Июньсянь Коми Республикаса томулов политика комитет збыльмӧдӧ тӧдчана уджтас: сетӧ позянлун том йӧзлы дон мынтытӧг тӧдмасьны чужан муӧн.
«Молодёжное путешествие по Коми» проектӧ пырӧдчысьяс кылӧдчасны Печора ю кузя, гажӧдчасны Чилимдінса «Горка» вылын, кайласны Урал из йылӧдз, аддзыласны Парась тыяс…
Том йӧзлы ветлӧм-мунӧмысь вештысьны оз ков, но таӧдз коліс пырӧдчыны «Молодёжь России» сайтын конкурсӧ. Шыӧдчысьяс пӧвстысь котыртысьяс бӧрйисны медся водзмӧстчысьясӧс, соцсетьын тшӧкыда гижасьысьясӧс, коді оз пов юксьыны видзӧдласӧн.
– Уджтасыслӧн шӧр могыс – петкӧдлыны Коми мулысь мичлунсӧ. Миян вӧр-ваыс сӧстӧм, национальнӧй традицияясыс озырӧсь, кутам лача, став турыс кажитчас да лоӧ коланаӧн татчӧс томуловлы, – пасйис комитетӧн веськӧдлысь Светлана Суворкина. – Окота петкӧдлыны том йӧзлы, мый чужанінын найӧ вермасны збыльмӧдны ассьыныс став кӧсйӧмсӧ.
Котыртысьяс вичмӧдасны транспорт, турист снаряжение, оланін да сёян-юан. Томуловлы колӧ сӧмын дасьтыны колана паськӧм да воӧдчыны маршрут пансянінӧ.
Уджтасӧ пырӧдчас 18-35 арӧса 240 морт. Быдӧн вермас бӧрйыны 9 турысь ӧтиӧс. Медводдза походыс – Печора ю кузя кылӧдчӧм – заводитчис июнь 20 лунӧ.
Июль-августын том йӧз ветласны Народная, Манарага гӧраясӧ да Чилимдінса «Горка» вылӧ, тӧдмасясны Еркусей вежа изйӧн, Серегов сиктӧн да Парась тыясӧн, аддзыласны Грубепендиты ты да мӧдӧдчасны «Чудное» зарни куйланінӧ.
Котыртысьяс виччысьӧны, мый тур помланьыс быдӧн йӧзӧдас ӧтуввезйын снимокъяс, юксяс сьӧлӧмкылӧмнас да пасъяс #Путешествие11 хештег. Тайӧ снимокъясысь томулов политика комитетын зільысьяс лӧсьӧдасны фотовыставка.
Коми Республикаса томулов политика комитетлӧн
«ВКонтактеын» юӧр серти.
Лист боксӧ дасьтіс Ирина Терентьева.