Таво заводитчӧмсянь Комиын олысьяс кырымалӧмаӧсь государствосянь сьӧма отсӧг босьтӧм могысь 515 социальнӧй контракт.
Такӧд йитӧдын уджтассӧ Россияса президент Владимир Путинлӧн водзмӧстчӧмӧн шуӧма збыльмӧдны странаса став регионас, медым отсавны судзсьытӧма олысьяслы аслыныс нажӧвитны сьӧм. Тайӧ тырвыйӧ лӧсялӧ «Демография» нацпроектын урчитӧм могъяслы.
Казьтыштам, соцконтракт – тайӧ судзсьытӧма олысь да йӧзӧс социальнӧя доръян шӧрин костын сёрнитчӧм. Сы вылӧ подуласьӧмӧн шӧриныс кӧсйысьӧ мынтыны мортыслы пособие, а мӧдыс – вӧчны ставсӧ, мый урчитӧма сылы соцконтрактас ассьыс быдлунъя олӧмсӧ бурмӧдӧм могысь.
Кыдз висьталӧны регионса удж, занятосьт да йӧзӧс социальнӧя доръян министерствоысь специалистъяс, соцконтракт сертиыс мортыс босьтчӧ асшӧр уджӧ, лӧсьӧдӧ ас овмӧс либӧ инасьӧ удж вылӧ. Зэв тӧдчана, мый сійӧ ачыс зільӧ корсьны нажӧткасӧ, мед зумыдджыка сувтны кок йылас.
Соцконтракт кырымалысьлы государствосянь сьӧма отсӧгыс абу ичӧт. Сідз, асшӧр уджӧ босьтчысьлы шуӧма ӧтчыдысь сетны 350 сюрс шайтӧдз.
Уна вылӧ 200 сюрс позьӧ босьтны ас овмӧс лӧсьӧдӧм могысь. Удж корсьӧмкӧд йитӧдын быд тӧлысь урчитӧма мынтыны таво республикаса лунвыв районын олысьлы 18.842 да войвылын – 23.311 шайт. Та дырйи позьӧ босьтны удж кузя содтӧд тӧдӧмлун-сям либӧ выль профессия.
–Йӧзыс гӧгӧрвоӧны, мый соцконтрактысь эм водзӧсыс, да окотапырысь шыӧдчӧны регионын олысьясӧс социальнӧя доръян шӧринӧ, мед кырымавны татшӧм документсӧ, –асланыс видзӧдласӧн юксьӧны минсоцтрудаын зільысьяс. – Сідз, таво соцконтракт серти удж корсьӧм могысь сёрнитчӧм кырымалӧма судзсьытӧма олысь 232 морт, асшӧр уджӧ босьтчыны шуӧмаӧсь 182-ӧн, ас овмӧс лӧсьӧдны – 26-ӧн.
Ведомствосьыс юӧр серти, соцконтракт кырымавны позьӧ и сэк, сьӧм абутӧм вӧсна кӧ мортыс матӧ воӧма. Республикаса лунвыв районын олысьлы такӧд йитӧдын таво урчитӧма вичмӧдны тӧлысьнас, кыдзи и удж корсьысьлы, 18.842, а войвылын – 23.311 шайт.
Но татшӧм сьӧма отсӧгсӧ шуӧма сетны сӧмын налы, кодъяс пыдди пуктана помка вӧсна оз вермыны уджавны, шуам, асьныс нёрпалӧны либӧ дӧзьӧритӧны сьӧкыда висьысь рӧдвужсӧ.
Таво татшӧм соцконтрактсӧ кырымалӧма 75 морт.
* * *
Социальнӧй контракт серти государствосянь сьӧма отсӧг босьтӧм йылысь юалӧмъясӧн позьӧ волыны йӧзӧс социальнӧя доръян шӧринӧ, а соцконтракт кырымалӧм йылысь шыӧдчӧмӧн – кар-районса соцуправлениеӧ, «Мои документы» МФЦ-ӧ либӧ ыстыны «Госуслуги» портал пыр.
<> Гижӧдсӧ дасьтіс Александра АРТЕЕВА.
Снимокъясыс ӧтуввезйысь.