Август 4 лунӧ Коми Республикаса Национальнӧй музейын воссяс Россияса народнӧй мастер, Россияса художник да Коми Республикаса мастер котыръясӧ пырысь Василий Попов чужан лунсянь 65 во тырӧмлы сиӧм «Моя любовь – кап и сувель» выставка. Дасьтӧма сійӧс «Культура» нацпроект вылӧ подуласьӧмӧн.
Василий Попов пуктіс республикаын декоративно-прикладнӧй искусство сӧвмӧдӧмӧ тӧдчана пай. Киподтуя мастер торйӧн нин нималӧ кыдз пу йӧгысь аслас шензьӧдана вӧчӧмторъясӧн.
Творческӧй уджӧ босьтчӧма 1979 воын Сыктывкарса художник-любительяслӧн «Серпас» котырын. Декоративно-прикладнӧй искусство радейтысьяслӧн вӧлі позянлун донъявны сылысь киподтуйсӧ Сыктывкарын, Москваын, Новгородын, Мурманскын, Вӧлӧгдаын, Саранскын, Чебоксарыын выставкаяс вылын.
Василий Поповлысь творческӧй уджсӧ вылӧ донъялӧны оз сӧмын Россияын, но и суйӧр сайын: Белоруссияын, Венгрияын, Финляндияын, Швецияын, Норвегияын.
Та пӧрйӧ Сыктывкарын Василий Васильевичлӧн паметьлы сиӧм выставкаын лоӧ петкӧдлӧма Коми Республикаса Национальнӧй музей фондъясысь да Поповъяс семьялӧн коллекцияысь нималана мастерлысь вӧчӧмторъяссӧ. Искусство радейтысьяслы позяс тӧдмасьны сідзжӧ сылӧн творческӧй уджкӧд йитчӧм фотодокументъясӧн.
* * *
–Василий Васильевич Попов водзӧ сӧвмӧдіс Коми Республикаын национальнӧй культура да йӧзкостса творчество. Пу йӧгысь сылӧн вӧчӧмторъясыс лоисны миян регионлӧн аслыспӧлӧс визит карточкаӧн, – пасйис республикаын культураса министрлысь удж вӧчысь Мария Балмастова. – Сылӧн медбур уджъясӧн нимкодясьӧны Коми Республикаса Национальнӧй музейӧ да Национальнӧй галереяӧ, а сідзжӧ Роч музейса да Эрмитажса салонъясӧ волысьяс.
<> Гижӧдсӧ дасьтіс Александра АРТЕЕВА.
Снимокъясыс ӧтуввезйысь.