Октябрь-декабрын Комиын збыльмӧдісны «Молодёжный десант» уджтас. Проектса шӧр могыс – петкӧдлыны регионса томуловлы странаса позянлунъяссӧ.
Медводз экспертъяс ветлісны Сыктыв районса Первомайскӧй посёлокӧ: тӧдмӧдісны сэтчӧс ныв-зонмӧс «Твой ход» томулов котырӧн, «Знание» обществоса платформаӧн да «Росмолодёжь.Гранты» шӧринса конкурсъясӧн. Блогеръяс висьтасисны медиа да контент, психологъяс – профессия бӧрйӧм йылысь.
Школаын велӧдчысьяс да студентъяс ворсӧм пыр видлісны проектируйтчыны, тӧдмасисны Россияса историяӧн, кывзісны медиаграмотносьт серти лекция, тӧдмалісны волонтёр шӧринъяс да уджтасъяс йылысь.
– Ми зілим юӧртны том йӧзлы, мый водзмӧстчӧмӧн налы воссясны ӧдзӧсъяс. Позянлуныс збыльысь зэв уна. Том йӧз вермӧны тӧдмасьны Россияӧн, путешествуйтны, волыны выльлаӧ да отсавны налы, кодлы тайӧ колӧ, – пасйис «Народнӧй фронт» котырса томулов юкӧнын водзмӧстчысь Вадим Лодыгин.
Первомайскӧйӧ кындзи экспертъяс ветлісны Койгортӧ, Ухтаӧ, Воркутаӧ, Интаӧ. Бӧръяӧн специалистъяс тӧдмасисны Изьваса ныв-зонкӧд.
«Образование» национальнӧй проект весьтӧ уджтассӧ пӧртіс олӧмӧ «Знание» обществолӧн регионса юкӧнкӧд ӧтув томуловлӧн ресурснӧй шӧрин. «Молодёжный десант» проектсӧ нуӧдасны водзӧ и 2024 воын.
Коми Республикаса томулов политика комитетысь юӧр серти дасьтіс Ирина Терентьева.
Снимокъясыс котыртысьяслӧн да «5 канал (Инта)» котырысь.