Пожӧг вожын он кыв рочасьӧм, тані сёрнитӧны сӧстӧм коми кывйӧн. Мам кыв сӧвмӧдӧны садсянь. Кекурса нывкаяс да зонкаяс Ирина Дмитриевна Шахова воспитателькӧд енбиалунӧн дзирдалӧны оз сӧмын районын, но и республикаын. Вермысьяс лыдын «Василёчек», «Добрая дорога детства» районса конкурсъясын, «Шуда челядьдыр» республикаса фестивальын, «Безопасность глазами детей» районса да республикаса конкурсъясын. Петкӧдчӧны «Дзолюк» петас дасьтысьяслӧн «Олам Комиын – сёрнитам комиӧн», «Ми некор ог вунӧдӧй тіянӧс», «Ми серпасалам шонді», «Миян шуда челядьдыр», «Мамуклы ме сиа» уджтасъясын да мукӧдлаын. Коми кывбуръяссӧ корсьӧ небӧгъясысь, сьыланкывъяссӧ рочысь вуджӧдіс да гижис садйын водзті шылад велӧдысь Нина Александровна Мартюшева, талун тайӧс вӧчӧ шылад велӧдысь Кристина Юрьевна Шварлиц.
Ирина Дмитриевна Сыктывкарса педучилище помалӧм бӧрын ӧтлаын велӧдчысьяскӧд муніс Сыктывкарса университетӧ, шуисны лоны логопедъясӧн. Сдайтіс экзаменъяс, ӧти сайын карысь корсис удж. Но сьӧлӧмыс кыскис чужанінас, Кекурӧ. Буретш садйӧ коліс воспитатель. И кольччис.
–Сентябрын звӧнитіс нывъёртӧй, став пиысь пӧ ӧтнад вермин пырны университетӧ. Мукӧдыс велӧдчисны вештысьӧмӧн. Збыльвылас кӧ, ме сэки «пӧті» нин велӧдчӧмсьыс, кӧсйи уджавны. Сідзкӧ, тайӧ коліс водзӧ олӧмын, велӧдчи уджысь орӧдчывтӧг, – казьтыліс Ирина Дмитриевна.
Медводдза уджалан воӧ садйын вӧлӧма арӧсӧн-джынйӧнсянь сизимӧдз 26 челядь. Юрас кутчысьліс, кыдзи ӧти кадӧ та мындаыслы сетны тӧдӧмлун. Ӧд практика дырйи уджаліс сӧмын ӧти арлыда челядя группаын, а тані ӧтпырйӧ вит арлыда. Кыдз шуласны, синмыд пӧ полӧ, а киыд вӧчӧ.
Ӧтлаын уджалысьяс да бать-мам отсӧгӧн веніс став сьӧкыдсӧ. Кӧть и сьӧкыд, но бурыс сыын, мый гырысьяс вылӧ видзӧдӧмӧн водз сӧвмӧны дзоляясыс. Ошкис бать-мамсӧ, и отсасьӧны, и пырӧдчӧны садйӧн нуӧдан быд уджӧ.
Талун садйӧ котралӧ 11 нывка да зонка. Таво локтіс кык дзолюк, школаӧдзса арлыдаыс куим кага. Волывлӧны ставныс, кӧть и эмӧсь уджавтӧм бать-мам, гортын пӧль-пӧч, сӧмын пӧ висьӧмъясыд падмӧдлӧны. Ирина Дмитриевна содтӧд тӧдӧмлун босьтӧм могысь видзӧдӧ вебинаръяс, дистанционнӧя кыпӧдӧ сям быдсикас курсын, ветлӧ семинаръяс вылӧ. И уджӧ век пыртӧ выльтор. <>
Марина Дадашова.
Снимокыс Ирина Шаховалӧн гортса архивысь.