Нэмтӧ ов да нэмтӧ велӧдчы!

Сентябрь 1 лунӧ кодлыкӧ школаын триньӧбтіс медводдза урок вылӧ медводдза звӧнок. Кодкӧ медводдзаысь воськовтіс колледж-университет порог. Кодкӧ медводдзаысь петіс дӧска дорӧ велӧдысьӧн. Кодкӧ медводдзаысь вайӧдіс велӧдчанінӧ ныв-писӧ.

Помнита, детсадйысь петігӧн миянлы козьналісны тетрадь-альбома да карандаш-ручкаа ыджыдіник папка, да виччысьӧмӧн виччыси сентябрь 1 лунсӧ. Школаӧ ме муні квайт арӧсӧн, и эг первой классӧ, а нулевӧйӧ. 1970-1980 воясас матӧ быд школаын вӧлі татшӧмыс.

Радейті тайӧ лунсӧ и гырысь классын велӧдчигӧн. Школаын новлан выль платтьӧ, выль еджыд партук, выль портфель… И дзоридза букет. Стӧчджыка кӧ, быдса вит букет! Ӧд семьяын ми быдмим витӧн. Чайтсис весиг, мамным быдтӧ дзоридзсӧ буретш сентябрь 1 лун кежлӧ. Школаысь бӧрсӧ волім выль учебникъясӧн да рытывбыд эжлім найӧс шпалерӧн.

Велӧдчынысӧ радейті. Радейттӧм предметыс весиг эз вӧв. Вӧліны помӧдз гӧгӧрвотӧмъяс, но аслысногӧн радейті ставсӧ. Шуам, сьӧкыда сетчис история. Но сійӧс велӧдысьыс – Николай Дмитриевич Майбуров – воис сьӧлӧм вылӧ, та вӧсна урок вылас ветлі окотапырысь.

Химиясӧ эг гӧгӧрво, но практика дырйи тшӧкыда пуктавлім быдсикас опыт. Ӧтчыд весиг велӧдысь пызансӧ муртса эг сотӧй! Биология дырйи тшӧкыда чӧсмасьлім школаса теплицаын быдтӧм ӧгуреч-помидорӧн. И Галина Егоровна Маринина таысь миянӧс некор эз видлы.

Физика – тайӧ зонъяслы, чайті ме. Кӧть эськӧ сыысь тӧдӧмлунсӧ сетіс ань. Валентина Владимировна Нечаева – зэв тӧлка-вежӧра педагог! Дерт, менам аттестатын дзик ӧти «3»-ыс буретш физикаысь, но ӧд тайӧ предметыс – зонъяслы. И найӧ збыльысь радейтісны сійӧс, сэк жӧ эз радейтны коми да роч кыв да литература.

А ме – радейті. Окотапырысь гижи диктант-сочинение, лыдди кывбур, лыддьыси роль серти… Роч кыв да литература велӧдысь Валентина Прокопьевна Зырянова да коми кыв да литература велӧдысь Лина Ивановна Нечаева индісны меным водзӧ олӧм-уджын туйсӧ, ӧд журналистикаын медводдза воськовъяссӧ вӧчи на отсӧгӧн школаын велӧдчигӧн.

Сьӧлӧм вылӧ воис черчение урок. Сы серти тӧдӧмлун-сямнас миянкӧд юксис Надежда Александровна Матвеева. Ог тӧд кыдзи, но черчение дорӧ муслуныс вуджӧма и пиӧйлы. Ӧнӧдз видза тетрадь-альбомсӧ, кытчӧ вит арӧссянь пиӧй визьйӧдліс-серпасаліс быдсикас стрӧйба. Ичӧтдырйиыс сійӧ кӧсйис лоны архитекторӧн, да сетчис журналистикаӧ, но тайӧ нин мӧд сёрни.

Ог тӧд кыдзи мукӧдыс, а миян классным топыда ёртасис география велӧдысь Галина Генриховна Чугаевакӧд. Радейтім и асьсӧ, и предметсӧ. Весиг эгӧ кӧ дасьтысьлӧй урок кежлас, Галина Генриховна «2»-сӧ миянлы эз тэч.

Ой, а медводдза учительӧс тай вунӧді?! Эг, дерт, вунӧд. Медся шань да бур медводдза велӧдысьыс – миян Галина Михайловна Майбурова. Ми сійӧс радейтім и, чайта, сійӧ миянӧс радейтіс. Гӧлӧссӧ некор эз кыпӧдлы. Сӧмын чирыштас стрӧга, а синмыс важ кодьыс шань. Том специалист Галина Михайловна босьтіс миянӧс медводдзаясӧн да велӧдіс-туйдіс нулевӧйсянь коймӧд классӧдз, а нёльӧдсяньыс миянкӧд тӧдӧмлуннас юксьыны босьтчисны мӧд педагогъяс нин.

Гриваса школаын велӧдлісны кӧкъямысӧд классӧдз. Ӧкмысӧд-дасӧдас ме ветлі Койгортсаӧ нин. Бур кывйӧн казьтыла и сэтчӧс педагогъясӧс.

Алира Васильевна Лодыгина вӧлі миян классӧн веськӧдлысьӧн, класснӧй класснӧйӧн. Сы отсӧгӧн ме куті кӧть неуна гӧгӧрвоыштны химия да весиг аттестатӧ «4» нажӧвиті.

Валентина Васильевна Майбурова – математика велӧдысь да збыльвывса психолог, сійӧ пыдди пуктіс быд велӧдчысьӧс тшӧтшъяӧс моз.

Эмилия Алексеевна Торопова – коми кыв медбура велӧдысь да ыджыд шыпассянь Морт.

Физикаысь учитель Александра Николаевна Мазиковаӧс ми радейтім шмонь гӧгӧрвоӧмсьыс. Кодлыкӧ, гашкӧ, парскылісны сылӧн лэчыд кывъясыс, сӧмын эз миянлы – ми «гӧрдлім»-серавлім.

Шмонитны кужис и география велӧдысь Юрий Иванович Грязных, а НВП-ысь тӧдӧмлун сетысь Александр Григорьевич Гуляев вӧлі помтӧг шань.

Став дас ӧти восӧ быд урок вылын ми восьтім аслыным мыйкӧ выльтор. Сэки ӧтуввезйыд эз вӧв, и ми тӧдмасим гӧгӧртасӧн велӧдысьяс пыр. Аттьӧ тіянлы, учительяс! Аттьӧ, наставитысьяс! Мед тіян велӧдчысьясныд лоӧны водзмӧстчысьӧсь, быдтор тӧдны окотитысьӧсь, уджачӧсь да зільӧсь!

А ми виччысям ставнытӧ Гриваса библиотекаын выль тӧдӧмлунъясла. Миян эмӧсь художествоа литература да быдсикас энциклопедия. Найӧ лоӧны тіянлы велӧдчӧмын да тшӧтш и велӧдӧмын бур отсасьысьясӧн. <>

Грива сикт, Койгорт р.

 

Виктория Ромашкина.

Нэмтӧ ов да нэмтӧ велӧдчы!

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх