«Сергей Николаевичлӧн урокъяс вылын
велӧдчим вӧчасьны пуысь, сюмӧдысь, кӧртысь. Верстяммим да аддзим, мый быдлунъя олӧмад тайӧ зэв коланатор, весиг нывъяслы. Ыджыд аттьӧ сылы кывкутана уджсьыс да шань сьӧлӧмсьыс!» – татшӧм кывъясӧн Екатерина Глушенко висьтасьӧ искусство гимназияын технология велӧдысь Сергей Николаевич Волошин йылысь.
Велӧдыськӧд аддзысьлігӧн медводз юалі, мыйла бӧрйӧма буретш тайӧ уджсӧ?
– Сэтшӧм важӧн нин тайӧ вӧлі да, вушйӧма весиг паметьысь… Кыдз шуласны – «за компанию», ёртъяс бӧрся, – шӧйӧвошлі тӧкӧтьӧ, эг виччысь татшӧм вочакывсӧ да.
– Ёртъяс бӧрся? – стӧчмӧдны на кӧсйи, гашкӧ, мыйкӧ эг гӧгӧрво.
– Да. Ёртъясӧй, кодъяс меысь куим-нёль арӧн ыджыдджыкӧсь вӧліны, пединститутын велӧдчисны. Накӧд сёрниті да мӧвпышті, и меным кӧ, мися, тшӧтш видлыны? – висьталіс Сергей Николаевич. – Кӧть сэки и мӧд профессия йылысь думайті. Батьӧй капитан-механикӧн уджаліс, да челядьдырӧй менам ю дорын и коли. И олӧмӧс юыскӧд жӧ кӧсйи йитны, мӧвпалі штурманӧ велӧдчыны. Но меным мойвиис, учительӧн лои. Ӧні ӧд Комиын ва транспортыд дзикӧдз нин жебмис.
– А кӧні ті велӧдчинныд?
– Пединститутса индустриально-педагогическӧй факультетын. Сэні инженерлы и педагоглы колана тӧдӧмлун босьті. Технология велӧдысьыдлы татшӧм тӧдӧмлуныс зэв колана. Менӧ техника дорад век кыскис, школаын на судомоделирование, автомоделирование, авто-мото кружокъясӧ ветлывлі. Авто-мотоас ми асьным разьлім-чукӧртім машинаяс, сэні жӧ велӧдчи мотоциклӧн журъявны. Со татшӧм менам челядьдырӧй вӧлі. Техника радейтӧмыс и вайӧдіс менӧ профессияӧ.
– Искусство гимназияӧдз уджавлінныд кӧнкӧ?
– Институт бӧрын во велӧді Емдін районса Илья-шорын. Но ковмис мунны сэтысь, семьяӧй ӧд Сыктывкарын вӧлі, гӧтырӧй институтын на велӧдчис да.
Карын лӧсялана уджыс сӧмын 2-ӧд номера школа-интернатын вӧлі. Сэки гимназияным тадзи шусис. Воӧн-джынйӧн уджалі да, менӧ армияӧ босьтісны. Сы бӧрын бӧр татчӧ локті.
– Гимназияын уджыс сьӧлӧм выланыд воӧ?
– Велалі нин татчӧ, гимназияыс мӧд гортӧн нин лоис. А мый эськӧ и он уджав сэні, кӧні тэныд бур, лӧсьыд?
– Тіян вель уна велӧдчысь, и быдӧнлӧн аслас этш?
– Збыльысь, уна. Дерт, медбура вежӧрад кольӧны найӧ, кодъяскӧд тӧдмасин медводдза уджалан воясад. И найӧ оз вунӧдны менӧ, – вочавидзис Сергей Николаевич. – Художествоа юкӧнын ӧнія преподавательяс Ирина Модестовна Попова, Ирина Альбертовна Витязева, Екатерина Владимировна Котова ас кадӧ менам мастерскӧйын на велӧдчылісны. А художествоа творчествоас менӧ ышӧдісны Тамара Сергеевна Шалчювене да Вера Николаевна Езовских, и велалі ме и пуысь скульптура вундавны, сюмӧдысь вӧчасьны, бадь ньӧрйысь кысьыны. Таӧ сэсся и гимназистъясӧс велӧдлі.
* * *
Гижӧд помын бара на кӧсъя гимназия помалысьлысь кывъяссӧ вайӧдны. Андрей Мальков со мый висьталӧ велӧдысь йывсьыс: «Сергей Николаевич – зарни педагог! Сы дорын и пуысь вундасим, и сюмӧдысь вӧчасим. Зарни кад сэки вӧлі!».
Эска, Сергей Николаевич Волошин кодь педагогъяс дорын велӧдчӧмсӧ уна гимназист на шуас зарни кадӧн.
<> Гижӧдсӧ дасьтіс Таисия Халина.
Снимокъясыс авторлӧн.