Куим кывъя выставка
Апрель помын Коми Республикаса войтырлӧн Ёртасян керкаын воссис «Менам Войвыв» выставка. Дасьтісны сiйӧс национальнӧй политика министерство сьӧма отсӧгӧн Ю.А.Спиридонов нима искусство гимназияса 8-11 классын велӧдчысьяс да педагогъяс
Выставкаыс тӧдмӧдӧ коми гажъясӧн, сёян-юанӧн, вӧр-ваӧн, архитектураӧн. Быд серпас улын – роч, англия да коми кывъя гижӧдъяс. Тайӧ и лоис выставка аслыспӧлӧслуннас: гимназияын коми культура, роч да англия кыв велӧдысь челядь-трилингвъяс гижисны бӧрйӧм тема серти неыджыд висьтъяс. А фотографируйтны радейтысьяс ас снимокъясӧн восьтісны коми мифологияысь гусяторъяс, петкӧдлісны вӧр-ва мичсӧ, йӧзлысь олан туйсӧ.
Чукӧртны снимокъяссӧ отсалісны Национальнӧй музей, Коми Республикаын туризм сӧвмӧдан агентство, «Югӧр» шӧрин, «Коми войтыр» ӧтмунӧм, Санкт-Петербургса театр да шылада искусство музей, Перым крайысь Чердінса ас му туялан музей да фотографъяс.
Вёрсткасӧ да дизайнсӧ дасьтіс Людмила Игушева, уджтасӧн веськӧдлӧ Ксения Таскаева. Выставкаыс кутас «гӧститны» Россияса мукӧд регионын культура шӧринъясын
Элина Шлопова да Ксения Таскаева