Сыктывкарса университетын нимӧдісны медицина институт медводдза помалысьясӧс. Диплом босьтіс 50 морт, на пӧвстысь витыслӧн — гӧрд.
Медицина институтсӧ университетын восьтісны 2014 воын Кировса медицина академиялӧн подув вылын. И со квайт во мысти медводдза выпускникъяс петісны асшӧр олӧмӧ.
—Бурдӧдан юкӧн талун сӧвмӧ ыджыд ӧдӧн. И некод весиг оз куж висьтавны, мый вежсяс медицинаын дас во мысти. Медым восьлавны олӧмыскӧд тшӧтш, тіянлы нэм чӧжныд ковмас велӧдчыны выльӧ, содтыны сям-кужӧмлунтӧ, — пасйис чолӧмалана кывйын Коми Республикаса дзоньвидзалун видзӧм кузя министр Дмитрий Березин. — Сиа тіянлы лоны йӧз дорӧ сибыдӧн, висьысьлысь дой гӧ-гӧрвоысьӧн, бур сьӧлӧмаӧн, ӧд татӧг врачлы некыдз.
Сыктывкарса университетын ректорлысь удж вӧчысь Ольга Сотникова казьтыштіс, мый студент-медикъяслы ковмис велӧдчыны ӧти стрӧйбасянь мӧдлаӧ вуджӧмӧн. Ӧти кадӧ весиг юркарысь Бабушкин уличаса 11-ӧд номера керкаын пукалӧмаӧсь, карса вӧвлӧм роддом стрӧйбаын, кӧні кодкӧ ачыс на чужлӧма.
—Кута лача, тайӧ стрӧйбаыс (Старовский уличаса 55-ӧд номера керка) матысса воясӧ лоӧ ставнас медицина институтлӧн. Медым студентъяслӧн вӧлі унджык позянлун сӧвмыны, содтыны тӧдӧмлун бур оборудование-эмбура жыръясын, — висьталіс Ольга Сотникова. — А велӧдысьяс да велӧдчысьяс миян збыльысь тӧлкаӧсь да водз-мӧстчысьӧсь. Коркӧ Ульяновск-са мединститутысь ректоркӧд сёрниӧ воим да, сійӧ висьталіс, мый вузас быд во котыртлӧны бурдӧдысьӧ велӧдчысьяслы конкурс, да корис Сыктывкарса студентъясӧс видлыны вынсӧ тшӧтш. И тӧданныд: миян студентъяс бергӧдчисны Ульяновскысь нёль нимпасын вермӧмӧн! Номинацияыс вӧлӧма вит, сӧ-мын миян ныв-зон витӧдас абу пырӧдчӧмаӧсь.
Комиын врачьяслӧн ассоциацияӧн юрнуӧдысь Вячеслав Сварич тшӧтш ошкис регионын дасьтӧм специалистъясӧс. Сійӧ сиис мединститут помалысьяслы медвойдӧр дзоньвидзалун.
—Дзоньвидзалуныс тіянлы ковмас штанга лэпталысь тяжеловесъяслы мында: ӧд ковмас и войнас корӧм серти висьысьяс дорӧ ветлыны, и отпускалігӧн отсӧг сетны, — кывкӧрталіс Вячеслав Сварич.
Дерт, диплома выль специалистъяслы бур кывъяс висьта-лісны и вузын налы тӧдӧмлун сетысьяс. Ӧти на пӧвстысь шмо-нитыштіс, ми пӧ вӧчим ас пайысь ставсӧ, медым университет помалігӧн ті эн шуӧй, мый ве-лӧдчынысӧ вӧлі кокни.
Та бӧрын томуловсянь юргис медицинаын уджалысьлӧн клятва. Кутам лача, водзӧ олӧмас найӧ пыдди пуктасны тайӧ кӧс-йысьӧмсӧ да нэм помӧдзыс мӧдасны колана здукӧ мыччыны висьысьлы отсӧга ки.
Елена Плетцер.
Снимокыс республикаса минздравлӧн.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.