Республикаса правительствоӧн веськӧдлысьӧс вежысь Антон Виноградов аддзысьліс журналистъяскӧд да висьталіс регионын экономика, социальнӧй юкӧн сӧвмӧдан инвестицияа уджтасъяс йылысь.
Вице-премьер пасйис, мый Комиын ӧні зільӧны збыльмӧдны Пижмаын титан куйлӧдысь перйӧм мупытшкӧсса озырлун, биару переработайтан да кизьӧртан оборудование вӧчан да мукӧд, тшӧтш и социальнӧй тӧдчанлуна, проект.
Чилимдін районса Пижмаын мупытшкӧсса озырлун переработайтан промышленносьт лӧсьӧдан уджтас воддза юкӧнсӧ олӧмӧ пӧртӧм могысь ковмас 62 миллиард шайт. Чайтӧны, мый тайӧ сьӧмыс инвесторлы бӧр бергӧдчас квайт во мысти нин. Уджтас мӧд юкӧнсӧ кызвыннас веськӧдӧма химия промышленносьт сӧв-мӧдӧм вылӧ. Та могысь ковмас 120 миллиард гӧгӧр шайт.
–Россиялы паныд санкцияяс пыртӧмыс сетіс позянлун ас странаын производствосӧ сӧвмӧдны, – висьталіс Антон Виноградов. – Сідз, Воронеж да Ростов обласьтъясын эмӧсь нин биару переработайтан оборудование вӧчан заводъяс. Татшӧмӧс жӧ мӧвпалам кыпӧдны Сосногорскын.
Сыктывкарса вӧр комплекс кӧ водзті ньӧбліс целлюлозасӧ суйӧр сайысь, ӧні сійӧс вӧчӧм могысь крахмалсӧ вӧзйӧны и Россияса предприятиеясын. Комиын эм позянлун стрӧитны крахмалсӧ картупельысь вӧчан завод.
Санкцияяс пыртӧм бӧрын асланым странаын кутім вӧчны-чукӧртны и гырысь техника. Китайысь инвесторъяс дасьӧсь вичмӧдны сьӧм Сыктывдін районын тягач чукӧртан предприятие восьтӧм могысь.
Сереговса санаторий эштӧдны инвестиция вичмӧдны кӧсйысьыс эм жӧ. Артмас кӧ сёрнитчыны сыкӧд, бурдӧдчанінын выль корпусыс дась лоас 2025 вося воддза джынъяс.
Сюрӧма инвестор и Сыктывкарын аэропорт выльмӧдан уджтас збыльмӧдны. Соколовкаӧ сійӧс оз вуджӧд-ны, йӧзыслы пӧ кивывджык да, кор аэропортыс матын. Республикаса правительствоӧн веськӧдлысьӧс вежысь шуис, менам чайтӧм серти пӧ, медводз лоӧ дзоньталӧма юркарса аэропортысь ӧтар юкӧнсӧ, мӧдыс сэккості кутас уджавны, а сэсся и мӧдсӧ.
–Февраль 28-29 лунъясӧ Сыктывкарын лоӧ нуӧдӧма «Биотопливо России» бизнес-форум, – висьталіс Антон Виноградов. – Воласны сэтчӧ Сибырысь, Войвыв регионъясысь предпринимательяс да сёрнитасны пеллет да пуысь мукӧд сикас ломтас вӧчан бизнес да, торйӧн кӧ, тайӧ уджсӧ котыртысьяслы государствосянь вичмӧдан отсӧг йылысь.
Журналистъяскӧд сёрни помалігӧн Антон Виноградов пасйис, республикаса правительство пӧ зільӧ уджавны регион сӧвмӧдан нырвизьӧ кутчысьӧмӧн. <>
Гижӧдсӧ дасьтіс Павел Симпелев.