Аски, июнь 28 лунӧ, страна пасьталаын нуӧдасны «Работа России. Время возможностей» ярманга да котыртласны мастер-классъяс, тренингъяс, медым быдӧн вермис аддзыны сьӧлӧм сертиыс удж.
Комиын кар-районса занятосьт шӧринъясын регионысь сё квайтымын сайӧ предприятие-организация-учреждениеӧн веськӧдлысьяс висьталасны, кутшӧм специальносьта уджалысьяс налы колӧны.
–Сыктывкарын регионса вузасян да промышленносьт палатаын висьталасны, кӧні позьӧ велӧдчыны сійӧ либӧ мӧд профессияӧ, босьтны содтӧд тӧдӧмлун, мый колӧ кутны тӧд вылын уджавны медасьӧм йылысь сёрнитчӧм кырымалігӧн, кыдзи позьӧ босьтчыны асшӧр уджӧ, лӧ-сьӧдны бизнес-план, – пасйис республикаысь удж, занятосьт да йӧзӧс социальнӧя дорйӧм кузя министрӧс вежысь Валерий Коротин. – Торъя военнӧй операцияса ветеранъяскӧд, СВО-ын вӧ-рӧглы паныд тышкасьысьяслӧн матысса рӧдвужкӧд аддзысьласны Комиын «Айму дорйысьяс» фондын да вермытӧмаяслӧн общественнӧй котыръясын зільысьяс, висьталасны, кутшӧм специальносьт-профессияа йӧз ӧні медся ёна колӧны регионса предприятие-организацияясын.
2024 восӧ Россияын шуӧма Семья воӧн, та вӧсна «Работа России. Время возможностей» ярманга дырйи котыртласны челядьлы ворсанінъяс, ӧд удж корсьысьяс вермасны локны сэтчӧ и ныв-пиныскӧд.
Сыктывкарын жӧ том йӧз тӧдмасясны «Россети Северо-Запад» компанияын уджӧн.
Ухтаын ярмангаыс паськӧдчас сэтчӧс техническӧй университетса «Буревестник» комплексын.
Удж, уджӧн могмӧдан да йӧзӧс социальнӧя доръян министерстволы Комиын «Работа России. Время возможностей» федеральнӧй тшупӧда ярмангасӧ котыртны отсалӧны республикаса юралысьлӧн администрация, регионса исполнительнӧй власьт тэчас, промышленникъяслӧн да предпринимательяслӧн котыр, вузасян да промышленносьт палата, регионӧн веськӧдлан шӧрин.
<> Лист боксӧ дасьтісны Александра АРТЕЕВА да Павел СИМПЕЛЕВ.
Снимокыс ӧтуввезйысь.