«Демография» нацпроект серти нӧбасьысь аньяслы да морӧснас кагасӧ вердысь судзсьытӧма олысь мамъяслы сетӧны сёян-юан ньӧбӧм могысь сьӧм.
Нӧбасьысь аньяслы быд тӧлысь вичмӧдӧны 1.000 шайт, та дырйи оз видзӧдны, ыджыд-ӧ семьяыс да тырмымӧн-ӧ нажӧвитӧны сэн сьӧмсӧ, дыр-ӧ олӧны Комиын да кымын налы арӧс. Тавося ӧкмыс тӧлысьӧн тайӧ отсӧгсӧ босьтісны 5.543 ань, республикаса бюджетысь та могысь вӧлі торйӧдӧма 23 миллион гӧгӧр шайт.
Судзсьытӧма олысь мамъяслы сёян-юан ньӧбӧм могысь тӧлысьнас сетӧны 703 миллион шайт.
Нацпроект серти жӧ ылі районъясын олысь нӧбасьысь аньяслы мынтӧны бурдӧдчанінӧ ветлӧмысь ӧтарӧ-мӧдарӧ туйсӧ. Оланпасъясын урчитӧма больничаяссӧ: Коми Республикаса перинатальнӧй шӧрин, кардиодиспансер, Ухтаса да Воркутаса кага чужтан керкаяс, Ухта карса поликлиника. Оланпасъясын индӧма и ылі районъяссӧ – Вуктыл, Изьва, Чилимдін, Удора, Мылдін да нӧшта 13 муниципалитетысь 140 гӧгӧр сикт-посёлок.
Нӧбасьысь аньяслы мынтӧны бурдӧдчанінӧдз автобусӧн, поездӧн, теплоходӧн воӧдчӧмысь, а рӧспута дырйи и самолётӧн лэбӧмысь. Ас машинаӧн ветлігӧн вештӧны урчитӧм мында сьӧм.
Во заводитчӧмсянь туйысь рӧскодсӧ босьтӧма нин 743 нывбаба, республикаса бюджетысь та вылӧ веськӧдӧма 2,4 миллион шайт. <>
Гижӧдсӧ дасьтiс Павел Симпелев.
Снимокыс ӧтуввезйысь.