Тайӧ мирас локтӧмӧн челядь вайӧны радлун, шуд, выль сьӧлӧмкылӧмъяс асланыс бать-мамлы. На вылӧ видзӧдӧмӧн верстьӧ тшӧтш велӧдчӧны унаторйӧ.
И зэв сьӧкыд гижны челядь керкаын быдмысь ныв-зон йылысь. Да, налӧн ставыс эм, найӧс вердӧны-юкталӧны, пасьтӧдӧны, воспитательяс котыртӧны быдсяма занятиесӧ… Но орччӧн абуӧсь шань да найӧс радейтысь бать-мамыс.
Колӧ лоны ыджыд сьӧлӧмаӧн, медым семьяӧ босьтны детдомысь кагукӧс, быдтыны сійӧс ассьыд моз, сетны радейтӧмтӧ, отсавны венны став сьӧкыдлунсӧ. И, дерт, абу быдӧн дась лоны приёмнӧй бать-мамӧн. Медводз колӧ ыджыд кӧсйӧм босьтны бокӧвӧй кагаӧс. Сэсся быть чукӧртны вель уна документ, прӧйдитны торъя курсъяс. Специалистъяс тшӧтш и донъялӧны оланінтӧ, позянлунъястӧ, видзӧдӧны, мый верман сетны босьтӧм челядьлы. Да и тайӧ абу на ставыс
Пиян
Ольга Смирнова водзмӧстчӧ психология отсӧг сетан «Штурвал» шӧринын, уджалӧ детдомысь босьтӧм, вермытӧм да уна челядя семьяяскӧд.
– Миян семьяын вӧліны ыджыд вежсьӧмъяс, – висьталіс Ольга. – Мамӧн лоны кӧсйӧмыс менам чужис сёрӧн, комын арӧс тыртігӧн. Но сэки заводитчисны мытшӧдъяс: дыр эз артмы чужтыны. Верӧскӧд ветлім уна специалист дорӧ, сдайтім быдсяма анализсӧ, мӧд карын вӧчим сьӧкыд ЭКО. И со кад мысти чужис миян Серёжа. Пыр кӧсйим ыджыд семья, уна ныв-пи, но эз артмы да, мӧвпыштім босьтны кагукӧс челядь керкаысь.
Тайӧ кӧсйӧмыс чужис другӧн, кор ывлаысь аддзи детдомса зонпосниӧс. Ставныс ӧткодь панамкааӧсь, акань кодьӧсь, ӧтмоза восьлалӧны… Окота лои кӧть ӧти кагуклы козьнавны шуда олӧм. Сэки менам пилы вӧлі кык арӧс.
Верӧс менсьым кӧсйӧмӧс кыліс, сетчис жӧ сьӧлӧмнас. Но сійӧ пыр уджалӧ, да гӧгӧрвои: босьта кӧ дзолюкӧс – став сьӧкыдлуныс кызвыннас ме вылӧ и усьӧ.
Кутім корсьны ассьыным пиӧс. Мыйла зонкаӧс? Медым лоис миян пилы вок-ёртӧн, мед ӧтлаын быдмисны. Окота вӧлі и, медым арлыд костныс эз вӧв ыджыд, да мед миянлань кӧть неуна муніс.
Кор медводдзаысь вӧзйисны Максимӧс, ме эг кӧсйы босьтны. Сэтшӧм сійӧ вӧлі ыджыд да ёніник, а ми ставным ичӧт тушааӧсь, вӧсньыдикӧсь. Сёрӧнджык нин уна челядь пӧвстысь сӧмын Максим видзӧдліс миян вылӧ да паськыда нюмдіс – быттьӧ бать-мамсӧ аддзис. Сійӧ и лоис миян пиӧн.
Быдлунъя удж
Бюрократия венӧм бӧрын Смирнов семья ыдждӧма. Медводдза кадсӧ нимкодясьӧмаӧсь босьтӧм быдтасӧн, а сэсся казялӧмаӧсь: Максим оз петкӧдлы некутшӧм сьӧлӧмкылӧм. Сійӧ ловъя акань кодь: оз радейт дзигӧдыштӧм да окыштӧм, оз ёна нюмъяв, усяс – оз бӧрддзы. Тадзи велалӧма овны челядь керкаас, чужӧмсяньыс ӧд гӧгӧрвоӧма, мый некодлы оз ков… А Серёжа, мӧдарӧ, гора гӧлӧса да быдторсӧ бӧрдӧмсорӧн корысь.
