Мӧйму декабрын Россияса президент кырымаліс индӧд, мый серти йӧзлӧн занятосьт йылысь оланпасӧ пыртісны кутшӧмсюрӧ содтӧд.
Мый сэні вежсис? Кодӧс мӧдасны лыддьыны уджтӧмалысьӧн да ыджыд-ӧ пособие кутасны сетны кыккирудз пукалӧмысь?
Тайӧ да мукӧд юалӧм вылӧ вочавидзис Сыктывкарын «Россияса удж» («Работа России») шӧринӧн веськӧдлысь Ирина Рыбина.
–Ирина Владимировна, ёна-ӧ вежсис оланпасыс?
–Ме эськӧ шуи сійӧс дзик выль оланпасӧн. Унджык статьяыс лоас вына 2025 вося январь 1, а кутшӧмсюрӧ – 2024 вося сентябрь 1 лунсянь. Но ӧткымын статьяӧ содтӧд уджалӧ нин таво заводитчӧмсянь.
Артмӧ, ӧні вӧдитчам 1991 вося важ оланпаснас и выльнас. Мыйӧн найӧ торъялӧны? Выльыс некодӧс оз ӧткодяв, быд мортлы сійӧ инмӧ ас ногӧн.
–Сійӧ пӧ ёна кокньӧдӧ уджтӧмалысь сирӧтаӧс да бать-мамтӧг кольӧм томуловӧс?
–Тавосянь татшӧмыс кӧ медводдзаысь шыӧдчис шӧринӧ, медым сійӧс шуисны уджтӧмалысьӧн, сылы квайт тӧлысь мӧдасны мынтыны медыджыд пособие районса коэффициент артыштӧмӧн. Регистрируйтчан лун бӧрас кӧ ныв-зон инасясны удж вылӧ да быд тӧлысь занятосьт службаӧ мӧдасны вайны удждон йывсьыс справка, налы мӧдасны мынтыны республикаын шӧркодь удждонӧдз содтӧд сьӧм.
Шуам, специальносьтыс абу да, сирӧта либӧ бать-мамтӧм том морт инасис идрасьны. Гӧгӧрвоана, сылы тӧлысьнас мӧдасны мынтыны уна вылӧ МРОТ. Но ваяс кӧ справка, содтасны регионын шӧркодь удждонӧдз, а тайӧ ылӧсас 70(!) сюрс шайт.
Тайӧс вӧчӧмаӧсь сы могысь, медым ышӧдны удж вылӧ 23 арӧсысь томджыкъясӧс.
–Пособие боксянь мыйкӧ вежсьӧ?
–Водзті пособие ыдждасӧ быд во урчитліс Россияса правительство. Оланпасас и ӧні индӧма медыджыд (12.792 шайт) да медічӧт (1.500) пособие. Но вежлавны найӧс оз нин мӧдны. Та пыдди тавося январь 23 лунӧ правительствоӧн вынсьӧдӧм 46-ӧд номера постановление серти став сикас пособиесӧ, компенсациясӧ да сьӧма отсӧгсӧ вонас ӧтчыд мӧдасны индексируйтны 1,074 коэффициент серти.
Торйӧн ёна содліс уджтӧмалысьыс пандемия дырйи, ас вылӧ уна зільысь пӧдлалісны предприятие-котырсӧ да.
Талун пособие вичмӧдігӧн медводз видзӧдӧны, кӧні да дыр-ӧ мортыс уджавлӧма. Шыӧдчытӧдзыс кӧ кӧнкӧ зілис 26 вежон, сылы квайт тӧлысь кежлӧ урчитасны медыджыд пособие: куим тӧлысь 12.792 шайт (районса коэффициентӧн артмӧ 15.350 шайт 40 ур) да нӧшта та дыра жӧ вит сюрсӧн (коэффициентӧн лоас квайт сюрс гӧгӧр).
Медічӧт пособиеыс – 1.800 шайт, мортыс кӧ таӧдз воысь дырджык некӧн эз уджав, да сылӧн абу некутшӧм профессия.
Пенсия арлыда войтырлы пособиесӧ мынтӧны во, предприятиеыс кӧ пӧдласис, либӧ сэні чинтісны зільысь лыдсӧ.
–Кодӧс позьӧ шуны уджтӧмалысьӧн?
–Оланпас серти татшӧмнас лоӧ морт, коді шыӧдчис занятосьт службаӧ да дась пыр жӧ инасьны шогманаинӧ.
Миян служба татшӧмыслы дасьтӧ торъя план, кытчӧ мӧдасны пасъявны, кымынысь сійӧ воліс шӧринӧ, кутшӧм удж сылы вӧзйылісны да с.в.
Занятосьт службалӧн медшӧр могыс – инавны мортсӧ.
