Комиын том йӧзлы сиӧм волы кывкӧртӧд вӧчӧма кыпыд чукӧртчылӧм дырйи, кӧні вуз-техникумысь студентъяс, общественнӧй котыръясын водзмӧстчысь ныв-зон дорӧ шыӧдчис регионса юралысь Владимир Уйба.
–Ми вӧчим унатор сы могысь, медым миян республикаын томулов вермисны быд боксянь сӧвмыны, ассьыныс дум-кӧсйӧм збыльмӧдны, ас водзаныс пуктӧм могъяс олӧмӧ пӧртны, – тӧдчӧдіс Владимир Уйба.
Сылӧн висьталӧм серти, пыр унджык ныв-зон водзмӧстчӧны Айму радейтысьяслӧн да чужан му туялысьяслӧн клубъясын, зільӧны поискӧвик отрядъясын.
Регионын 55 сюрсысь унджык доброволеч да волонтёр сетӧны колана отсӧг войнаса ветеранъяслы, челядь-сирӧтаяслы, спецоперацияын тышкасьысьяслӧн семьяяслы. Сюрсысь унджык том морт зільӧ-водзмӧстчӧ студент отрядъясын, Россияса том йӧз союзлӧн регионса юкӧнын.
Республикаысь ныв-зон пуктӧны регион сӧвмӧдӧмӧ тӧдчана пай. 2023 воын налысь 31 проект вылӧ донъялӧмӧн том йӧзлӧн федеральнӧй агентство вичмӧдіс уджтасъяссӧ збыльмӧдӧм могысь сьӧма отсӧг – 19,6 миллион шайт.
Таво гожӧмнас 620 студент ветлісны отсасьны кӧрта-бетона конструкцияяс вӧчан Краснокамскса заводӧ, кӧні уджалысьыс оз вӧлӧм тырмы да, сьӧкыд лоӧма ас кадӧ могмӧдны Емвальын выль школа кыпӧдысьясӧс колана стройматериалӧн.
Регионса правительство зільӧ, медым том йӧзлӧн вӧлі позянлун бура овны-уджавны, прӧст кад пӧльзаӧн коллявны чужан сиктас да карас. Усинскын восьтӧма налы торъя шӧрин, Ухтаын дзоньталӧма том йӧз керка, татшӧмӧс жӧ лӧсьӧдны босьтчӧмаӧсь Сыктывкарын.
2023 воын Комиын том йӧзлы сетӧма позянлун патера ньӧбӧм могысь пырӧдчыны льготаа ипотекаӧ. 150 гозъялы вичмӧма нин татшӧм кокньӧдыс.
Таво республикаса ныв-зонлы нуӧдӧма и уна сикас чукӧртчылӧм-гаж. Сідз, сиктса томулов окотапырысь пырӧдчисны «Ёрт» форумӧ, кӧні велӧдчисны дасьтыны ассьыныс проектъяс да котыртавны уджтасъяссӧ збыльмӧдӧм могысь командаяс.
Водзмӧстчысь томулов «Молодёжное путешествие» выль уджтас весьтӧ ветлісны Мылдін районӧ йӧра видзан фермаӧ, Койгортса национальнӧй паркӧ, пырӧдчисны «Чилимдінса горкаӧ» да «Черинянь гажӧ». Зэв кыпыда колисны страна пасьталаын нималана «Универвидение» да Арктикаса Дельфийскӧй ворсӧмъяс.
Том йӧзкӧд уджыс тӧдчана лоас и локтан воясӧ. 2024 воын муниципалитетъясын налысь уна сикас чукӧртчылӧм-аддзысьлӧм котыртӧм могысь шуӧма вичмӧдны регионса бюджетысь ӧкмыс миллион шайт. Локтан восянь жӧ водзмӧстчысь ныв-зонлы кутасны нуӧдны вит миллион шайта гранта конкурсъяс.
– Тіян зільӧм-водзмӧстчӧм сайын – миян республикалӧн, ставнас страналӧн аскиа луныс. Зумыда восьлалӧй водзӧ! – бурсиис республикаса ныв-зонлы Владимир Уйба.
Гижӧдсӧ дасьтiс Александра Артеева.
Снимокъясыс ӧтуввезйысь.