Комиын дасьтасны челядя семьяяслы отсалӧм йылысь оланпас. Регионса правительстволы татшӧм индӧд сетіс июль 22 лунӧ республикаса юралысь Сергей Гапликов.
Юралысьлӧн кывъяс серти, сьӧмӧн колана ногӧн вӧдитчӧм понда 2018 воын регионса бюджетын мездмӧма 10 миллиард шайт, и найӧс колӧ веськӧдны социальнӧй могъяс збыльмӧдӧм вылӧ.
—Челядя семьяяслы отсалӧм могысь быд во кутам торйӧдны ӧти миллиард шайт. Сёрнитам и йӧзыскӧд, мед найӧ вӧзъясны, мый нӧшта позяс вӧчны сьӧкыдлунъяскӧд паныдасьӧм семьяяслысь олӧмсӧ бурмӧдӧм могысь, — пасйис Сергей Гапликов.
Республикаса правительствоын туялӧмаӧсь нин, эм-ӧ ӧнія социальнӧй отсӧгысь водзӧсыс. Туясьӧмлӧн кывкӧртӧд серти ви-дзӧдлӧмаӧсь, кыдзи позяс бурмӧдны отсӧг сетӧмсӧ. Та йылысь висьталіс удж, уджӧн могмӧдан да йӧзӧс социальнӧя доръян министерствоӧн веськӧдлысь Илья Семяшкин.
—«Демография» нацпроектын урчитӧма ыджыд тӧдчанлуна могъяс, и на пӧвстын — содтыны чужысь кагалысь лыдсӧ. Выль оланпассӧ збыльмӧдігӧн содас и республикаын олысьлӧн лыдыс. Оз ков вунӧдны и семьяяс йылысь, кӧні сӧмын на мӧвпалӧны лӧсьӧдны кагасӧ да быдтыны-велӧдны сійӧс, — пасйис Сергей Гапликов.
Оланпас баласӧ правительстволы колӧ дасьтыны август 14 лунӧдз нин, медым Госсӧветысь депутатъяс видлалісны сійӧс сентябрса сессия дырйи.
—Пыр жӧ колӧ босьтчыны тайӧ уджас, медым сьӧмсӧ вичмӧдны 2020 вося январь 1 лунсянь нин, — тӧдчӧдіс Сергей Гапликов.
* * *
Буретш тайӧ оланпас сертиыс, кодӧс шуис дасьтыны-вынсьӧдны республикаса юралысь Сергей Гапликов, семьялы регионса мам капитал – 150.000 шайт — вичмас и медводдза на кага вайӧмысь.
Казьтыштам, та мында жӧ сетӧны ӧні Комиын коймӧд да унджык дзолюкӧс чужтӧмысь.
Республикаса удж, занятосьт да йӧзӧс социальнӧя дорйӧм кузя министр Илья Семяшкинлӧн висьталӧм серти, семьялы медводдза кагасьыс тайӧ капиталыс, дерт жӧ, лоас тӧдчана отсӧгӧн, тшӧтш и оланінсӧ бурмӧдӧм могысь.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.