Томулов воӧ «Молодёжное путешествие по Коми» уджтас серти республикаысь 18-35 арӧса кызь вит морт дон вештытӧг ветлісны Печора-Ылыдзса заповедникӧ.
Ухтаӧ сувтлӧмӧн Сыктывкарсянь заповедникӧдз найӧ воӧдчисны автобусӧн, тӧдмасисны ёрта-ёртыскӧд да меститчисны шоныд керкаӧ.
Мӧд лунас тӧдмасисны заповедникса музейӧн, кӧні петкӧдлӧма Печора йылын паныдасьлан быдмӧгъяс, пемӧсъяс.
Олеся Рязанцева висьталіс налы, мый заповедниксӧ вӧлі котыртӧма 1930 воын, и сэки ыдждаыс вӧлӧма 1 миллион 200 сюрс гектар, но 1951 воын чинтӧмаӧсь дас пӧв. Вӧр-ва видзысьлӧн водзмӧстчӧмӧн 1959 воӧ бӧр ыдждӧдӧмаӧсь 721.322 гектарӧдз.
Музейсьыс жӧ позьӧ аддзывны вӧрса пемӧс чучелаяс.
–1971 воын Якша дорын овмӧдчӧма ош, но тӧвйыны гуӧ абу водӧма. Вӧралысьяс казялӧмаӧсь, мый сійӧ виӧма мӧд ошкӧс, яйсӧ дзебӧма гуӧ да вочасӧн вӧлӧм сёйӧ. Тадз жӧ сійӧ вермис эськӧ и йӧз вылӧ уськӧдчыны, да ошсӧ ковмис вины, – висьталіс музейса гӧсьтъяслы Олеся Рязанцева.
Сідзжӧ сійӧ тӧдмӧдіс томуловӧс, мый Печора да Ылыдз юяс ӧтлаасянінын медводдза йӧзыс овмӧдчылӧмаӧсь кызь сюрс во сайын нин. XVIII нэмын Якша дорын вӧчӧмаӧсь ӧзын, купечьяс кыпӧдӧмаӧсь кыксё сайӧ амбар.
Музейӧ пыралӧм бӧрын ставӧн мӧдӧдчисны вит километр кузьта торъя ордымті. Кежны сы вылысь бокӧ оз позь, мед пӧ нитшкыс оз талявсьы, ӧд вонас сійӧ быдмӧ сӧмын кык-куим сантиметр.
А сэсся томулов вуджисны Печора мӧдлапӧлӧ, кӧні видзӧны йӧра.
Вочааліс найӧс ферманас веськӧдлысь Светлана Акатьева да висьталіс, мый йӧра видзанінсӧ восьтылӧмаӧсь 1949 воын, и сэні уджавлӧмаӧсь учёнӧйяс, а ӧні туристъяс волывлӧны. Ми пӧ кӧсъям, мед пемӧсъясыс эз повны йӧзысь, и туристъяслы позис малалыштны йӧраяссӧ, нимкодясьыштны наӧн, а дзоляяссӧ и киысь вердыштны.
Фермаас ӧні олӧ дас нёль верстьӧ пемӧс да сизим йӧрапи.
Налы тӧв кежлӧ кӧрым заптыны оз ков, пу вож сёйӧны да.
Фермаас том путешественникъяс волонтёралісны на: нывъяс чукӧртісны косьмӧм ув-рос, а зонъяс дзоньталісны вольер дзиръяяс. <>
Гижӧдъяссӧ дасьтіс Павел СИМПЕЛЕВ.
Снимокъясыс ӧтуввезйысь да Ольга Соловейлӧн.