Сӧветскӧй армияын на срочнӧй служба помасьӧм бӧрын кодсюрӧ кольччылісны водзӧ служитны.
2013 воын странаын босьтчисны военнӧй реформаӧ. Куим во мысти офицеръяс да сержантъяс мӧдісны нин армияын уджавны. 2017 восянь Россияса военнӧй флотса кутшӧмсюрӧ часьтӧ оз нин босьтны «срочникъясӧс». А 2020 воын армияын контракта уджалысьыс лоӧма призыв серти служитыссьыс ёна унджык.
Кодлы талун позьӧ кырымавны контракт да уджавны армияын? Ыджыд-ӧ сэні удждоныс, да кутшӧм льгота-кокньӧд урчитӧма погона мортыслы да сылӧн семьялы?
Тайӧ да мукӧд юалӧм вылӧ республикаса юралысьлӧн Общественнӧй приёмнӧйын вочавидзисны миян регионын контракт серти военнӧй служба вылӧ бӧръян пунктысь сотрудникъяс.
Коми Республикаын контракт серти военнӧй служба вылӧ бӧръян пунктысь старшӧй инструктор Степан Жданов.
—Степан Николаевич, кытчӧ позьӧ шыӧдчыны контракт кырымалӧм могысь?
—Сыктывкарын позьӧ веськыда шыӧдчыны Катаев уличаса 7-ӧд номера керкаӧ. Либӧ звӧнитлыны 8(8212)32-15-88, 8-924-194-27-54 номера телефонъяс пыр. Мортыс кӧ олӧ мукӧд кар-районын, позьӧ шыӧдчыны военкоматлӧн матысса юкӧнӧ. Сэсся став муниципалитетса администрацияас эм сідз шусяна военно-учётнӧй пызан. Тайӧс позьӧ вӧчны и «Госуслуги» портал да Россияса оборона министерстволӧн сайт пыр.
Миян пунктӧ шыӧдчысьлы сьӧрсьыс колӧ босьтны паспорт, военнӧй билет, трудӧвӧй книжка, чужӧм, гӧтрасьӧм да велӧдчӧм йылысь документ (диплом, аттестат). Сійӧс тӧдмӧдасны став юӧрнас, кӧні да кутшӧм специалистӧс виччысьӧны войскаын да с.в.
Дзоньвидзалун йылысь некутшӧм справка оз ков, медкомиссиясӧ прӧйдитас тані. Ковмас кӧ, еджыд халатаяс асьныс судзӧдасны став колана юӧрсӧ, кутшӧм категория сылӧн вӧлі, воддза серти омӧльтчис-ӧ дзоньвидзалуныс, кутшӧм врач да мыйысь бурдӧдіс.
Мортыс кӧ воис ылі районысь, служитанінас ыстытӧдз оборона министерство тшӧт весьтӧ сійӧс дон босьттӧг овмӧдасны гостиницаын да вердасны-юкталасны. Бӧръя кадӧ унаӧн локтісны Чилимдін да Кулӧмдін районъясысь да весиг Санкт-Петербургысь. Шӧркодя комын арӧса мужичӧйяс.
Медводз, дерт, тӧдмалам мортыслысь дум-кӧсйӧмсӧ, лӧсьӧдчӧ веськавны спецоперация вылӧ али йитны олӧмсӧ контракт серти военнӧй службакӧд.
Став документсӧ дасьтӧм, специалистъяскӧд да военно-врачебнӧй комиссияса врачьяскӧд аддзысьлӧм бӧрын кырымалам контракт да лун-мӧд мысти нин сійӧс бара жӧ дон босьттӧг мӧдӧдасны служитанінас сідз шусяна предписание серти.
—Кӧні позьӧ служитны?
—Мортыс кӧ кӧсйӧ веськавны СВО вылӧ, бӧръям лӧсялана военнӧй часьт.
Кӧсйӧ кӧ служитны мӧдлаын, тӧдмӧдасны, кӧні да кутшӧм войскаын виччысьӧны да с.в. Дась кӧ мунны Камчаткаӧ, Ылі Асыввылӧ, Москваӧ, Санкт-Петербургӧ, Тиксиӧ, Новая Земля ді вылӧ, да эм сэні уджалан местаыс, сэтчӧ и веськалас.
Республикаын контракт серти позьӧ служитны оборона министерстволӧн 12-ӧд главнӧй управлениеса часьтын Воркутаын да Печораын. Сэні космоскӧд йитчӧм войскаын виччысьӧны медсясӧ радиотехника да электроника тӧдысьӧс.
Контракт серти служба вылӧ йӧзӧс бӧрйигӧн вӧдитчам 53-ӧд номера федеральнӧй оланпасӧн да военнӧй служба йылысь положениеӧн, кодӧс 1999 вося сентябрь 16 лунӧ вынсьӧдіс Россияса президент. Сэтчӧ пыртісны кутшӧмсюрӧ вежсьӧм. На серти 18 арӧса зон армияӧ мунӧм пыдди 9-11 класс, техникум, училище, колледж да вуз помалӧм бӧрын 2-3 во кежлӧ вермас контракт серти инасьны удж вылӧ.
Талун медсясӧ ышӧдам йӧзсӧ Войвыв флотӧ да Лунвыв военнӧй округӧ.
СВО вылӧ мырдӧн некодӧс оз ыстыны, сӧмын контрактникыслӧн кӧсйӧм серти.
—Кодлы позьӧ кырымавны контрактсӧ?
—18-40 арӧса мужичӧйлы да нывбабалы. Та дырйи нывбаба вермас служитны 50 арӧс тыртӧдз, а мужичӧй — 65-ӧдз, эм кӧ сылӧн армияын зэв колана военно-учётнӧй специальносьт.
Тайӧс во кежлӧ позьӧ вӧчны и суйӧр сайысь воӧмалы, сійӧ кӧ 30 арӧсысь томджык, босьтӧма Россияса гражданство да тӧдӧ роч кыв. Гражданствосӧ татшӧмыслы сетӧны зэв ӧдйӧ.
Но оборона министерстволӧн индӧд серти оз босьтны Кубаса да Сирия араб республикаса войтырӧс, зэв пӧ асныраӧсь да омӧля кывзысьӧны.
Контракт вермасны кырымавны и служитӧм нин войтыр, и найӧ, кодъяс кутшӧм-кӧ помка вӧсна эз ветлыны армияӧ. Та бӧрын мортсӧ ыстӧны куим тӧлысь кежлӧ велӧдчан часьтӧ.
Контракт позьӧ кырымавны и армияын, салдатыс кӧ служитіс нин 11 тӧлысь.
Дерт, бур, мортыс кӧ служитӧма нин армияын да сылӧн эм шогмана специальносьт. Шуам, водитель, стрелок, гранатомётчик, сапёр да с.в. Талун ёна колӧны БПЛА-са (беспилотникса) операторъяс.
Но контракт серти служба вылӧ торъя специальносьт оз и ков. Шуам, гражданскӧй олӧмын кӧ трактористалінныд либӧ шопералінныд, эм В, С да D категорияа право, сідзкӧ, сямманныд веськӧдлыны и БТР-ӧн, КамАЗӧн, «Уралӧн» да танкӧн. Сьылысь, велӧдысь, вӧрын зільысь да мукӧд гражданскӧй профессияа морт вермас инасьны пулемётчикӧн, стрелокӧн да гранатомётчикӧн. Тайӧ «наукаас» быдӧнӧс позьӧ велӧдны тӧлысьӧн.
Ӧкмыс класс бӧрын зонъяс спецоперация дырйи кыпӧдчылісны и отделениеса, и взводса командирӧдз либӧ сійӧс вежысьӧдз. Уналӧн весиг рӧдвужыс, ёртъясыс чуймалӧны, гортас пӧ вӧлі рам да вежавидзысь, а сэні ас бӧрсяыс кыпӧдӧ кось вылӧ верстьӧ мужичӧйясӧс…
—Нывбабаяс вӧзйысьӧны?
—И СВО вылӧ, и странаса мукӧд регионӧ контракт серти босьтӧны сӧмын медикъясӧс.
Гӧгӧрвоана, спецоперация дырйи аньясӧс фронт вылӧ оз ыстыны. Найӧ зільӧны Луганскса, Донецкса больнича-госпитальын. Налы и сэні уджыс тырмымӧн.
Нывбаба вермас и пусьыны-пӧжасьны, связиставны, но лыйсьыны гранатомётысь да пулемётысь некод оз лэдз.
Оз сетны вӧдитчыны и БПЛА-ӧн. Тайӧ зэв сьӧкыд да кывкутана удж. Ӧд, шуам, «Орлан-10» беспилотникӧн веськӧдлысь видзӧдӧ да веськӧдлӧ артиллерияӧн, танкъясӧн да пехотаӧн. И сайӧдын сійӧ пукалӧ фронтсяньыс неылын.
Экономист да мукӧд специальносьта нывбабалы сьӧкыд корсьны войскаын контракт серти уджаланін. Сы вӧсна мый татшӧм должносьтыс кӧ мездмӧ, сэтчӧ старайтчӧны медводз инавны военнӧйлысь гӧтырсӧ, эм кӧ сылӧн шогмана специальносьт.
Неважӧн на нывъяс мунісны контракт серти Новая земля ді вылӧ да Якутияӧ. А таӧдз Тиксиӧ муніс дзонь семья. Батьныс сэні служитіс контракт серти. Татшӧм документ кырымалісны и гӧтырыс да кык пиныс.
—Кодкӧд оз кырымавны контрактсӧ?
—Оз кырымавны татшӧм документсӧ сьӧкыд мыж вӧчыськӧд, тыр арлыдтӧмаӧс мырдӧналыськӧд, нэм кежлас судитӧмакӧд, морткӧд, кодлысь мыжсӧ туялӧ на следствие, да наркотикӧн дурмӧдчыськӧд. Эм торъя кабала, кӧні лыддьӧдлӧма татшӧм войтырсӧ.
Ӧд налӧн сідз нин юрас абу ставыс ладнӧ. Код тӧдас, мый вермасны вӧчны, киас кӧ веськалас автомат. Сэсся и спецоперация вылысь воӧм мысти вежӧрыс дзикӧдз вермас торксьыны.
Судитӧма кӧ вештіс нин мыжсӧ дзескыдінын либӧ пукалӧ на кокньыд мыж кузя, комиссия видзӧдлас, позяс-ӧ сыкӧд кырымавны контракт.
—Дзоньвидзалун боксянь кодкӧд кырымаласны контрактсӧ?
—Комиссия торйӧн донъялӧ мортыслысь дзоньвидзалунсӧ. Босьтасны сӧмын А (годен) да Б (годен с ограничениями) группааӧс. Но позьӧ видлыны и В категорияалы, кодӧс водзті эз быдлаӧ босьтлыны служба вылӧ.
Татшӧмыс кӧ оз нёрпав туберкулёзӧн, ВИЧ-ӧн, В да С гепатитӧн, венерическӧй, вежӧр, сьӧлӧм, кӧвъясян да нӧшта 26 сикас мукӧд висьӧмӧн, военно-врачебнӧй комиссия вермас вуджӧдны Б группаӧ. Тайӧ нёрпалӧмъяссӧ тшӧтш лыддьӧдлӧма торъя документын.
Спецоперация дырйи, кор фронт вылын гӧгӧр грымгӧ-взрывайтчӧ, шутлялӧ свинеч шер, шуам, ранитасны кык салдатӧс.
