«Дзоньвидзалун» нацпроект серти республикаса пыр унджык больнича-поликлиника могмӧдӧны ӧнія кадся выль аппарат-оборудованиеӧн.
2019 восянь артыштӧмӧн ньӧбӧма сьӧлӧм да сӧн висьӧмысь бурдӧдан 324 сикас медоборудование. Видзӧма та могысь 512 миллион сайӧ шайт.
Кольӧм восянь компьютера томографӧн вӧдитчӧны Изьваын, Сосногорскын да Усинскын, а сідзжӧ регионса гырысь клиникаясын. Ставсӧ мӧйму ньӧбӧма 84 миллионысь унджык шайт дон 43 оборудование-аппарат.
2023 воын республикаса кардиология диспансерын компьютера томографӧн видлалӧма-туялӧма дзоньвидзалунсӧ ӧкмыс сюрс мортлысь, на лыдысь джынсьыс унджыкыслысь – ӧнія кадся выль аппаратӧн.
Водзӧ вылӧ Комиысь врачьяс кутасны вӧдитчыны пыр унджык татшӧм медтехникаӧн.
Сідз, таво гожӧмӧдзыс выль томограф лоӧ сувтӧдӧма Сыктывкарса 3-ӧд номера поликлиникаын. Ыджыд ӧда татшӧм аппаратнас мортлысь дзоньвидзалунсӧ тырвыйӧ туявны позяс уна вылӧ вит минутӧн, та дырйи рентгенысь лёк югӧрыс озджык мӧрччы вир-яяс, а снимокъясыс лоасны ясыдджыкӧсь, мый сетас позянлун специалистлы пуктыны стӧч диагноз.
Поликлиникаса главврач Владимир Филипповлӧн висьталӧм серти, водзӧ вылӧ лӧсьӧдчӧны ньӧбны медучреждениеас лыдпаса выль маммограф.
<> Гижӧдсӧ дасьтіс Александра Артеева.
Снимокъясыс ӧтуввезйысь.