«Демография» нацпроектлӧн «Спорт – норма жизни» уджтас, а сідзжӧ «Физкультура да спорт сӧвмӧдӧм» республикаса программа вылӧ подуласьӧмӧн Ухтаын кыпӧдӧны вермасян комплекс.
Но пӧдрадчикыслӧн выльысь арталӧм бӧрын гӧгӧрвоӧмаӧсь, мый стрӧйбасӧ эштӧдӧм могысь ковмас содтӧд сьӧм. Государственнӧй экспертиза воӧма татшӧм жӧ кывкӧртӧдӧ.
Республикаса юралысь Владимир Уйба индӧма вичмӧдны колана мында сьӧм. Коми Госсӧветлӧн бӧръя чукӧртчылігӧн регионса бюджетысь чуктӧдӧмаӧсь 46.861,1 сюрс шайт.
Физкультура да спорт отсӧгӧн дзоньвидзалун ёнмӧдан комплекссӧ панӧмаӧсь мӧйму майын. Сёрнитчӧм серти урчитлӧмаӧсь помавны таво декабрын.
Кык судтаа стрӧйбаас лоас видзӧдысьяслы трибунаяса ыджыд вермасян зал, вежсянін, мыссян-киськасянінъяс, медкабинет да тренажёра залъяс.
Стрӧйбаыскӧд орччӧн лӧсьӧдасны машинаяслы паськыд сулаланін. <>
Дасьтіс Николай РАЗМЫСЛОВ.
Снимокъясыс ӧтуввезйысь.