Май 15 лунӧ бара кутам пасйыны Войтыркостса семья лун. И буретш тайӧ лунӧ чолӧмалам-нимӧдам Комиысь уна челядя медбур семья-котырӧс.
Таво республикаса правительстволысь премия, быдӧнлы 100 сюрс шайт, сетасны вит медбур семьялы. Татшӧм наградаӧн шуӧма пасйыны Удораысь Соловьевъясӧс, Кулӧмдін районысь Коюшевъясӧс, Луздорысь Иевлевъясӧс, Печораысь Бывалинъясӧс да Эжваысь Тучнолобовъясӧс.
Ставныс найӧ ӧта-мӧдсӧ радейтӧны да пыдди пуктӧны, водзмӧстчӧны да зільӧны збыльмӧдны ас водзаныс пуктӧм могъяс. Бать-мам быд боксянь сӧвмӧдӧны ныв-пинысӧ, зэв тӧдчана налы быдтыны челядьнысӧ шань да вежавидзысь йӧзӧн.
Усогорскысь Марианна Ивановна да Сергей Юрьевич Соловьевъяслӧн вит челядь. Бать-мамыс ичӧтсяньыс ышӧдӧны найӧс пыдди пуктыны олӧмаджыкъясӧс, повтӧг босьтчыны быд уджӧ, отсалӧны ныв-пияныслы сӧвмӧдны тӧдӧмлун-сямсӧ да енбисӧ. Куимнан пиыс да кыкнан нылыс водзмӧстчӧны велӧдчӧмын, спортын, творчествоын да искусствоын. 2023 воын Соловьевъяс петкӧдчӧмаӧсь Удора районсянь семья творчестволы сиӧм «Птица счастья» фестивальын.
Прӧст кадӧ ставӧн ӧтув пусьӧны-пӧжасьӧны, ветлӧны походӧ, кыйӧны чери, радейтӧны коллявны кад асланыс дачаын да, дерт жӧ, кыпыда пасйыны чужан лунъяс. А мый нӧшта колӧ шуда семьялы, кор ставӧн ӧтлаынӧсь!
Светлана Михайловна да Станислав Васильевич Коюшевъяслӧн эм асланыс лозунг: «Движение – это жизнь!». Уджысь да велӧдчӧмысь прӧст кадӧ найӧ ветлӧны концерт-спектакль да кино видзӧдны, кыйӧны чери, а тӧвнас исласьӧны лызьӧн да журъялӧны снегоходӧн. Бать-мам ышӧдӧны челядьсӧ радейтны вӧр-ва, гӧгӧрвоӧдӧны, кыдзи кутны асьнысӧ вӧрын да вадорын. Зільӧны духовнӧя сӧвмӧдны найӧс. Ыджыд православнӧй гажъяс дырйи Коюшевъяс став семьяӧн волывлӧны вичкоӧ.
Абьячойысь Ирина Александровна да Денис Михайлович Иевлевъяс ышӧдӧны кык нывсӧ да писӧ тӧдны да пыдди пуктыны Коми мулысь да ставнас страналысь историясӧ да нэмӧвӧйся традицияяссӧ. Пырӧдчылӧмаӧсь «Пишу тебе, Герой» да «Посылка солдату» ставроссияса военно-патриотическӧй акцияясӧ. Семьянас дӧзьӧритӧны и вӧр-ва, та могысь торйӧдлӧмӧн чукӧртӧны лӧп-ёг, медым сэсся нуны переработкаӧ. А прӧст кадӧ ӧтлаын пелькӧдӧны сиктнысӧ. Ывлаын чукӧртӧны шыблас банка-дозмук да сэсся сетӧны эзысь волонтёръяслы, кодъяс дасьтӧны торъя военнӧй операцияса салдатъяслы окопын вӧдитчан сисьяс.
Нӧшта Иевлевъяс радейтӧны путешествуйтны, странаса уна шензьӧданаинӧ нин волӧмаӧсь.
Печораысь Татьяна Алексеевна да Алексей Михайлович Бывалинъяс шуӧны, семьяыд пӧ – олӧмад медся тӧдчанаыс. Бать-мам тӧждысьӧны нёль челядьыслӧн дзоньвидзалун вӧсна да, прӧст кадӧ став семьяӧн журъялӧны велосипедӧн, а тӧвнас ислалӧны лызьӧн. Нимкодь, мый ныв-пиныс пыдди пуктӧны православнӧй культура да коми войтырлысь нэмӧвӧйся традицияяс. Бывалинъяс оз вермыны овны небӧгтӧг, рытъяснас гораа лыддьысьӧны. А семьяас кӧ кутшӧмкӧ гаж матыстчӧ, велӧдӧны кывбур-сьыланкывъяс да дасьтӧны ӧта-мӧдыслы ки помысь козинъяс. Бывалинъяс окотапырысь пырӧдчӧны быдсикас общественнӧй акция-гажӧ.
Эжваысь Екатерина Сергеевна да Геннадий Валентинович Тучнолобовъяслӧн кык ныв да пи. Тайӧ семьяыс – чужан му радейтӧмын, духовнӧй традицияяс видзӧмын бур пример. Батьныслӧн зільӧмӧн ставныс пырӧдчӧны «Достойное поколение» котырӧ.
Геннадий Валентинович да Екатерина Сергеевна быдтасъясныскӧд тӧдмасьӧны казачество да ставнас страналӧн историяӧн, окотапырысь отсалӧны чукӧртны торъя военнӧй операцияӧ пырӧдчӧм салдатъяслы пӧсылкаяс.
Тучнолобовъяс – православнӧй христиана. Налӧн челядьыс шаньӧсь, зільӧсь, тӧлкаӧсь, дасьӧсь быдӧнлы отсавны сьӧкыд здукӧ.
* * *
Соловьевъяс, Бывалинъяс да Тучнолобовъяс петкӧдчасны республика нимсянь «Семья года» ставроссияса конкурсын.
Сійӧс ӧкмысӧдысь нин котыртӧ сьӧкыд оласнога челядьлы отсасян фонд, и таво тайӧ петкӧдчӧмыс лоӧ Россияын Семья воӧ торйӧн нин тӧдчана.
<> Гижӧдсӧ дасьтіс Екатерина Микушева.
Снимокъясыс ӧтуввезйысь.