Декабрь 19 лунӧ Москваса ВДНХ-ын «Россия» войтыркостса выставка-форум вылын кыпыд чукӧртчылӧм дырйи нимӧдісны Коми Республика.
Такӧд тшӧтш вӧлі восьтӧма Рытыв-Войвыв федеральнӧй кытшлы сиӧм вежон. И гӧсьтъяс дорӧ чолӧмалана кывйӧн медводз шыӧдчис Рытыв-Войвыв федеральнӧй кытшын РФ-са президентӧс петкӧдлысь Александр Гуцан. Сійӧ тӧдчӧдіс, мый Россияса Рытыв-Войвылын олысьяс гӧрдитчӧны асланыс регионъясӧн, и выставкаса экспозицияяс петкӧдлӧны, мый збыльысь эм мыйӧн ошйысьны.
Ыджыд экрансянь Коми Республикаӧн гӧсьтъясӧс тӧдмӧдӧм бӧрын регионса юралысь Владимир Уйба паськыдджыка висьталіс, кутшӧм вермӧмъяс лои шедӧдӧма миян экономикаын, культураын, социальнӧй да мукӧд юкӧнын, кутшӧмӧн аддзам ми регионлысь аскиа лунсӧ.
Медвойдӧр вӧлі пасйӧма, мый Коми Республика зэв озыр из шомӧн, мусирӧн да биаруӧн, таысь ӧтдор эм и боксит, барит, титан, кварц, зарни, марганец, кӧрт руда да мукӧд, ставсӧ кӧ артыштны, мупытшкӧсса кызь куим сикас озырлун.
Зэв озырӧсь ми и сӧстӧм сынӧда парма-ягӧн. Оз ӧд весьшӧрӧ шулыны республиканымӧс Европаса тыӧн. И эм мыйӧн нимкодясьны миянлы, шуам, «Югыд ва» национальнӧй паркын да Печора-Ылыдзса заповедникын, кӧні вӧр-васӧ да звер-пӧткасӧ оланпас серти шуӧма видзны-дӧзьӧритны.
И быть колӧ казьтыштны Россия пасьталаын нималана да аслыспӧлӧслуннас шензьӧдана из бӧлбанъяс йылысь, кодъяс кыскӧмӧн кыскӧны ас дораныс вӧр-ва радейтысьясӧс да страна пасьталаысь, тшӧтш и суйӧр сайысь туристъясӧс.
Стендъясын ставсӧ тайӧс бура петкӧдлӧма, но, кыдз пасйис Владимир Уйба, быть колӧ волыны миян войвыв республикаӧ, мед ас синмӧн видзӧдлыны да, дерт жӧ, зіль да уджач, восьса оласнога да бур сьӧлӧма йӧзкӧд аддзысьлыны. Буретш найӧ – Коми мулӧн медыджыд озырлуныс, и медвойдӧр на сайын, кутшӧм лоас Коми Республикалӧн да ставнас Россиялӧн аскиа луныс.
Федеральнӧй газет-телевидениеысь журналистъяслӧн юалӧмъяс вылӧ вочавидзигӧн Владимир Уйба тӧдчӧдіс, мый «Россия» выставка-форум вылын, позьӧ шуны, ӧти вевт улын став регионсӧ татшӧм ногӧн чукӧртӧмыс ясыда петкӧдлӧ миян страналысь зумыд ӧтувъялунсӧ. Сэк жӧ быд регион воссьӧ та боксянь аслыспӧлӧса.
Коми Республика вочаалӧ выставка вылас волысьясӧс гортын моз шоныда да нимкодьпырысь ас «коми керкаын».
–Ми ставӧн коркӧ вӧлім ичӧтӧсь. А кӧні колис челядьдырным? Гортын. Миян эм асланым «керка», кӧні ми чужим, кӧні бать-мамным чужисны-быдмисны. И миянлы ставнымлы тайӧ «керкаас» шоныд да бур, – висьталіс Владимир Уйба.
И гортын моз жӧ тані коми кухняын быдӧнӧс чӧскыда вердӧны-юкталӧны. Позьӧ панялыштны азя шыд, чӧсмасьыштны нӧкъя ельдӧгӧн, льӧмъя лязӧн, вотӧса шаньгаӧн, мырпома варенньӧӧн, дерт жӧ, номсасьыштны и кӧр яя пельняньӧн да уна мукӧдторйӧн на, мыйысь, кыдз шуласны, верман кывтӧ ньылыштны.
Владимир Уйба та пӧрйӧ весиг ачыс партукасьліс да вундаліс черинянь, кодӧс сэсся разӧдісны гӧсьтъяслы.
Шензьӧданаӧн вӧлі Москваын олысьяслы да гӧсьтъяслы и Коми Республикаса спортплощадка, кӧні позис видлыны вӧчӧм лым вылӧ сувтлыны вӧралан лызьӧн, а сідзжӧ тӧдмасьны Раиса Сметанина нима спорткомплекслы да регионса Национальнӧй галереяысь лызьӧн ордйысян спортлы сиӧм экспозицияясӧн. Тані жӧ петкӧдлісны зонпоснилы Йиркап йылысь легенда серти снимайтӧм мультфильм.
И лунтыр гӧсьтъясӧс гажӧдісны Комиысь нималана артистъяс. Нимкодьӧдісны, дерт жӧ, «Асъя кыа», «Гуляночка», а сідзжӧ Артемий Барсуков, Владимир Трошев да унаӧн мукӧд.
А нӧшта тані жӧ коми войтырлӧн важся мича да озыр традицияяс вылӧ подуласьӧмӧн ассьыныс кӧлысь ворсісны миян республикаысь Сергей Мишарин да Ассоль Истомина. Налы тайӧ аслыссикас козинсӧ вӧчисны регионса культура министерствосянь. И, дерт жӧ, том гозъя нэм чӧжыс кутасны казьтывны ассьыныс кӧлысь ворсан шудасьыс-шуда лунсӧ.
* * *
Казьтыштам, «Россия» войтыркостса выставка-форум вылын странаса став 89 регионыслӧн экспозицияясӧн тӧдмасьны позьӧ локтан вося апрель 12 лунӧдз. Тавося декабрь 19 лунӧдз сэтчӧ та могысь воліс нин куим миллионысь унджык морт.
<> Гижӧдсӧ дасьтіс Александра Артеева.
Снимокъясыс ӧтуввезйысь.