Менӧ шуӧны Кирилл Нехорошев.
Чужи-ола Сыктывкарын. Велӧдча серпасасьны Коми Республикаса искусство гимназияын. Помалі 6 класс. Бура тӧда коми мойд да легенда геройясӧс. Талун тӧдмӧда тіянӧс Йиркапкӧд. Менам Йиркап олӧ Ылі Войвылын. Тані сылӧн да менам вужйӧй. А висьталіс мен Йиркап, Яг-морт, Шыпича да мукӧд багатыр йылысь Валентин Тимофеевич Чупров ыджыд айӧ.
Войвыв Йиркап
Менам ыджыд мам Нина Ильинична Нехорошева Кебраысь. Мамсянь ыджыд мамлӧн, Татьяна Валентиновна Чупровалӧн, вужъясыс Изьва районса Сизябын. Сэні тӧлыс кузь да кӧдзыд. Олӧны кӧр видзысьяс, чери кыйысьяс да вӧралысьяс. Накӧд олӧ менам Йиркап – налӧн отсасьысь. Шоныд паськӧмыс видзӧ сійӧс кӧдзыдысь и бушколысь. Лымйӧн тырӧм тӧлын вермӧ мездыны йирмӧгысь ныв-зонмӧс да верстьӧӧс. Гӧльлы Йиркап вайӧ чери-яй, а висьысьӧс бурдӧдӧ гожӧмын дасьтӧм турунӧн да мырпомӧн.
Войвыв Йиркаплӧн ордымыс кузь, вӧрын вермӧ кыйсьыны уна лун. Войнас узьӧ ноддя бипур дорын. Ноддя бипур – тайӧ вӧралысьлӧн пач. Кык кер костын ломтысьӧ чаг, лыс лап. Жарыс ӧвтӧ бокӧ, оз вылӧ кач да шонтӧ войбыд.
Бать-мам казьтылӧны, менӧ ичӧтсянь кыскӧма видзӧдны вӧр-ва, лэбач да пемӧс йылысь мультфильмъяс. А аддзин пӧ экранысь ыджыд сорса, кузь сьыліа динозаврӧс да, синмыд ӧзйис. Гырысьяс гӧгӧрвоӧмаӧсь, мый ичӧт мортлы колӧ отсавны тӧдмасьны юрскӧй кадӧ олысь пемӧсъяскӧд: козьналӧмаӧсь чача да уна висьтасьӧмаӧсь.
5 арӧсын ме нин тӧді акилозавр, майазавр, стегозавр да мукӧд заврӧс, ящеръясӧс. Сёрӧнджык тӧдмалі: эм быдмӧг сёйысь, яй да чери сёйысь, а сідзжӧ быдмӧг да чери-яй сёйысь рептилия.
Палеонтологъяс туялӧны динозавръяссӧ налӧн кольӧм лы сертиыс. Дыр велӧдчӧм бӧрын ме кӧсъя лоны палеонтологӧн. Кута мича рӧмӧн серпасавны ящеръясӧс, гижны на йылысь мойдъяс, медым йӧзыс эз вунӧдны рептилия олӧм.
Снимок вылын менам радейтана тираннозавр, 4 метр судта, 9 метр кузьта, сьӧктаыс 8 тонна. Вермӧ ӧдйӧ котравны, гораа равзыны да дорйыны семьясӧ вӧрӧгъясысь. Вермас лоны шӧр и геройӧн динозавръяс йылысь мойдын.
А серпасалі ме стегозаврӧс. Сійӧ олӧма Войвыв Америкаын. Тайӧ быдмӧг сёйысь ящер. Юрсянь бӧжӧдзыс тырӧма мича сорсӧн. Сорсыс видзӧ стегозаврӧс шонді югӧрысь да дорйӧ ёсь пиня пемӧсысь. Быдмӧг сёйысь динозаврлы татшӧм дорйӧмыс ёна колӧ.
Дасьтiсны Кристина Кривошеева, Алёна Нестерова.