Том йӧзлӧн лунлы сиӧмӧн, а сідзжӧ Усинск карлӧн да республикаса мусир перъян промышленносьтлӧн юбилейяскӧд йитӧдын восьса енэж улын кыпыд гаж котыртліс «ЛУКОЙЛ-Коми» ООО.
Карсянь неылын вӧрса паськыд эрд вылын вӧлі лӧсьӧдӧма ин-терактивнӧй да ворсан зонаяс, челядьлы аниматора площадка, фудкорт. Физкультура да спорт радейтысьяслӧн вӧлі позянлун орд-йысьны волейболын да футболын.
–Ставыс воис сьӧлӧм вылӧ! Зэв уна конкурс котыртӧма челядьлы да том йӧзлы, но и олӧмаяслы эм жӧ мый вӧчны тані, – нимкодьпырысь висьталіс Усинск карын олысь Галина Воробьёва. – Ми локтім татчӧ шойччыны став семьяӧн, зілям пырӧдчыны быдсикас конкурс-ордйысьӧмӧ, сэн и тан сэтшӧм гажа да! Ме эг вермы кутчысьны да исковті-журкниті ватрушкаӧн. А сэсся смелмӧдчи да сцена вылӧ на петалі, конкурсӧ пырӧдчи и босьті приз! Ыджыдысь-ыджыд аттьӧ татшӧм мича кыпыд гажсӧ котыртысьяслы!
Праздник дырйиыс спорт ордйысьӧмъясын вермысь командаяслы козьналісны 90 сюрс шайт дон сертификатъяс.
Пасйисны и медся ёна водзмӧстчысь-гажӧдчысьясӧс. Налы вичмисны телевизоръяс, аудиоколонкаяс, наушникъяс да уна мукӧд приз.
Снимокъясыс «ЛУКОЙЛ-Коми» ООО-лӧн пресс-службаысь.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.