«Навигаторы детства»: кодлы, кӧні да кутшӧм могъяс
Тавосянь Коми Республикаын збыльмӧдӧны «Навигаторы детства» проект: сентябрсянь регионса школаясын заводитісны уджавны директор сӧветникъяс.
Странаын збыльмӧдӧны «Образование» национальнӧй проект, кытчӧ пырӧны ичӧтджык – федеральнӧй – проектъяс, на лыдын и «Патриотическое воспитание граждан Российской Федерации» уджтас. Тайӧ уджтасас и пырӧ «Навигаторы детства».
– 2021 воын проектас пырӧдчис 10 регион, 2022 воын – нӧшта 35 субъект. Медводз регионъясыс петкӧдлісны бур результат: чиніс челядь пӧвстын мыж вӧчӧм, дӧзьӧртӧмлун. Ныв-зон пырӧдчисны творчествоа да спортивнӧй котыръясӧ… Со и вӧлі шуӧма уджтассӧ паськӧдны водзӧ. Сентябрь 1 лунсянь тайӧ проектас пырӧдчисны Россияса мукӧд регионыс, на лыдын и Коми Республика. Таво сӧветник должносьтсӧ Комиын пыртісны 186 школаын, – висьталіс «Росдетцентр» шӧринысь методист Андрей Терентьев.
Ӧнія кадӧ школаын велӧдчысьлы лӧсьӧдӧма уна котыр, кытчӧ быдӧн вермӧ пырӧдчыны: «Юнармия», «Орлята России», «Движение первых», волонтёр нырвизьяс… Сӧветниклӧн уджыс котыртан: сійӧ йитӧ став нырвизьсӧ, челядьлӧн общественнӧй котырсӧ, уджалӧ и воспитайтан юкӧнысь педагогъяскӧд, и ныв-зон бать-мамкӧд. Сійӧ навигатор моз петкӧдлӧ туй-позянлунъяссӧ.
Медым лоны сӧветникӧн, колӧ прӧйдитны конкурс: медводз ыстыны портфолио, сэсся петкӧдлыны тӧдӧмлун-сям тест дырйи да собеседование вылын. Та бӧрын сійӧс велӧдӧны «Росдетцентр» шӧринса заочнӧй курсын. Сійӧс прӧйдитӧм бӧрын сетӧны вермысьлысь диплом да велӧдчӧмысь сертификат. Тайӧ документъясӧн позьӧ инасьны удж вылӧ. Сӧветник ӧтпырйӧ уджалӧ и школаын, и эксперталӧ «Росдетцентрын». Сійӧс, кыдз экспертӧс, донъялӧ-туйдӧ «Росдетцентрлӧн» регионса юкӧн, а кыдз сӧветникӧс – школаса директор.
Сӧветник видзӧдӧ, мыйын бурыс, а мыйын тырмытӧмторйыс воспитайтан тэчасас. Вермӧ мыйкӧ вежны, вӧзйыны. Воспитайтан программаӧ – «Новая философия воспитания» уджтасӧ – вежсьӧмъяссӧ пыртӧ школаса воспитатель штабкӧд ӧтув.
– Сӧветникъяскӧд, педагогъяскӧд, челядькӧд да бать-мамныскӧд кутам збыльмӧдны проектъяс. Шуам, таво лӧсьӧдчам пӧртны олӧмӧ «Добрые уроки для родителей» добровольчество сӧвмӧдан уджтас, школаса медиацентръясын водзмӧстчысьяслы «Точка притяжения» велӧдан программа, – пасйис регионса ресурс шӧринӧн веськӧдлысь Ольга Залевская.
Быд муниципалитетын эм сӧветникъяслысь уджсӧ курируйтысь морт. 1 координатор веськӧдлӧ 10 школаын, но мукӧд муниципалитетас школаыс этшаджык, та вӧсна и кӧнсюрӧ 1 морт веськӧдлӧ кык районын. Шуам, Интаын да Усинскын – ӧти координатор, а Сыктывкарын – кык, ӧд школаыс тані уна. Сӧветникъясӧс туйдӧны муниципальнӧй координаторъяс, найӧс – регионса ресурс шӧрин, а шӧринса кывкутӧ «Росдетцентр» водзын.
– Водз на вӧчны кывкӧртӧдсӧ, ӧд медводдза результатъясыс лоасны во мысти на сӧмын. Ӧні ми ладмӧдам тайӧ уджсӧ. Воспитайтӧм – велӧдчӧмын зэв тӧдчана юкӧн. И бур, мый тайӧс казялісны! – тӧдчӧдіс Андрей Терентьев. – Уджтас збыльмӧдан шӧр могыс – страна пасьтала воспитайтны челядьсӧ ӧтмоза. Миян республика зэв аслыспӧлӧс, тані уна енбиа ныв-зон да пыді мывкыда велӧдысь. Чайтам, проектсьыс водзӧсыс миян регионын лоас зэв ыджыд!
«Росдетцентр» шӧринсӧ лӧсьӧдісны 2016 воын «Новая философия воспитания» уджтас збыльмӧдӧм могысь. Веськӧдлӧ шӧриннас Россияса минпросвещение.
Дасьтіс Ирина Терентьева
Снимокъясыс «Навигаторы детства» да рдш.рф сайтъясысь.