Водз асыв. Детсад ньӧжйӧника тырӧ кага больгӧмӧн. Бать-мам шыльӧдӧны дзолюкъяслысь юрсисӧ, лӧсьӧдӧны дӧрӧм-платтьӧсӧ, вежӧны кӧмсӧ да пыртӧны группаӧ. Сэні найӧс вочаалӧ кагульнича, небыдика нюмъялӧ да быдӧнӧс дзигӧдӧ. Сэсся челядь вӧчӧны зарядка, сёйӧны-юӧны да ворсӧны-велӧдчӧны
Восьса сьӧлӧмаӧсь
Ӧнія кадӧ бать-мам тшӧкыда норасьлӧны: сӧмын на пӧ кагаӧй бурдіс, но гоз-мӧд лун садйын – и бара нин висьӧ. Та вӧсна эм кӧ позянлун, мукӧдыс кольӧдӧны и дзоньвидза дзолюксӧ гортӧ дед-бабыскӧд – видзчысьӧны насмука-кызӧмысь.
– Детсадйӧ ветлӧдлӧмсӧ оз позь орччаӧдны гортын олӧмкӧд, – пасйӧ Сыктывкарса 47-ӧд номера садйын уджалысь Марина Лопырева. – Садйын челядь велалӧны ёртасьны ас коддьӧмыскӧд, сибӧдчӧны йӧз дорӧ, паськӧдӧны тӧдӧмлуннысӧ. А гортын олігӧн налы
оз тырмы ӧта-мӧдкӧд волысьӧмыс, тшӧтшъяяскӧд ворсӧмыс.
Миян детсадйын эмӧсь торъя индӧдъяс: шыӧдчам челядь дорӧ овтӧг, сӧмын нимнас; дзигӧдлам да малыштам юрӧдыс; сёрнитам бурӧн, пинясьтӧг. И, гашкӧ, та вӧсна зонпосни локтӧны татчӧ окотапырысь. Кагульнича бӧрся чипанъяс моз ветлӧдлӧны.
Оз ӧд весь шулыны: челядь сьӧлӧмнас кылӧны, радейтӧны-ӧ найӧс. Быдмасны да, асьнысӧ вермасны и лёк боксянь петкӧдлыны, но садйын кагаяс восьсаӧсь, сӧстӧмӧсь.
Комиӧн
Марина Александровна уджалӧ тані шыладӧ велӧдысьӧн 13 во нин. Тӧдмӧдӧ ныв-зонмӧс коми да роч сьыланкывъясӧн. И быд сьыланын – ворсантор: медым тӧдтӧм кывъясыс колисны юрӧ, петкӧдлӧ ставсӧ киӧн да кокӧн.
– Зэв бур, кор детсадйын воспитательыс сёрнитӧ комиӧн. Ме дзолюкъяскӧд ог лунбыд ов, а кагульнича видзӧ найӧс асывсянь рытӧдз. И, шуам, сёйны пуксигӧн кӧ сьылыштасны велӧдӧмасӧ – юраныс мыйкӧ кольӧ, – водзӧ висьтасьӧ Марина. – Любӧ и, кор бать-мам тӧдӧны комисӧ да гортаныс каганыскӧд велӧдӧны кывбуръяс. Татшӧмъясыс эмӧсь жӧ.
Мукӧд бать-мамсянь позьӧ кывлыны, мый Сыктывкарын коми детсадйыс абу: кагакӧд пӧ гортын чужан кывйӧн сёрнитам, а локтас садйысь да заводитӧ рочасьны.
– Ӧтар боксянь, школаын дугдӧны велӧдны чужан коми кывсӧ. Но мӧдарсянь, том йӧз аддзӧны позянлун сійӧс сӧвмӧдны, петкӧдлыны тӧдчанлунсӧ: восьтӧны выль шоу, гижӧны быдсяма видеоролик… – мӧвпалӧ Марина Лопырева. – Торъя коми садйыс, гашкӧ, оз и ков. Чайта, оз сюр сы мында челядьыс. Ӧти группаӧ он жӧ вермы чукӧртны, шуам, яслиӧ ветлысьӧс да школаӧ регыд мунысьӧс: уджаланногыс торъялӧ.
А сідз, Сыктывкарын воссялӧны зэв бур детсадъяс, местаыс тырмымӧн. Ог шу, мый эмӧсь ыджыд ӧчередъяс.
Мед вӧлi гажа
Быд кага аслыспӧлӧс. Кодкӧ некымын вежонӧн ли тӧлысьӧн велалӧ садйӧ. А кодкӧ и воясӧн сэтчӧ бӧрдӧмпырысь мунӧ.
– Кагаыс кӧ оз кӧсйы мунны садйӧ, заводитӧ тшӧкыда висьны. Ӧнія ногӧн кӧ, тайӧ – психосоматика. Бать-мамлы колӧ вӧляникысь велӧдны дзолюксӧ: медводз час кежлӧ сӧмын гуляйтны вайӧдлыны, а сэсся вочасӧн содтыны кадсӧ. Казялан, а кагаыд велалӧма нин. Но кадыс кӧ кольӧ, а челядь некыдз оз кӧсйыны мунны садйӧ, чайта, мырдӧн сійӧс новлӧдлыны оз ков. Сӧмын радейтӧмпырысь ставыс артмас, – юксис мӧвпъяснас Марина.
Ӧнія челядь группаясын шӧркодя 30 морт. Но, дерт, оз век ставныс ветлыны: кодкӧ висьӧ либӧ кытчӧкӧ мунӧма.
– Группаын кык кагульнича, и тадзисӧ кокньыдджык. Быд кагакӧд колӧ кужны уджавны: ӧти ньӧжмыдик, мӧд тэрыбджык, – нюммуніс Марина. – Водзын уджалысьыс эз тырмы да, 30 челядьӧс сӧмын ӧти воспитатель видзис. А ӧні лӧсьыд. Вӧчам ставсӧ, мед зонпоснилы век вӧлі гажа да шоныд
Сёрнитіс Анастасия Попова
Снимокъясыс Марина Лопыревалӧн