Диана Васильева: «Ме бӧрйи лӧсялана туйвизь»

Кодӧн ті кӧсйинныд лоны ичӧтдырйиыд? Унаӧн шуасны ӧтитор, а збыльвылас бӧрйӧмаӧсь дзик мӧд туйвизь. А со Коми Республикаса челядьлы больничаысь нейрохирургия юкӧнын медсестра Диана Васильева збыльмӧдӧма дзолядырся кӧсйӧмсӧ.

–Веськыда шуа, ар витсянь ме «лечиті» нин гортын став небыд чачасӧ да висьтавлі матысса-рӧдвужлы, мый быдма да лоа медся бур врачӧн. Та вӧсна гырысь классъясын нин велӧдчи зэв кывкутӧмӧн, торйӧн нин пыдісянь биологияӧ пырӧдчи, медым бӧрыннас кокньыдджык вӧлі пырны босьтны тӧдӧмлун медицина колледжӧ, а сэсся и вузӧ, – висьталӧ том медсестра.

2021 воын И.П.Морозов нима Сыктывкарса медколледж помалысь босьтӧма отличиеа диплом.

–Ӧнӧдз бурӧн казьтыла да помтӧг аттьӧала колледжын велӧдысьясӧс. Лунысь-лун найӧ юксисны миянкӧд асланыс зумыд тӧдӧмлунъясӧн, а группаса куратор Екатерина Анатольевна Малькова вӧлі зэв сьӧлӧма да гӧгӧрвоысь. Зэв бур, мый медколледжын велӧдчигӧн на эм позянлун ветлыны практика вылӧ больничаӧ. Ӧд буретш висьысьяскӧд ноксигӧн содӧ-сӧвмӧ кужанлун-сямыд. Медся ёна тшупис вежӧрӧ Коми онкодиспансерысь маммология-гинекология да республикаса больничаысь юр вем бурдӧдан отделениеясын практикаыс. Сэні стӧчаясыда гӧгӧрвои, мый бӧрйи лӧсялана туйвизь да кута уджавны йӧзлысь дзоньвидзалун видзан юкӧнын, – пасйӧ Диана Васильева.

Медым лоны уджад профессионалӧн, колӧ уна вын, тшӧтш и теория тӧдӧмлун содтыны да практика дырйи сям сӧвмӧдны. Тайӧ инмӧ и медицинаын зільяслы.

–Уджала во чӧж нин, но ӧтторъя кутшӧмкӧ юалӧм чужӧ, ӧд ставсӧ тӧдны он вермы! Буракӧ, таын и эм медицина аслыспӧлӧслуныс. Но медся сьӧкыд вӧлі медводдза тӧлысяс, кор муртса на тӧдмаси уджаланногнас, – юксьӧ Диана.

Сылӧн видзӧдлас серти, медсестра уджӧ кутчысьны медбур стационарын. Врачӧн лоны окотитысь том специалистлы тӧдӧмлунсӧ содтыны тадзи медся кивыв.

–Ас кадӧ ме кӧсйи веськавны челядьлы онкология либӧ психоневрология юкӧнӧ, но индісны нейрохирургияӧ. И сэні уджыс воӧ меным сьӧлӧм вылӧ, – висьталӧ медсестра.

Талун Диана водзӧ зільӧ збыльмӧдны челядьдырся кӧсйӧмсӧ: велӧдчӧ Сыктывкарса госуниверситетысь медицина институтын коймӧд курсын «Педиатрия» нырвизь серти. Водзӧ кежлӧ кӧсйӧ пырны ординатураӧ хирургия нырвизьын.

Диана Васильева висьталӧ, мый велӧдчыны да тшӧтш и уджавны абу кокни, ӧд войся сьӧкыд смена бӧрын ковмӧ мунны «пара» вылӧ. Но том медсестра нырӧ ассьыс, ӧд ставыс пӧ ас саяд.

 <> Иван Попов.
Снимокыс ӧтуввезйысь.

Диана Васильева: «Ме бӧрйи лӧсялана туйвизь»

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх