Коми гижысь Елена Козлова вöлi бур, тöлка мамöн и зонпоснилы, и гырысьлы. Мыйла тадзи шуам? Сiйö медсясö гижис челядьлы. Быдöн лыддьылiс «Лöз клянича», «Гöгыля-вугыля», «Шундыр» да мукöд небöг.
Елена Васильевна нимкодьпырысь аддзысьлiс томуловкöд. Быд татшöм паныдасьлöм колис челядь вежöрö югыд бобулöн. Самуил Маршак нима челядьлы Национальнöй библиотека ышöдiс казьтыштны тайö аддзысьлöмъяссö фотояс пыр. Видзöдлöй, кутшöм ставöн шудаöсь! А верстьö йöзлы Елена Васильевна вöлi литература мамöн. Сiйö веськöдлiс Коми Республикаса гижысь котырöн, а та кындзи дасьтiс колана небöгъяс челядькöд уджалысьяслы. Ань лун водзын ми Елена Козловаöн лöсьöдöм куим юкöна «Коми челядьлы антологияысь» бöрйим мамлы сиöм кывбуръяс. Лыддьöй мамныдлы, мед нюмыс петас!
Серафим ПОПОВ
БУР МАМ
Менам мамӧ медся бур,
Сыысь мусаыс оз сюр.
Менӧ пасьтӧдӧ и вердӧ,
Шонтӧ аслас сьӧлӧм бердас,
Ичӧт юрӧ кӧдзӧ сям…
Тіян эм-ӧ татшӧм мам?
Сергей КУЛИКОВ
МАМÖЛÖН ПРАЗДНИК
Аски мамöяслöн праздник,
Аски налöн ыджыд лун.
Öнi лöсьöда пöдарки,
Аски сетны мед эз вун.
Юрий ВАСЮТОВ
МАМ
Мамö вурис меным дöрöм,
Мамö шöралiс нянь шöрöм,
Мамö мыськис менсьым чужöм,
Мамö пуис чöскыд ужын,
Мамö шебралiс да мойдiс,
Мамö орччöн вöлi войбыд.
Мамö дорын ме ог дур,
Менам мамö медся бур.
Михаил ЛЕБЕДЕВ
МАМ И ЧЕЛЯДЬ
Коді челядь вӧсна шогсьӧ,
Челядь гӧгӧр зіля ноксьӧ,
Видзӧ найӧс вой и лун,
Ылӧ на дінысь оз мун?
Налӧн муса мамыс!
Коді на вӧсна и олӧ,
Найӧс кывйӧн дойдны полӧ,
Сетӧ чӧскыд сёянтор,
Аслыс водзӧссӧ оз кор?
Налӧн дона мамыс!
Челядь быдмӧны кӧ бура,
Оз кӧ лоны пемыд юра,
Коді сэки медся рад,
Оз и аддзыв гажтӧм кад?
Налӧн зарни мамыс!
Оз кӧ челядь шаня овны,
Лёксӧ вӧчны оз кӧ повны,
Коді жугыльтчӧма сэк,
Быттьӧ арся лунӧ кӧк?
Налӧн коньӧр мамыс.
Снимокъясыс Кӧрткерӧсса, Лӧзымса, Вуктылса, Гӧрд Затонса, Кулӧмдінса, Воркутаса да Зеленечса библиотекаысь.
Дасьтіс Алёна Нестерова.