– Максимкӧд зэв сьӧкыда велалім ёрта-ёрт дорӧ, – водзӧ висьтасис Ольга. – Отсӧгла ветлывлі «Приёмнӧй бать-мам школа» котырӧ. Сэтчӧ чукӧртчисны миян кодь жӧ семьяяс да юксисны сьӧкыдлунъяснас, мытшӧдъяснас, ӧтвылысь зілисны корсьны петан туй.
Тані ме гӧгӧрвои, мый челядь керкаысь босьтӧм кагалысь этшсӧ вежны он вермы. Сійӧ сэтшӧм, кутшӧм эм. И некор сійӧс оз ков ӧткодявны аслад быдтаскӧд. Детдомса веніс сы мында дой, и сылы колӧ уна-уна кад, мед велавны тэ дорӧ, воссьыны сьӧлӧмнас.
Миян заводитчис быдлунъя удж. Ми верӧскӧд пыр ошким Максимӧс, дзигӧдыштлім, быдторнас тешитім – петкӧдлім, мый радейтам, мый миянкӧд орччӧн повны некодысь, ми сійӧс некодлы ог сетӧй. А сылӧн этшыс – ок-ок-ок! Тышкасьысь, ён, кӧсйӧ пыр лоны медводдзаӧн, но такӧд тшӧтш дыр некыдз эз вермы восьтыны ассьыс сьӧлӧмсӧ. Миян Серёжаным – мӧдарӧ, шань, лӧнь да аслас мирын олысь морт. Макслы весиг ковмис «чужӧм» ворсӧм мӧвпыштны: пасьтавлі ыджыд паськыд футболка, а кага сы улӧ пыравліс, кывзіс, шоналіс, сэсся вӧляникысь сыліс сьӧлӧмнас. Петкӧдлі, кыдзи збыльвылӧ чужӧ кагаыс, висьталі, мый сійӧс радейтӧны мам кынӧмас овмӧдчӧмсяньыс на. Унаысь и ӧні тадзитӧ ворслам.
Збыльвылӧ вӧлі зэв сьӧкыд! Весиг мӧвпыштлі бӧр бергӧдны кагасӧ, но пыр янӧдлі ачымӧс: мися, сувтін кӧ тайӧ ордымас – восьлав водзӧ, корсь петан туй. Верӧсӧй да матыссаясӧй пыр мен отсалісны, ышӧдісны.
Быд лун козьналӧ миянлы кутшӧмкӧ выльтор. Ми и асьным Максимкӧд тшӧтш вежсям. Сійӧс быдтӧмӧн аддзам: олӧмас эмӧсь и мукӧд тӧдчанаторъяс.
Бӧркыв пыдди
Смирнов семья – уна приёмнӧй пӧвстысь ӧти. Сьӧкыд быдтыны-велӧдны ассьыд челядьтӧ, а мый нин шуны бокысь босьтӧм кага йылысь. «Штурвал» шӧринын нырччӧмыс отсалӧ Ольгалы да верӧсыслы венны мытшӧдъяс. Ӧд сэтчӧ чукӧртчӧны на кодь жӧ бать-мам, кодъяс дзик тайӧ здукӧ оз аддзыны петан туй, корсьӧны отсӧг. И налы орччӧн колӧны ышӧдысь да бур кывйӧн такӧдысь йӧз. Ӧтлаын мыйкӧ да артмӧ!
Татшӧм ыджыд сьӧлӧма бать-мам вӧчӧны зэв тӧдчана удж – быдтӧны да лэдзӧны олӧмӧ водзті некодлы ковтӧм дзолюкъясӧс. Медым эськӧ унджык кагуклы сюрис шань да радейтысь семья!
А Смирнов котырын быдмӧны кык пи, кык вок. И мед кӧть зонкаяс абу ӧти вираӧсь, мед ёна торъялӧ и этшныс – найӧ радейтӧны ёрта-ёртсӧ да тӧдӧны, мый ӧта-мӧдныслы медся-медся матыссаӧсь
«Штурвал» котыр «ВКонтекте»
Ӧні «Штурвал» котыр президентлӧн гранта фондысь сьӧм весьтӧ збыльмӧдӧ «Точка опоры» проект. А Коми Республикаса юралысьлӧн грант весьтӧ пӧртӧ олӧмӧ «Ресурсная мама» уджтас.
Надежда Пунегова
Снимокъясыс Смирновъяслӧн гортса архивысь