Комиын диспансеризация нуӧдӧмӧн коймӧд во дорвыв нин чинӧ сьӧлӧм да вир сӧн висьӧмъясысь кулысьыс.
2022-2023 воясӧ этшаджык кутісны кувны и больничаын инсультысь да инфарктысь бурдӧдчысьяс. Тайӧ лоис сы вӧсна, мый «Дзоньвидзалун» нацпроект серти Сыктывкарын кардиодиспансер да республикаса больнича, Воркутаса тэрыб отсӧг сетан бурдӧдчанін, Ухтаса, Печораса, Усинскса, Интаса больничаяс могмӧдӧны выль оборудованиеӧн. 2023 воын тайӧ бурдӧдчанінъясас вайӧма 14 УЗИ-аппарат, микроскоп, ИВЛ да мукӧд коланатор. Во помӧдз ньӧбасны нӧшта дас витӧс.
Бурдӧдчанінъясын вӧдитчӧны и выль технологияясӧн.
– Но медся тӧдчанаыс тайӧ уджас – диспансеризация, – «Дзоньвидзалун» проект збыльмӧдӧмлы сиӧм чукӧртчылӧм дырйи пасйис республикаса правительствоӧн веськӧдлысьӧс вежысь Лариса Карачёва. – Найӧ, кодъясӧс тшӧкыда видлалӧны врачьяс, дырджык и олӧны. Сідзкӧ, терапевтъяслы да фельдшеръяслы колӧ бурджыка нуӧдны диспансеризациясӧ да ас кадӧ эрдӧдны висьӧмъяссӧ.
<> Гижӧдсӧ дасьтіс Павел СИМПЕЛЕВ.
Снимокъясыс ӧтуввезйысь.