Сыктывкарын олысь Ольга Ногиева майшасьӧ: «Быд во гожӧмнас тшӧкыда кывла вӧйӧмаяс йылысь. Кутшӧм удж вӧчӧны такӧд йитӧдын йӧзӧс дорйысь-мездысьяс, кыдзи ышӧдӧны республикаын олысьясӧс видзчысьны татшӧм ускӧттьӧ-неминучасьыс?». Ольга Ногиевалы вочавидзӧ биысь видзчысян служба да войтырӧс доръян республикаса управлениеысь шӧр специалист Елена Лодыгина.
Июль тӧлысь — медбур кад пӧттӧдз гожйӧдчыны, купайтчыны, дзоньвидзалун ёнмӧдны. Таво гожӧмнас ыркыд поводдя вылӧ видзӧд-тӧг республикаса кар-районын восьталӧма жӧ нин пляжъяс: ю пыдӧс весалӧма лӧп-ёгысь, берегъяс вылӧ ва-йӧма содтӧд лыа, сувтӧдӧма лабичьяс да паськӧм вежа-нiнъяс. Уналаын шойччысь-купайтчысьяс бӧрся видзӧдӧны спасательяс.
Республикаса кусӧдчысьяс йӧз пӧвстын сідз шусяна профилактикасӧ нуӧдӧны оз сӧмын биысь видзчысьӧм кузя, но и сёрнитӧны челядькӧд да верстьӧкӧд вадорын ускӧттьӧ-неминучаысь видзчысьӧм йылысь, разӧдӧны тшӧтш и памяткаяс.
Збыльысь, быд во телевизор-радио пыр тшӧкыда кывлам, мый сэні либӧ тані кодкӧ вӧйӧма. Помкаыс пырджык ӧти. Кодсюрӧ оз колана ногӧн кутны асьнысӧ ю дорын: купайтчӧны гажа юрӧн да тӧдтӧминын, зонпосниӧс кольӧны ас кежас.
Медым вадорын эз су неминуча — колӧ бура дасьтысьны. Купайтчыны колӧ шоныд да лӧнь поводдяа лунӧ. Босьтӧй сьӧрсьыныд неуна сёян, юан ва, чышкӧд. Мунанныд кӧ челядькӧд, быть босьтӧй пӧльтӧм кытшъяс, спасжилет либӧ сідз шусяна нарукавникъяс. Уялӧй сӧмын тӧдсаинын, эн варч-чӧй берегсяньыс ылӧ да эн дурӧй ва вылын. Челядьӧс ӧтнаныссӧ ваӧ пырны эн лэдзӧй, мед быть вӧлі накӧд орччӧн кодкӧ верстьӧ пӧв-стысь. Эн матыстчӧй кывтысь пыж-катер дорӧ. Эн пы-рӧй ваӧ рытъявыв, гымаліг-чардалігӧн да гажа юрӧн.
Купайтчигӧн колӧ кутны тӧд вылын, шоныд-ӧ ваыс. 18 градусысь кӧ кӧдзыдджык — оз ков пырны юӧ, ки-коктӧ вермас войтӧв кыскыны, да бӧр петнысӧ лоӧ сьӧкыд. Дыр гожйӧдчӧм, а сідзжӧ пӧтӧса сёйӧм бӧрын оз жӧ ков купайтчыны.
Веськалінныд кӧ визулаинӧ, эн варччӧй ю катыд, эн ви-дзӧй вынтӧ. Визулыскӧд кывтӧй берегланьыс. А он кӧ нин вермӧй водзсасьнысӧ, корӧй отсӧг. Берегсяньыс быть кодкӧ кылас горзӧмнытӧ.
Ковмас кӧ мездыны вӧйысь мортӧс, видлӧй тайӧс вӧчны сылы кузь бедь мыч-чӧмӧн либӧ шыбитӧй пӧльтӧм кытш. Ковмас кӧ аслыныд пырны ваӧ — матыстчӧй вӧйысь дорӧ мышсяньыс, тшапкӧй юрсиӧдыс либӧ киняулӧдыс, бергӧдӧй мыш вылас да варччӧй береглань. Ваысь петӧм бӧрын пыр жӧ корӧй телефон пыр «тэрыб отсӧг». Позьӧ звӧнитны ӧтувъя 112 номера телефон пыр. А медикъяслӧн вотӧдз видлӧй асьныд сетны неминучаӧ веськалӧмалы медводдза отсӧгсӧ.
Снимокыс ӧтуввезйысь.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.