Комиын октябрь 9-20 лунъясӧ котыртлісны Ичӧт Дельфийскӧй ворсӧмъяс. Вермысьясыс республика нимсянь петкӧдчасны том йӧзлӧн II Арктикаса Дельфийскӧй ворсӧмын. Гажсӧ нуӧдасны тавося ноябрь 20-24 лунъясӧ Сыктывкарын «Культура» нацпроекткӧд йитӧдын.
Печораын
Печораса том артистъяс пырӧдчӧны жӧ Ичӧт Дельфийскӧй ворсӧмӧ. Октябрь 12 лунӧ найӧ петкӧдчисны «Меридиан» клубса сцена вылын. Буретш сэки бӧрйисны медся енбиа ныв-зонсӧ куим нимпас серти: эстрада сьылӧм, йӧзкостса инструментъяс да фортепиано. Донъяліс томуловӧс Сыктывкарысь да Печораысь жюри.
Печора нимсянь петкӧдчисны ӧкмысӧн: Вячеслав Кнутов, Анастасия Ануфриева да Тальяна-Аврелия Филиппова («Досуг» карса котыр, веськӧдлысьыс Лариса Старцева), Милена Левчук, Анна Кудашкина да Мария Белых («Успех» студия, веськӧдлысьыс Наталья Андреева), Славяна Серова, Павел Якушев да Лев Трефяк (Печораса челядьлы искусствояс школа).
–Кольӧм во искусствояс школаысь челядь петкӧдлісны нин енбиалунсӧ Дельфийскӧй ворсӧмъясын. Тайӧ зэв ыджыд гаж да, ми кывкутӧмӧн дасьтысим, – тӧдчӧдіс Печораса искусствояс школаын велӧдысь Анна Бурдельная.
II Арктикаса Дельфиийскӧй ворсӧмъяс кежлӧ дасьтысьӧм могысь октябрь 27 – ноябрь 5 лунъясӧ вермысьясыс воласны Сыктывкарӧ енбиа томуловлы академияын котыртӧм творчествоа сменаӧ.
Усинскын
Усинскын Ичӧт Дельфийскӧй ворсӧмъяс панісны «Город милый» сьыланкывсянь. Вой кытшбердса карлы сиӧм тайӧ сьыланнас нимкодьӧдісны Усинск культура дворечысь войтыр.
II Арктикаса Дельфийскӧй ворсӧмлӧн регионса тшупӧдӧ бӧрйӧм могысь конкурсантъясӧс кывзісны-видзӧдісны октябрь 11 лунӧ. 53 том артист петкӧдчис эстрада сьылӧм да йӧзкостса йӧктӧм нимпасъясын.
Ныв-зон пӧвстын вӧліны Коми Республикаса татшӧм котыръяс: «Росинка» да «Хрусталик» ансамбльяс, «Фьюжн» йӧктан студия, а сідзжӧ Усинскса культура дворечын сьылысьяс Милана Дядченко да Дарья Антонова.
«Росинка» ансамбль шедӧдӧма «Щелкунчик» национальнӧй телевизионнӧй йӧктан премия да культура-искусствоын «Будущее России» национальнӧй премия. 2020 восянь котырсӧ пыртӧма йӧктӧм кузя UNESCO войтыркостса сӧветӧ.
Кольӧм во I Арктикаса Дельфийскӧй ворсӧмын «Хрусталик» ансамбль йӧзкостса йӧктӧм нимпасын шедӧдӧма эзысь медаль. А 2023 воын Москваын тайӧ жӧ нимпасын лои «Щелкунчик» национальнӧй премияса I степеня лауреатӧн.
«Фьюжн» челядь студия 2007 восянь войтыркостса да регионъяскостса быдсяма конкурс-фестивальын вермысьяс лыдын.
Милана Дядченко – «Берегиня» роч сьыланкыв ансамбльын солистка. Кольӧм во эстрада сьылӧмын шедӧдӧма бронза медаль I Арктическӧй Дельфийскӧй ворсӧмъясын. Дарья Антонова – «М-арт» студияын сьылысь. Таво «Вершина таланта» войтыркостса конкурс-фестивальын босьтӧма I степеня лауреатлысь диплом.
