Выльлунӧ Коми Республикаса канму служба да веськӧдлыны велӧдан академияын восьтісны медиастудия.
2020 восянь на велӧдчанінас босьтчӧмаӧсь вӧчны видеосюжетъяс, кӧні петкӧдлӧмаӧсь академияын олӧмсӧ, тӧдчана лоӧмторъяссӧ. Мӧд вонас студентъяс збыльмӧдӧмаӧсь «Real talk» уджтас, снимайтӧмаӧсь велӧдысьяскӧд да ас коддьӧм жӧ велӧдчысьяскӧд сёрни-интервью. А нӧшта во мысти пырӧдчӧмаӧсь вузъяскостса «Worldskills» чемпионатӧ. Дас вит морта котыр дасьтӧма реклама петасъяс.
–Миян академия зільӧ пыртны велӧданногӧ наука, образование юкӧнъясысь став выль нырвизьсӧ, и медиастудия восьтӧмыс лоис водзӧ нӧшта ӧти воськолӧн, – висьталіс академияса ректорлысь удж вӧчысь Сергей Ткачев. – Сійӧ отсалас миянлы збыльмӧдны выль велӧдчан программаяс, гранта уджтасъяс, а студентъяс вермасны сӧвмӧдны юӧр сетан юкӧнын сям-кужӧмсӧ.
А татшӧм кужӧмлуныс веськӧдлан тэчасын уджалысьяслы ӧні зэв колана.
–Зэв тӧдчана воськов лои вӧчӧма, ӧд йӧзыслы колӧ бура да тырвыйӧ гӧгӧрвоӧдны власьт тэчасса индӧдъяссӧ, – пасйис регионӧн веськӧдлан шӧринӧн юрнуӧдысь Евгений Зелинский. – Бӧръя вонас миян шӧринӧ воліс 60 сайӧ шыӧдчӧм, да казялім: тшӧкыда тырмымӧн висьтавны йӧзыслы, мый вӧчӧ государствоыс. Та вӧсна академияса студентъяс, кодъяс сэсся лоасны веськӧдлысьясӧн, мӧдасны кужны тайӧс вӧчны.
Медиастудияын буретш зілисны мӧд курсын велӧдчысьяс Полина Барабанова да Борис Илатовский. Уна сикас техника-компьютер удж бӧрся видзӧдісны Сергей Мишарин да Ассоль Истомина – найӧс студентъяс ас костаныс меліа шуӧны Ассольӧн да Грейӧн, нимныс ӧта-мӧдыскӧд зэв нин лӧсялӧ да.
Полина окотапырысь тӧдмасьӧ медиа юкӧнын уджӧн, сӧвмӧдӧ ассьыс сямсӧ. Тані пӧ позьӧ велавны и аслыд лӧсьыда сёрнитны йӧз водзын, и интервью босьтны. Сідзжӧ сійӧ диджеялӧ «Европа Плюс» радиоын. А нӧшта Полина Барабанова – том йӧзлӧн Россияса котырысь Комиын юкӧнӧн веськӧдлысьӧс вежысь.
–Став тайӧ уджыс йитчӧма том йӧзкӧд, – шуис Полина. – И быдлаын ме босьта аслым выль тӧдӧмлун.
Академия таво шедӧдӧма Коми Республикаса юралысьлысь социальнӧй тӧдчанлуна кык грант – «Будущее за молодёжью» да «Марафон победителей Севера».
–Воддза грант сертиыс ми октябрын нин чукӧртам кар-районысь томуловӧс, школаын велӧдчысьясӧс да кутам тӧдмӧдны найӧс медийщик уджӧн, петкӧдлам, кыдзи колӧ вӧдитчыны студияса оборудованиеӧн, – висьталіс академияса пресс-службаӧн веськӧдлысь Анна Лушкова. – А мӧд грантас шуӧма нуӧдны уджсӧ муниципалитетъясын. Ми асьным мӧдам ветлыны республикаса кар-районӧ да сэні велӧдны том войтырӧс мич
аа гижны-сёрнитны. Быдмысь войтыр дасьтасны Айму вӧсна Ыджыд тышса, торъя военнӧй операцияса ветеранъяс йылысь сюжетъяс, а бӧрас йӧзӧдам найӧс ӧтуввезйын. Видзӧдасны сюжетъяссӧ и «Разговор о важном» урокъяс дырйи.
Грантъяссӧ кутасны збыльмӧдны регионын экономика сӧвмӧдан, промышленносьт да транспорт министерствокӧд ӧтув.
–Медиастудиясӧ восьтӧма Томулов воӧ, и сэтчӧ кутасны волыны найӧ, кодъяслы сьӧлӧм сертиыс тайӧ уджыс. Бур туй тіянлы, – сиис студентъяслы министерствоысь юкӧнӧн веськӧдлысь Наталья Савельева.
<> Павел Симпелев.
Снимокъясыс Ассоль Истоминалӧн.