Локтан воӧ Россияын нуӧдасны том йӧзлысь ставмирса фестиваль.
Комиысь сэтчӧ ветлас нелямын морт, наысь кындзи нӧшта комынӧн кутасны волонтёравны сэні.
Кор фестиваль воссьытӧдз колис 100 лун, странаса президент Владимир Путин эскӧдіс, мый Россия вочаалас гаж вылӧ воысьясӧс меддона гӧсьтъясӧс моз.
Кыдзи юӧртіс «Российская газета», фестивальыс воссяс 2024 вося март 1 лунӧ Сочиса «Сириусын». Воӧма нин 183 суйӧрсайса странаысь гажас пырӧдчӧм йылысь 250 сюрсысь унджык шыӧдчӧм.
–Тайӧ петкӧдлӧ, мый ёртасьӧмысь ыджыдджык выныс абу, – пасйис Владимир Путин.
Президентлӧн видзӧдлас серти, тайӧ висьталӧ и сы йылысь, мый мир пасьталаын пыр унджыкӧн кӧсйӧны тӧдны Россияса историясӧ, традицияяссӧ.
Комиысь том йӧз политика комитетӧн веськӧдлысь Светлана Суворкиналӧн кывъяс серти, регионысь фестиваль вылӧ мунны кӧсйысьяс февраль 4 лунӧдз вермасны шыӧдчыны ӧтуввезса fest2024.com лист бокын, а волонтёравны медасьысьяслы колӧ ноябрь 30 лунӧдз пасйысьны dobro.ru сайтын.
Томуловлӧн ставмирса фестивалькӧд йитӧдын аддзысьлӧмъяс лоасны и регионъясын. Комиын локтан вося март 14-15 лунъясӧ нуӧдасны «Действуй!» гаж, кӧні котыртласны велӧдан, а сідзжӧ культура да спорт программаяс, а республикаысь Сочиӧ ветлысьяс юксясны фестиваль йывсьыс мӧвпъяснас.
<> Гижӧдсӧ дасьтiс Павел Симпелев.
Снимокыс ӧтуввезйысь.