Нёль арӧса внучка Соня вежон чӧж дзайгис-вӧзйысис вуграсьны. И со ми сыкӧд лэччим ю дорӧ. Стӧчджыкакӧ, мевелосипедӧн, а Сонечка багажникын.
Тулыс. Ытва. Шедӧ бадькормык. Сетi внученькалы ичӧтик шатин (гортын унаысь нин репетируйтчим), пысалi сам да чӧвтi юас. Бадькормык дзик пыр и самасис-шедic. Мӧдысь ачыс нин Сонечка шайтыштiс-пысалiс… асьсӧ гачӧдыс.
Коркӧ-некоркӧ артмис жӧ сылӧн шайтасьӧмыс. Чериыс шедас да, шлячкас берегас. Сэсся пуктас шатинсӧ да котӧртӧ черисӧ мездыны вугырсьыс. Чери чеччалӧ-пессьӧ, берегсьыс сёйсӧ да лыасӧ ас вылас кӧвтӧ, а внученькалы гажа!
Но да ладнӧ, процесс пошёл, думайта. Ачым тшӧтш вуграся, но синмӧс пыр Сонялань чӧвтла, мед вывтi оз ышмы да вугырас ачыс оз пысась. Ставсӧ правильнӧ вӧчӧ, а берегын шлёп да шлёп кылӧ, аслас киыс и чужӧмыс нин сёйӧсь.
Ю кузя кывтӧ лӧп-ёг: кер пом, пу вож, тыртӧм сулея. Ытва – ытва и эм.
– Но, кодлӧнкӧ розя ботiыс кылалӧ!
– Абу розя, регыд на батьӧ ньӧбис, – кылiс Сонялӧн гӧлӧс.
Видзӧдлі да, менам чери кыйысьӧй сулалӧ ботi пӧла. Кыдзкӧ-мыйкӧ судзӧдi ботiсӧ шатинӧн:
– Мыйла нӧ ботiтӧ пӧрччин?!
– Эг пӧрччы! Сёйсӧ вӧлi чужъяла да, и пышйис…
А пробка кӧмыд кокньыд, неуна ыджыд на дай, вот и лэбзьӧма.
Но мый вӧчан, ковмис бипур ӧзтыны. Пуксьӧді дзоля морттӧ бипур дорас, кӧмӧдi ассьым носкиӧс, кок улас вольсалі лыс лап. Мися, косьтысь. Сонялысь носкисӧ пожйышті да бедь вылӧ ӧшӧдi. Кыски пажын: калбас да нянь. Калбассӧ бадь вожӧ пысавлі да, бипур вылын сэсся и жаритiм шашлык моз.
– Тэ, Соня, сёйышт, а ме неуна вуграсьышта на…
Юрнас гогнитіс, а недыр мысти, кыла, горзӧ:
– Ымам! Ура! Самолёт лэбӧ!
– Но мед! – ог и бергӧдчыв сылань, этша тай самолёт лэбалӧ, сӧмын тай еджыд визь кольӧны… А зря эг бергӧдчыв!
Чери кыйысьыд менам бадьтӧ носкинас босьтӧма да бипур весьтад и «косьтӧма»: Соня шенасьӧ, носки тшынасьӧ. Дзик быттьӧ самолёт лэбӧ…
Ладнӧ, мый лои – лоӧма.
– Вай, Соня, кага, мунам сэсся гортӧ, ме шатинъястӧ чукӧрта.
Чукӧртi. Вои чери ведраӧдз, а ведра… куш.
– А кӧнi нӧ чериыд, Соня?!
– Ачыд жӧ шуин, ботi тырыд пӧ кыям, вунӧдiн?
Ӧти йӧйыс шуӧ, а мӧдыс сюсьысла вӧчӧ! Татшӧм «чудесаяссьыд» ме челядьтӧ эг видлывлы, да и кыдзи видан?! Колӧ вӧлi аддзывны сылысь шуда синсӧ!
Аржак Ольга.
Серпасаліс Николай Парфентьев.