Санинструкторыслы некор вежлавны-корсьны выль шприц. Овлӧ, кыкнанныслы ӧти шприцӧн лӧньӧдӧны дойсӧ. Сэсся и дойсӧ кӧрталігӧн вирыс вермас резсьыны мӧд мортлы синмас, веськавны дояс да с.в. Та вӧсна висьысьӧс сэтчӧ ыстыны оз позь.
—Дыр-ӧ кежлӧ кырымалӧны кабаласӧ?
—Медводдзаысь кӧ, кык во кежлӧ. Та бӧрын сійӧс позьӧ нюжӧдны ӧти, куим, вит либӧ дас во кежлӧ. Мортыс кӧ служитліс нин контракт серти, вермас пырны уджавны во кежлӧ.
—Ыджыд-ӧ контрактниклӧн удждоныс?
—Контракт — сэтшӧм жӧ сёрнитчӧм, кутшӧмӧс кырымалӧны мукӧд удж вылӧ инасигӧн. Ӧтиладорыс кӧсйысьӧ мыйкӧ вӧчны, а мӧдарладорыс — вештыны таысь удждон. Торъялӧмыс сӧмын сыын, мый контракт серти служитысь ставсӧ вӧчӧ оз ас кӧсйӧм сертиыс, а воинскӧй устав тӧд вылын кутӧмӧн. Таысь ӧтдор тревога серти быд здукӧ сійӧс вермасны ыстыны сбор-учение вылӧ да с.в.
Талун во да дырджык кежлӧ контракт кырымалігӧн оборона министерствосянь тӧлысся удждонысь ӧтдор федеральнӧй бюджетысь быдӧнлы ӧтчыдысь сетӧны 195 сюрс шайт, республикасянь – 300 сюрс. Таысь ӧтдор быд тӧлысь содтӧд мынтӧны 60 сюрс шайт.
Удждоныс унатор сайын. Медводз, дерт, арталӧны звание. Рядӧвӧйлӧн да полковниклӧн удждоныс ёна торъялӧ. Та дорӧ содтӧны, дыр-ӧ мортыс служитӧ (окладсьыс 10-40 прӧчент), кутшӧм сылӧн квалификацияыс (5-39 прӧчент). Тӧд вылӧ босьтӧны и служитанінас поводдясӧ. Кӧдзыд Войвылын, гӧгӧрвоана, удждоныс ыджыдджык (содтӧй 10-100 прӧчент). Содтыштӧны и, шуам, суйӧрсайса кыв тӧдӧмысь, дзоньвидзалун спортӧн ёнмӧдӧмысь да гуся юӧрӧн вӧдитчӧмысь (25 прӧчент).
Пехотасалӧн удждоныс торъялӧ десантын да спецназын служитысьлӧн дорысь. Ӧд найӧ и парашютӧн чеччалӧны и ва увті уялӧны. Таысь кык пӧвстӧн мынтысьӧны.
Воюйтанінын содтӧд мынтӧны сідз шусяна боевӧй сьӧм. Кымын матынджык фронтланьыс, сымын ыджыдджык удждоныс.
А ыстасны кӧ ылыс «пӧсь точкаӧ», вештасны и командировкаысь.
Таысь ӧтдор ӧти восӧ арталӧны кыдз воӧн-джынйӧн. И кызь во служитӧм пыдди пенсия вылӧ позяс петны 13-14 во мысти нин.
Сирияын воюйтігӧн унаӧн сэтчӧ ветлісны буретш контракт серти.
Гӧгӧрвоана, Мурманскын да мукӧдлаын служитӧмысь удждоныс ёна торъялӧ СВО-ын воюйтӧмысь. Шуам, воддзаыслы, рядӧвӧйлы, тӧлысьнас мынтӧны 40 сюрс шайт. Тайӧ быдсикас содтӧдтӧг да коэффициенттӧг.
А спецоперация дырйи татшӧм жӧ должносьталы шӧркодя мынтӧны 204 сюрс, взводса командирӧс вежысьлы — 242 сюрс шайт.
