Санкт-Петербургын мини-футбол кузя Россияса чемпионатын «Ухта» кыкысь паныдасьліс сэтчӧс «Кристаллкӧд» да кыкнанысьсӧ вермис.
Воддза ворсӧмыс помасис 4:9 тшӧтӧн. Медводдза таймас вермисны петербургсаяс. Миян республикаса командаын зілисны Лукас Педала да Андрей Павлов. Кост бӧрын ухтасаяс сюйисны нӧшта сизим гол. Водзмӧстчисны Фелипе Парадински, Рафаэл Бруно, Андрей Павлов да Максим Перевалов. «Кристаллысь» Максим Коновалов сӧмын ӧтчыдысь стӧча веськаліс миян воротаӧ.
Мӧдысьнас Ухтаса команда вермис 7:3 тшӧтӧн. Медводдза таймас голъяс сюйисны Андрей Павлов, Артур Мелконян да Кирилл Щурок. Шойччыштӧм бӧрын Фелипе Парадински кыкысь да Рафаэл Бруно ӧтчыдысь стӧча чужйисны «Кристалл» воротаӧ. Петербургса командаысь Павел Соколов, Давид Колбаия да Артём Лебедев сюйисны миянлы куим гол. Но Лукас Педала ыстіс «Кристалл» воротаӧ сизимӧд мач.
Сыктывкарын «Новая генерация» кыкысь жӧ ворсіс Улыс Новгородса «Торпедокӧд». Ӧтчыдысьсӧ миян футболистъяс ворссисны 0:1 тшӧтӧн. Дзик ӧти мачсӧ новгородсаяс сюйисны медводдза тайм помас. Миян спортсменъяс некымынысь вермисны косӧдны водзӧс, но…
Мӧдысьнас некод жӧ эз вермы. Ворсӧм бӧрас таблоас ӧзйис 3:3. Нёльӧд минутас гол сюйис Даниил Ковтун, но тайм помас гӧсьтъяс ӧткодялісны тшӧтсӧ. Кост бӧрын 25-ӧд минутын Иван Суворов бара петкӧдіс водзӧ сыктывкарсаӧс, но Улыс Новгородса футболистъяс бара косӧдісны водзӧс. 29-ӧд минутын Геворг Мнацаканян стӧча веськаліс «Торпедо» воротаӧ, но ворсӧм помланьыс гӧсьтъяс бара вӧтӧдісны миянӧс.
Стӧчджыка пенальти чужъялісны «Новая генерацияса» футболистъяс да 4:3 тшӧтӧн вермисны. Сыктывкарса командалӧн кык, а Улыс Новгородсалӧн ӧти очко.
–Мӧд ворсӧмас миян футболистъяс петкӧдчисны бурджыка. Ворсісны скӧрысьджык да, гоз-мӧдысь сорсьылісны, но ворсігад быдторйыс овлӧ. Кыкнан командаыс зілис вермыны, но шудыс усис миянлы. Позьӧ вӧлі вермыны и пенальтитӧг, ӧтчыдысь миян команда вермис сюйны гол тыртӧм воротаӧ, – висьталіс «Новая генерацияысь» главнӧй тренер Алексей Степанов.
Сентябрь 22-23 лунъясӧ «Ухта» гортас вермасяс Новосибирскса «Сибиряккӧд», а «Новая генерация» Тюменьын паныдасяс сэтчӧс «Тюменькӧд».
<> Николай Размыслов.
Снимокъясыс ӧтуввезйысь.