турбазалӧн сад йӧрын. Майбыр, сэн вӧля! И поводдяыс ми дор: шондіа, кыпыд! Гажа гудӧк гор паськаліс сикт кузя, мыла сьыланъяс ылькнитісны, син пӧртана кытшӧн йӧктанъяс пансисны.
Праздник дырйи «Кӧжмудорса почёта олысь» ним сетісны война кадся челядьлы да уджвывса ветеранъяслы: Антонина Васильевна Матвеевалы, Александр Васильевич Туркинлы, Анна Ивановна Козловалы, Антонина Николаевна Матвеевалы, Вячеслав Вячеславович Семуковлы. Налы медводз и вичмис выльӧн пӧжалӧм «Тэ, чужан сиктӧй, – став олӧмӧй!» небӧг. Чужаніннымлӧн юбилей кежлӧ сійӧс дасьтіс Надежда Мисаиловна Павлова. Небӧгас лои пыртӧма сикт да татчӧс войтыр йылысь гижӧдъяс.
Чолӧмалісны и Нина Александровна да Антоний Григорьевич Зиновьевъясӧс, кодъяс 40 во нин бурӧн-ладӧн ӧтув олӧны. Нимӧдісны Лидия Андреевна да Стефан Николаевич Одинцовъясӧс. Найӧ 45 во ӧти ордым талялӧны, быдтісны 4 челядьӧс, 7 внукӧс.
Сиктнымӧс чужан лунӧн чолӧмавны волісны От гӧраса аньяслӧн котыр, сьылысьяслӧн «Гармония» (веськӧдлысьыс Надежда Каракчиева), йӧктысьяслӧн «Шӧвктугъяс» (Вера Доценко), «Мича нывъяс» (Екатерина Туисова). Асланыс мича сьыланкывъяснас нимкодьӧдісны и Сыктывкарын Емдінса землячестволӧн «Хорошее настроение» ансамбльысь солистъяс.
Кывбуръяснас йӧзлысь сьӧлӧмсӧ вӧрзьӧдісны поэтъяс Надежда Мирошниченко, Андрей Попов, Александр Суворов, Анжелика Елфимова, Александр Герасименко да Владимир Цывунин.
Сигӧртіс праздниксӧ нималана композитор Сергей Кузьмичевлӧн «Тэ, чужан грездӧй, – став олӧмӧй!» сьыланкыв.
* * *
Ыджыд гаж котыртны отсалӧмысь аттьӧалам «Незабудка» турбазаса директор Татьяна Александровна Новиковаӧс, туршӧринын велӧдысь Светлана Викторовна Бобинаӧс, Кӧжмудорса шӧр школаысь директорӧс велӧдан-туйдӧдан удж кузя вежысь Любовь Васильевна Туеваӧс, Туискерӧсса музейӧн веськӧдлысь Антонина Михайловна Туркинаӧс, Сыктывкарын Емдінса землячествоӧ пырысьясӧс да котырас нырщикалысь Валерьян Николаевич Исаковӧс, землячестволӧн социально-культурнӧй шӧринӧн юрнуӧдысь Лидия Константиновна Дубленниковаӧс, «Кӧжмудор» сикт овмӧдчӧминса администрацияӧс, Людмила Васильевна Матвееваӧс, Семуков сиктын чужлӧм аньяс Маргарита Александровна Матвееваӧс да Светлана Александровна Отиеваӧс, Кӧжмудорса шӧр школаысь директор Александра Николаевна Никоноваӧс.
Зэв ыджыд удж бергӧдісны и сиктса водзмӧстчысь аньяс: Галина Александровна Матвеева да сылӧн енбиа нывъясыс – Любовь да Екатерина, Еликонида Николаевна Лютоева, Лидия Андреевна Одинцова, Людмила Егоровна Калимова (гаж кежлӧ сійӧ дасьтіс ассьыс выставка) да, дерт жӧ, сиктса культура керкаӧн веськӧдлысь Галина Константиновна Семукова. Но медыджыд пай тайӧ ыджыд гаж нуӧдӧмас пуктіс коми кывбуралысь, Россияса гижысь котырӧ пырысь Надежда Мисаиловна Павлова.
Муӧдз копыр ставлы, кодъяс отсалісны Семуков грездлы чужанлунасьны.
300 воӧн тэнӧ, чужан сикт! Праздникӧн, дона войтыр!
Аттьӧалӧмӧн – Семуков сиктса «Шуд войт» сьылан-ворсан котырӧ пырысьяс.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.