Кор колӧ гӧгӧрвоӧдны, мый сэтшӧмыс «Таврида» арт-кластерыс, сьӧкыд аддзыны колана кывъяс. И дженьыда висьтавны тані оз артмы.
«Таврида» – тайӧ «Росмолодёжь» агентстволӧн проект, Крымса Судак карын ичӧтик кар, кытчӧ страна пасьталаысь локтӧны асьнысӧ сӧвмӧдысь томулов. Тані найӧ велӧдчӧны, дасьтӧны да дорйӧны проектъяс, думышталӧны сьыланкыв-йӧктӧмъяс, гижӧны кывбуръяс, котыртӧны концертъяс, вӧчӧны арт-объектъяс, пырӧдчӧны волонтёрствоӧ да уна-уна мукӧдтор на. Аддзысьлыны том йӧзкӧд татчӧ тшӧкыда волывлӧны Россияын нималана «кодзувъяс», правительствоысь ыджыд чина йӧз.
«Тавридаын», ок, ёна кӧсйи велӧдчыны кык во сайын: бӧрйи «Медиа» нырвизь, дыркодь гижи эссе, карса некымын местаын снимайті, а сэсся монтируйті видеовизитка да шыӧдчи котыртысьяс дорӧ. Анкетаӧс донъялӧм-видлалӧм бӧрын локтіс вочакыв: «Заявка отклонена». Но, мися, «Таврида», буракӧ, збыльмытӧм кӧсйӧмӧн и кольӧ.
Но тавося июньын тӧдсаӧйсянь локтіс юӧр: «Тавридаын» воссьӧ выль – «Издательское дело» – нырвизь, кытчӧ виччысьӧны том журналистъясӧс, и талун бӧръя лун, кор позьӧ шыӧдчыны конкурсӧ. Сэні уджалысьяс шуӧмаӧсь, мый колӧ журнал, коді эськӧ петкӧдліс арт-кластерын олӧм-позянлунсӧ, но такӧд тшӧтш вӧлі интереснӧ быдӧнлы. Лыдди юӧрсӧ да и вунӧді: уджыс, мися, татӧг тырмӧ. Но лунтыр мӧвпӧн мыйлакӧ пыр бергӧдчылі сылань. Рытнас нин шуи видлыны: час джынйӧн гижи эссе, уджалан жырйысь петавтӧг снимайті видео да пырті сайтӧ колана юӧр. Некымын лун мысти тӧдтӧм номерсянь воис юӧр: тіянӧс пӧ бӧрйисны «Тавридаӧ», да вуджӧй ссылкаӧд. Но, мися, тайӧ, буракӧ, ылӧдчысьяс кутшӧмкӧ вируса ссылкаяс мӧдӧдӧны, да некытчӧ ог вудж. Эг эскы, кытчӧдз эз звӧнитны котыртысьясыс.
Июнь пом. Поездӧн муна «Таврида» вылӧ. А таӧдз кык вежон велӧдчим онлайн: миянлы лекцияяс нуӧдісны «Marie Claire», «Вокруг света», «Psychologies», «Elle Girl» журналъясын зільысьяс, экспертъяскӧд тшӧтш думышталім рубрикаяс выль петасӧ.
Судакын миянӧс овмӧдісны «Меганом» академияын, Сьӧд саридз берегын. И
уджыс пузис. Зілим ми ыджыд – 90 морта – редакцияӧн. Дизайнеръяс дасьтісны макет да эскиз, продюсеръяс думышталісны сюрӧссӧ да нуӧдісны фотосъёмка, издательяс котыртісны уджсӧ да мӧвпалісны журналсӧ паськӧдӧм-разӧдӧм йылысь. А ме пыри редактор котырӧ. Кыдзи шуис эксперт, «Marie Claire» журналын шӧр редакторӧс вежысь Раиса Мурашкина, ми кывкутам шыпасъяс вӧсна. Юклім темаяс, сёрнитчим интервью йылысь, аддзысьлім геройяскӧд, гижим налысь висьтасьӧмсӧ. Босьтім интервью и нималана «кодзувъяслысь», и ыджыд «Тавридаын» ичӧт уджалысьяслысь. И, вӧлӧм, Ваня Дмитриенко сьылысьлысь телефонсӧ позьӧ аддзыны Сан Саныч водительлӧн дорысь ӧдйӧджык. (Сан Санычкӧд сёрниті ме, и збыльвылас куим кымын лун котыртысьяс эз вермыны тӧдмавны сылысь номерсӧ).
Велӧдчан корпусын биыс эз куслы пемыд войӧдз – сутки чӧж сэні кодкӧ да уджаліс. Но шойччан шуда здукыс вӧлі жӧ тырмымӧн: миянӧс нуӧдлісны Меганом мыс вылӧ вочаавны шонді петӧм, кыпӧдісны ловру берегвывса концертӧн, экскурсия дырйи петкӧдлісны арт-объектъяс, некымынысь удитлім тшӧтш суныштлыны саридзӧ.
«Тавридаын» вежонся уджнымӧс сигӧртім ӧтув планёркаӧн: висьтасим ӧта-мӧдлы, мый удитім вӧчны, а мый вылын кутам зільны гортын. Онлайнын уджыс мунас августӧдз на, а тӧлысь помас выль журнал кыпыда нимӧдасны фестиваль дырйи.
«Тавридаын», ок, ёна кӧсйи велӧдчыны кык во сайын, но, кыдзи шулӧны йӧзыс, быдторлы ас кад да места. <>
Ирина Терентьева.
Снимокъясыс авторлӧн да «Тавридаысь».