Таысь ӧтдор БПЛА уськӧдӧмысь вичмас 50 сюрс шайт. «Леопард», «Абрамс» танк сотӧмысь вештасны 500 сюрс шайт. А танксӧ кӧ вайӧдан дзоньӧн — сетасны миллион. Ӧтнадлы, дерт, тайӧс вӧчны зэв сьӧкыд. Но взвод кӧ шедӧдас татшӧм «трофейсӧ», миллионсӧ юкасны ставныслы.
—Мыйсяма льгота-кокньӧд эм?
—Эм уна льгота. Удждонысь ӧтдор военнослужащӧйӧс дон босьттӧг могмӧдӧны кӧм-паськӧмӧн, вердӧны казармаса нуръясянінын, сетӧны медицина услуга. Мортыслӧн кӧ помасьӧ нин контрактыс, кӧм-паськӧм донсӧ вермас босьтны сьӧмӧн.
Вичмӧдӧны и служебнӧй оланін, казарма, 4-15 сюрс шайт вештӧны кӧртымалӧм патераысь, отсалӧны субсидияӧн либӧ военнӧй ипотекаӧн. Уна сикас кокньӧд сылӧн и медицина услугаӧн да транспортӧн вӧдитчигӧн, вузӧ велӧдчыны пыригӧн.
Спецоперация вылысь воӧм мысти сетӧны ветеран ним. Контрактник оз вошты и воддза уджаланінсӧ, кад кежлӧ сійӧс мездӧны вот, уджйӧз, кредит вештӧмысь да с.в.
—Тӧдӧмысь, льгота-кокньӧд эм и военнӧйлӧн семьялы?
—Гӧтырыслы да челядьыслы сетӧны сэтшӧм жӧ льготаяс, кутшӧмӧс урчитӧма и мобилизуйтӧмалӧн да ас кӧсйӧм серти спецоперация вылӧ мунӧмалӧн матыссаяслы. Ставыс ылӧсас 60 сикас социальнӧй кокньӧд. Тайӧ уджсӧ ладмӧдӧма зэв бура. И гӧтырыслы да челядьыслы налӧн шыӧдчытӧг урчитӧны став льготасӧ. Та йылысь индӧдыс воӧ социальнӧй ведомствоясӧ, бурдӧдчанінӧ, школаӧ да ясли-садйӧ.
Контрактник семьяысь кагаӧс босьтасны детсадйӧ, школаӧ, кытчӧ сійӧс кӧсйӧ инавны мамыс, мед кӧть кӧні найӧ пропишитчӧмаӧсь. Челядьнысӧ дон босьттӧг вердӧны сад-яслиын, школаын, шойччан да дзоньвидзалун ёнмӧдан гожся лагерын, сідз шусяна продлёнкаын да с.в. Оз ков мынтысьны и техникум-колледжын, профучилищеын велӧдчӧмысь.
Контрактниклӧн олӧма бать-мамлы гортас мӧдас отсасьны соцработник, уна кокньӧд налы лоӧ бурдӧдчигӧн да дзоньвидзалун ёнмӧдігӧн.
—Ен мед видзас Айму дорйысьясӧс, но кодкӧ кӧ ранитчас да доймалӧмсьыс кувсяс?
—Налысь олӧмсӧ страхуйтӧны. Кокньыда ранитчӧмысь мынтӧны 200 сюрс шайт, чорыда кӧ — 500 сюрс. Таысь ӧтдор оборона министерствосянь воас 700 сюрссянь куим миллионӧдз.
Ранитчӧм вӧсна кӧ мортыс оз вермы уджавны, государство вештас 2 миллион шайт. Кувмӧн кӧ мортыс ранитчис, гӧтырыслы да челядьыслы федеральнӧй оланпас серти мынтасны «президентсянь» 5 миллион шайт, нӧшта 3,13 миллион страховка серти да 4,69 миллион оборона министерствосянь. Таысь ӧтдор быд регионын эм асланыс сьӧма отсӧг.
