«Демография» нацпроект серти вынсьӧдӧм «Содействие занятости» федеральнӧй уджтас весьтӧ Комиын олысьяс вермасны мынтысьтӧг велӧдчыны да босьтны выль специальносьт.
Кыдз юӧртісны регионса удж, занятосьт да йӧзӧс социальнӧя доръян министерствоын, таво заводитчигӧн «Демография» нацпроект весьтӧ выль тӧдӧмлун-сям босьтӧм кузя шыӧдчӧма 534 морт. На лыдысь 196-сӧ шуӧма могмӧдны. Велӧдчыны босьтчӧмаӧсь ӧкмысдас ӧтиӧн.
Нацпроект серти дон босьттӧг вермасны велӧдчыны матысса кадӧ пенсия вылӧ петан арлыдаяс, 50 арӧса да олӧмаджыкъяс, каганысӧ куим арӧс тыртӧдзыс дӧзьӧритан отпускын аньяс да сизим арӧсӧдз челядя нывбабаяс, инвалидъяс, уджтӧмалысьяс да занятосьт службаӧ удж корсьӧм могысь шыӧдчӧмаяс, спецоперацияса ветеранъяс да налӧн матыссаяс, 2014 вося май 11 лунсянь ДНР-ын да ЛНР-ын тыш-косьӧ пырӧдчӧмаяс да с.в.
Мынтысьтӧг выль специальносьт босьтны позянлун сетӧма сідзжӧ 35 арӧсӧдз том йӧзлы, кодъяс армияын служитӧм либӧ велӧдчӧм помалӧм бӧрас нёль тӧлысьысь дырджык абу вермӧмаӧсь инасьны удж вылӧ.
«Содействие занятости» федеральнӧй уджтас весьтӧ мынтысьтӧг тӧдӧмлун-сям босьтӧм йылысь унджык позьӧ тӧдмавны «Работа России» порталын, а сідзжӧ кар-районса занятосьт шӧринын.
Казьтыштам, кольӧм во «Демография» нацпроект весьтӧ велӧдчӧма Комиын 1.351 олысь. Босьтӧм специальносьт сертиыс удж вылӧ инасьӧма 1.256 морт. <>
Анна ПОПОВА.