Кулӧмдін районса Керчомъя сиктын котыртлісны «Пыжа гаж».
Йӧзкостса тайӧ праздниксӧ нуӧдісны комынӧдысь нин Вад ты дорын мичасьыс-мича веж луд вылын.
Волісны республика пасьталаысь уна сикт-грездысь гӧсьтъяс, гудӧкасьысьяс, сьылысь-йӧктысьяс, частушка радейтысьяс.
Медвойдӧр вӧлі котыртӧма пыжын сынӧмӧн, а сідзжӧ верзьӧмӧн ордйысьӧм.
Тшӧтш и спорт радейтысьяс ассьыныс кужанлун-сямсӧ петкӧдлісны да художественнӧй самодеятельнӧй котыръяс гӧсьтъясӧс гажӧдісны, сёр рытӧдз ставӧн сьылісны-йӧктісны.
Тайӧ гажыслӧн медшӧр аслыспӧлӧслуныс – пыж вӧчысьяс костын ордйысьӧм: кодлӧн пыжыс медся бур, зумыда кутчысьӧ ва вылын да медӧдйӧ кывтӧ-катӧ.
Гӧсьтъяс вермисны жӧ пуксьывны пыжӧ да петавны ты вылӧ. Ставӧн луд вылын сьӧлӧмсяньыс гажӧдчисны да окотапырысь коми сёян-юанӧн чӧсмасисны.
* * *
Тайӧ гажыс зэв аслыспӧлӧса пансьӧма уна-уна во сайын.
1967 воын коми композитор, фольклорист, РСФСР-са культураын заслуженнӧй уджалысь Прометей Чисталёв гижӧма гудӧкӧн ворсысьяслы Керчомъяса кадриль. Тайӧ сиктсьыс гудӧкасьысьяс нималӧмаӧсь весиг Ленинградӧдз.
1970 воын Керчомъяӧ волӧмаӧсь краеведъяс да снимайтӧмаӧсь татчӧс войтырлӧн традицияяс йылысь документальнӧй кино. Сэк жӧ пыжӧн петавлӧмаӧсь Вад ты вылӧ.
1993 воын Керчомъяын олысьяс казьтыштӧмаӧсь та йылысь да шуӧмаӧсь босьтчыны нуӧдны «Пыжа гаж». <>
Гижӧдсӧ дасьтіс Екатерина МИКУШЕВА.
Снимокъясыс ӧтуввезйысь.