Коми Республикаын контракт серти военнӧй служба вылӧ бӧръян пунктысь инструктор Вячеслав Осипов.
—Вячеслав Владимирович, а нӧшта кутшӧм водзӧс эм контракт кырымалӧмысь?
—Казьтышті эськӧ и военнӧй ипотека. Сійӧс кырымалӧм бӧрын быд во государство мӧдас вештыны 400 сюрс шайт.
Ипотека пыдди позьӧ босьтны и сертификат. Шӧр да лунвыв регионын кызь во зільӧмысь та дыранад мыйта сьӧм ӧкмас! Войвылын сьӧмсӧ позьӧ босьтны 13,5 во мысти нин. Та мындаыд тырмас и патера-керка, му участок ньӧбны странаса уна регионын.
Нӧшта на, водзӧ кӧ мӧданныд уджавны, во-мӧд мысти бара позяс босьтны 400-800 сюрс шайт. И тадзи пенсия вылӧ петтӧдз.
Оз ков вунӧдны и санаторийын шойччӧм-бурдӧдчӧм йылысь. Контракт серти служитысьяс да налӧн матыссаяс пиысь унаӧн нин ветлісны путёвка серти Сереговӧ, Кировӧ да Крымӧ.
Коми Республикаын контракт серти военнӧй служба вылӧ бӧръян пунктӧн веськӧдлысьлысь удж вӧчысь Яков Бутусин.
—Яков Михайлович, Комиысь унаӧн мунісны спецоперация вылӧ? И мый найӧс сэтчӧ кыскӧ?
—Кымынӧн мунісны контракт серти республикаысь, тайӧ гусятор. Но верма висьтавны, мый республикаӧ локтӧны Карелияын, Мурманскын да странаса мукӧд регионын олысьяс да тасянь нин мунӧны контракт серти. Ӧтияс тані чужлӧмаӧсь-быдмӧмаӧсь, а мӧдъяс тайӧс вӧчӧны контракт серти ыджыдджык удждон да сы дорӧ содтӧдъяс вӧсна.
Такӧд йитӧдын дум вылӧ воис Вӧлӧгдаысь тӧдса. Сійӧ босьтӧма кредит, но вештынысӧ выныс да сьӧмыс абуджык тырмӧма. Мортыс локтӧма Комиӧ, миграция службаын кад кежлӧ регистрируйтчӧма, а сэсся кырымалӧма военнӧй служба йылысь контракт. Лючки вештӧма кредитсӧ. Таӧдз сійӧ инспекторалӧма мыж вештӧм бӧрся видзӧдан управлениеын. Во вит мысти мортыс петас пенсия вылӧ. И пенсияыс сылӧн лоас ФСИН-са серти ёна ыджыдджык.
Сёрнитны кӧ военнӧй карьера йылысь, казьтышта Карелияысь Владимирӧс. Спецоперация вылӧ муніс рядӧвӧйӧн, сэсся лоис сержантӧн. Тыш-косьын асьсӧ бура петкӧдлӧмысь сетісны офицер звание. Со тадзи, вуз помавтӧг шӧр специальнӧй тӧдӧмлунӧн, мортыс лоис лейтенантӧн.
Коми правительстволӧн мӧйму январь 10 лунӧ кырымалӧм дасӧд номера индӧд серти СВО вылӧ мунӧмалы сьӧма отсӧг урчитӧма мынтыны 2024 во помӧдз. Но спецоперацияыс кӧ оз на помась тайӧ кадас, индӧдыс лоас вына и водзӧ.
Бӧръявыв казьтышта: контракт серти служба вылӧ мунысьяс надзӧник вежасны мобилизуйтӧмаӧс, медым водзӧ вылӧ армияын уджалісны да Аймунымӧс дорйисны сӧмын контрактникъяс. <>
Николай Размыслов.
Снимокъясыс авторлӧн да ӧтуввезйысь.