Кольӧм вежонӧ Коми Госсӧветысь депутатъяс ошкисны республикаса челядь больничаӧ выль оборудование ньӧбӧм могысь содтӧд 20 миллион шайт торйӧдӧм йылысь регионса правительстволысь вӧзйӧмсӧ.
–Июнь заводитчигӧн челядь больничаысь главнӧй врач Игорь Кустышев корис содтӧд сьӧм ньӧбны хирургия юкӧнӧ медтехника, – висьталіс Коми Республикаса правительствоӧн веськӧдлысьӧс медводдза вежысь Лариса Карачёва. – Госсӧветса депутатъяскӧд ӧтув нюжмасьтӧг видлалім шыӧдчӧмсӧ да вичмӧдім регионса бюджетысь тайӧ сьӧмсӧ. Кута лача, матысса кадӧ нин челядьӧс бурдӧдігӧн врачьяслӧн лоас позянлун уджӧдны выль аппаратъяссӧ.
Тайӧ техниканас операциясӧ позьӧ вӧчны яй-кучик вундавтӧг.
–Кынӧмын восьса операция вӧчӧм бӧрын вермас лоны спайка – весиг ветымын во мысти. 2006 восянь ми кутім эндоскопическӧй операция вӧчавны, и спайка вылӧ норасьысьыс дзикӧдз быри, – пасйис больничаысь главнӧй врачӧс вежысь Вячеслав Сварич.
Бурдӧдчанінъяссӧ выль оборудованиеӧн могмӧдӧны «Дзоньвидзалун» нацпроект весьтӧ. <>
Гижӧдсӧ дасьтiс Павел СИМПЕЛЕВ.
Снимокыс ӧтуввезйысь.