Июль 10-13 лунъясӧ Комиысь томулов ветласны «Чилимдінса горка» вылӧ.
Нэмӧвӧйся традицияясӧн пыдісяньджык тӧдмасьны позянлун сетӧ «Молодёжное путешествие по Коми» проект, кодӧс збыльмӧдӧны «Регион для молодых» уджтаскӧд йитӧдын.
Том йӧз политика комитет, томуловлӧн ресурс шӧрин да миян республикаысь нималана путешественник Сергей Семяшкин водзӧ котыртӧны 18-35 арӧса ныв-зонлы Коми Республика пасьтала путешествуйтӧм. Печора юӧд медводдзаысь кывтӧм могысь чукӧртӧмаӧсь нин йӧзӧс, а ӧні виччысьӧны Чилимдінӧ нималана «Горка» вылӧ нёль лунся турӧн ветлыны окотитысьясӧс.
–«Чилимдінса горка» миян маршрутӧ быть колӧ вӧлі пыртны, – висьталӧ Комиын том йӧз политика комитетӧн веськӧдлысь Светлана Суворкина. – Татшӧм кыпыд гажӧн оз на быд регион вермы ошйысьны. «Чилимдінса горка» гажын петкӧдчӧ старовер культураыс, нэмӧвӧйся традицияясыс, кодъяс уна нэм нин вуджӧны кӧленаысь кӧленаӧ.
Чилимдін – важ эскӧмӧ кутчысьысьяслӧн культура озырлун, а «Горкаыс» – йӧзкостса традицияяслӧн ловъя памятник. Витсё гӧгӧр во нин сэні видзӧны тайӧ аслыспӧлӧс культурасӧ. Сэтчӧс олысьяслӧн сёрниын, паськӧмын, оласногын, ремеслӧясын, сьыланкывъясын, хороводын, молитваясын тыдалӧ на шӧр нэмъясся культураыс.
«Чилимдінса горкалӧн» вужйыс йитчӧма язычникъяслӧн Ярилашонділы юрбитӧмкӧд. Йӧзыс чукӧртчылӧмаӧсь грездсайса кыр йылӧ да вочаавлӧмаӧсь шонді петӧмсӧ сьылӧм-йӧктӧмӧн.
«Горкаыс» – тувсов-гожся обрядъяса гаж, ловъя памятник. Тайӧ праздник дырйиыс йӧктӧны кытшын шӧр нэмъясся пас-сера паськӧмӧн.
Июль 10 лунӧ 30 морта турист котыр мӧдӧдчас автобусӧн Сыктывкарсянь Чилимдінӧ, кӧні июль 11 лунӧ заводитчас гажыс. Традицияяс серти сэтчӧс олысьяс петкӧдчасны быдсикас ордйысьӧмын, сы лыдын чери кыйӧмын да мотора пыжӧн журъялӧмын.
Петровщина – Печора ю бокын войся рытпук, кор бипур дорын гудӧк улӧ юргӧны сьыланкывъяс. Та дырйи проса рокӧн казьтылӧны кувсьӧм рӧдвужӧс. Чайтӧны, кувсьӧмаяс пӧ тайӧ войӧ тшӧтш гажӧдчӧны.
Туристъяс вермасны волыны сідзжӧ музейӧ да А.В.Журавский гу вылӧ, нимкодясьыштны войвывса шензьӧдана мича вӧр-ваӧн. А гаж бӧрын гӧсьтъяс автобусӧн бӧр мӧдӧдчасны гортаныс. И ставсьыс таысь налысь дон оз босьтны!
Екатерина МИКУШЕВА.
Снимокыс ӧтуввезйысь.