Ӧні выль удж вӧзйигӧн унатор кутам тӧд вылын: кутшӧм стажыс, дзоньвидзалуныс, кымын лун мӧдас уджавны, ылын-ӧ гортӧдзыс мунны да с.в.
Выль содтӧдъяс серти уджтӧмалысьӧн мӧдасны лыддьыны оз сӧмын прописка серти. Кӧть кӧні позяс шыӧдчыны матысса занятосьт шӧринӧ.
–А коді оз вермы лоны уджтӧмалысьӧн?
–Ӧні лоис унджык помка киритны татшӧм сідз шусяна статуссӧ.
Талун вӧдитчам «Работа России» да «Госуслуги» порталъясӧн. На пыр шыӧдчӧны миян шӧринӧ, сэні йӧзӧдам став вакансиясӧ, предприятие-организацияӧн веськӧдлысьяс вӧзйӧны уджаланін, корӧны сідз шусяна собеседование вылӧ да с.в. Мортыслы «Личнӧй кабинетас» ыстам некымын уджаланін йылысь юӧр. Сылы колӧ став вӧзйӧмторсьыс бӧрйыны, кытчӧ эськӧ окота сылы инасьны медводз, а мый оз во сьӧлӧм вылас. Сійӧ кӧ оз вочавидз, сідзкӧ, оз кӧсйы корсьны уджаланінсӧ.
Овлӧ, уджӧн могмӧдысь корас мортсӧ сёрнитны, вӧзъяс уджаланін, весиг некымынӧс, но бӧръяыс бара жӧ нырсӧ чушнитӧмӧн ӧвтыштчас.
Водзті кӧ татшӧмыслы кад кежлӧ дугӧдлісны мынтыны пособиесӧ, талун киритасны уджтӧмалысь лыдысь. Тадзи жӧ мӧдасны вӧчны накӧд, кодлӧн помасис пособие босьтан квайт тӧлысьыс.
Миян шӧринӧ тшӧкыда шыӧдчылӧны 14 арӧса ныв-зон, велӧдчӧмсьыс прӧст кадӧ, каникул дырйи кӧсйӧны нажӧвитчыштны да. Ми налы бӧръям шогмана удж, но, кыдзи и водзті, оланпас серти 16 арӧсысь томджык морт оз вермы лоны уджтӧмалысьӧн.
На лыдӧ оз веськавны и очнӧя велӧдчысьяс, условнӧя судитӧмаяс да дзескыдінын пукавлӧмаяс либӧ найӧ, кодъяс вештӧны мыжсӧ государство вылӧ зільӧмӧн.
Уджтӧмалысьӧн оз вермы лоны морт, коді некӧн оз уджав, но та пыдди дӧзьӧритӧ первой группаа инвалидӧс, вермытӧм кагаӧс, 80 арӧсысь пӧрысьджык пӧль-пӧчӧс. Татшӧмыслы государство сідз нин отсалӧ сьӧмӧн.
Та вӧсна жӧ оз ло уджтӧмалысьӧн сідз шусяна приёмнӧй семья лӧсьӧдысь, кӧні дӧзьӧритӧны бокӧвӧй челядьӧс да пӧрысьясӧс.
–Уджӧн могмӧдысь водзті ёнасӧ эз и босьтлы вермытӧмаӧс…
–Водзті предприятие-котырас кӧ зілис 35 да унджык морт, 2 прӧчент уджаланінсӧ колӧ вӧлі вичмӧдны вермытӧмалы, мед кӧть ӧти мортлы. Тавося март 1 лунсянь Комиын сідз шусяна квотасӧ вежисны. Сідз, предприятие-организацияас кӧ 35-100 морт, 3 прӧчент уджаланінсӧ колӧ вичмӧдны вермытӧмалы, сёысь кӧ унджык – 4 прӧчентсӧ нин.
Удж, занятосьт да йӧзӧс социальнӧя доръян министерство сьӧмӧн ышӧдӧ предприятие-организацияӧн веськӧдлысьӧс босьтны вермытӧмаӧс. Сідз, І группаа инвалидысь вичмӧдасны 183 сюрс шайт, а ІІ группааысь – 120 сюрс.
Мӧйму татшӧм ногӧн иналісны удж вылӧ кызь инвалидӧс, а таво – дас кыкӧс.
Нӧшта ӧти выльтор. Водзті предприятие-организациясянь юӧртлісны миянлы, кутшӧм уджаланін налӧн прӧстмис. Татшӧмыс кӧ эз вӧв, тшӧтш юӧртлісны та йылысь. Но занятосьт йылысь оланпасысь «усис» 25-ӧд статья, а сы пыдди лоис 53-ӧд. Сы серти вакансия йылысь юӧрсӧ пыр жӧ либӧ уна вылӧ вит лунӧн ыстӧны миянлы. А прӧстмӧм уджаланіныс кӧ абу, юӧртнысӧ оз ков.