Воркутаын
Ичӧт Дельфийскӧй ворсӧмъясӧ конкурсантъясӧс Воркутаын бӧрйисны куимлаын: искусствояс колледжын, челядьлы карса музыкальнӧй школаын да шахтёръяслӧн культура дворечын. Пырӧдчис 60 сайӧ морт.
Конкурсантъясӧс донъялісны вит нимпас серти: фортепиано, скрипка, йӧзкостса инструмент, йӧзкостса йӧктӧм да эстрада сьыланкыв.
Та кындзи художествоа школаӧ ветлысь челядь заочнӧя пырӧдчисны «Изобразительное искусство» да «Фотография» номинацияӧ. Воркутаса политехническӧй техникумысь студентъяс петкӧдчасны II Арктикаса ворсӧмын «Кулинарное искусство» нимпасын.
Конкурсантъясӧс донъяліс пыдди пуктана жюри: регионса культураын да искусствоын зільысьяс, искусствояс колледжын да челядьлы шылада школаын, республикаса искусствояс гимназияын велӧдысьяс, а сідзжӧ шахтёръяслӧн культура дворечысь «Арта» сьылан котырса хормейстер Ирина Ларионова да Воргашорса культура керкаӧн веськӧдлысь Елена Быкова.
–Дасьтысим ми водзвыв. Дасьтыны петкӧдчӧмсӧ ме заводиті нин августсянь. Сцена сайын ӧта-мӧдӧс ышӧдім, отсасим, и тайӧ зэв ёна отсаліс, – висьталіс «Арта» студияын сьылысь Анна Мухина.
Кывкӧрталісны Сыктывкарын
Ичӧт Дельфийскӧй ворсӧмлысь медбӧръя тшупӧдсӧ нуӧдісны Сыктывкарын. Енбиа томуловӧс донъялісны Коми Республикаса филармонияын, Я.С.Перепелица нима челядьлы Сыктывкарса шылада школаын, искусствояс гимназияын да искусствояс колледжын, Эжваса культура дворечын да «Сыктывкар» концертасян жырйын.
Ӧти лунӧн 270 том артист петкӧдлісны кужанлун-сямсӧ фортепиано, скрипка, йӧзкостса инструмент, эстрада да йӧзкостса сьылӧм, йӧзкостса йӧктӧм нимпасъясын. Карса томулов кындзи петкӧдчисны и Кӧрткерӧс, Княжпогост, Удора да Кулӧмдін районъясысь ныв-зон.
Енби-сямӧн нимкодьӧдісны «Шонді», «Метелица» йӧзкостса ансамбльяс, «Асъя кыа» ансамбль бердын национальнӧй студия, «Дружба» сьылан-йӧктан ансамбль, «Сигудӧкысь» артистъяс, «Отрада» да «Росинка» йӧктан котыръяс, а сідзжӧ «Пелысь мольяс» йӧзкостса котырысь артистъяс.
* * *
Ичӧт Дельфийскӧй ворсӧм – искусствоын ыджыд форум. Сійӧс котыртӧма енбиа томуловӧс нимӧдӧм-корсьӧм могысь. Конкурс-фестиваль уджтасӧ пыртӧма художествоа, наукаын туясян да прикладнӧй нимпасъяс.
Таво Ичӧт Дельфийскӧй ворсӧмъяс котыртлісны Микуньын, Ухтаын, Усинскын, Печораын, Воркутаын, Интаын, Визинын да Сыктывкарын.
Томуловлӧн I Арктикаса Дельфийскӧй ворсӧм муніс Сыктывкарын 2022 вося ноябрын. Сэтчӧ пырӧдчис 600 сайӧ енбиа ныв-зон.
Таво II Арктикаса Дельфийскӧй ворсӧмыс лоас ноябрь 20-24 лунъясӧ Сыктывкарын.
Гажсӧ котыртысьяс – культура да архив удж кузя Коми Республикаса министерство, йӧзкостса творчество да сям кыпӧдан шӧрин.
<> Дасьтіс Екатерина Микушева.
Снимокъясыс ӧтуввезйысь.