–Юркарын уджтӧмалысьыс уна?
–Сыктывкарын талун татшӧмыс артавсьӧ 740 морт.
–А прӧст уджаланіныс?
–Юркарса шӧрин вӧзйӧ 4.200 уджаланін.
–А кӧні медся ёна виччысьӧны зільысьясӧс и мыйла абу сэтчӧ инасьны окотитысьыс?
–Специалистыс медсясӧ оз тырмы больнича-поликлиникаын, школа-лицейын. Оз тырмыны шоперъяс. Дерт, 740 уджтӧмалысь пӧвстысь уналӧн эм машинаӧн ветлан право, но кодлыськӧ суд пыр мырддьӧмаӧсь, кодлӧнкӧ категорияыс оз лӧсяв. Ӧд унджыкыслӧн В, а колӧны С да D.
Талун унаӧн окотитӧны лоны охранникӧн. Некымын во нин велӧдам, а пыр на оз тырмы татшӧмыс. Тайӧ и гӧгӧрвоана, олӧма войтырлы тайӧ должносьтыс лӧсялӧ медсясӧ сы боксянь, мый смена костъясын эм прӧст кад, кор позьӧ ноксьыштны дачаын. Охранникӧ босьтӧны медсясӧ полицияын, МЧС-ын, мукӧд вына тэчасын уджавлӧмаясӧс. Ӧти местаас вӧзйысьӧ 7-8 морт. Медводз донъялӧны налысь дзоньвидзалунсӧ, и оз на быдӧн вермы прӧйдитны медосмотрсӧ, сы вӧсна мый кӧнсюрӧ колӧ вӧдитчыны ӧружиеӧн. А татшӧминас быдӧнӧс оз на и босьтны. Велӧдӧны кык вежон, тшӧтш и пенсионеръясӧс, кодъяс оз нин уджавны. Та бӧрын стажировка, а сэсся нин босьтӧны удж вылӧ.
Миянын удж корсьысьяслы позьӧ велӧдчыны 1,5 сюрс программа да сідз шусяна компетенция серти. Велӧдам айтишникӧ, вуджӧдчысьӧ, медсестраӧ, шоперӧ, нянь пӧжалысьӧ, пусьысь-пражитчысьӧ, вузасьысьӧ, логистикӧ, психологӧ, монтажникӧ, каменщикӧ да с.в.
Казьтышта, комын во сайын буретш апрель 19 лунӧ РСФСР-са Верховнӧй Сӧветӧн веськӧдлысьӧс сэкся первой вежысь Руслан Хасбулатов кырымалӧма йӧзлӧн занятосьт йылысь 1032-1-ӧд номера оланпас. Сэні вӧлі пасйӧма, мый профобразование госуслугаыс медводз шымыртӧ уджтӧмалысьӧс да мортӧс, коді пенсия вылас петӧм бӧрын водзӧ кӧсйӧ зільны.
Некымын во нин збыльмӧдам «Демография. Старшее поколение» национальнӧй проект, код серти медводз велӧдам сідз шусяна предпенсионеръясӧс, кодъяс уджалӧны на, но вит во мысти петасны пенсия вылӧ. Занятосьт шӧрин пыр «Возвращение в профессию» программа серти тӧдӧм-лун-сям босьтӧны пенсионеръяс, кодъяс кутшӧмкӧ кадколаст шойччӧм бӧрын бара кӧсйӧны кӧнкӧ уджыштны, 50 арӧсысь олӧмаджыкъяс да том мамъяс, кодъяслӧн дзолюкъяслы эз на тыр куим либӧ квайт арӧс.
Нӧшта тӧдчӧда, миян медшӧр мог – велӧдӧм кындзи инавны мортсӧ удж вылӧ. 75 прӧчент велӧдчысьыс аддзӧ выль удж.
Удж корсьысьлы, велӧдчыны окотитысьлы колӧ тшӧкыдджыка пыравны ӧтуввез пыр «Вконтакте» группаӧ, «Работа России» да «Госуслуги» порталъясӧ, кӧні меститӧма шӧрин йывсьыс став юӧрсӧ. Найӧс быд лун выльмӧдӧны. И талун кӧ пӧ немтор эн аддзӧй, пыралӧй аски, мыйкӧ да, гашкӧ, воас сьӧлӧм вылад.
Мортыс кӧ кӧсйӧ зільны-нажӧвитчыны, та могысь позянлунсӧ корсяс. А кӧсйӧ кӧ кыккирудз пукавны да нӧшта на босьтны пособие, мырсьынытӧ сира гезйӧн он кыскы. <>
Николай Размыслов.
Снимокыс авторлӧн.