Сыктывкарын, Эжваын, Ухтаын да Воркутаын ракӧн висьысьяслы отсӧг сетан амбулатория шӧринъяс колӧ тырвыйӧ уджӧдны, мед республикаса онкология диспансерысь врачьясӧс та боксянь неуна кокньӧдыштны. Татшӧм индӧд сетіс йӧзлысь дзоньвидзалун видзан министерствоысь чинаяслы регионса правительствоӧн веськӧдлысьӧс вежысь Лариса Карачёва.
Лёк пыкӧсысь видзчысьӧм да сылы паныд водзсасьӧм йылысь сёрниыс вӧлі «Дзоньвидзалун» нацпроект збыльмӧдӧмкӧд йитӧдын регионса правительствоын чукӧртчылӧм дырйи.
–Ӧнія кадся оборудование-аппаратураа татшӧм амбулатория шӧринъясас кар-районын олысьяс вермасны, позьӧ шуны, гортсяньыс босьтны став колана отсӧгсӧ. Талун жӧ зэв на унаӧн рак висьӧмкӧд йитӧдын дзоньвидзалуннысӧ туялӧм могысь асьныс шыӧдчылӧны Сыктывкарӧ онкодиспансерӧ, кӧні врачьяс дорӧ ӧчередыс зэв ыджыд да, дыр лоӧ виччысьны. А сідзкӧ, и зэв тӧдчана, мед амбулатория шӧринъясын ас кадӧ вермисны сэтчӧ волысьяслы диагноз пуктыны да кыдз позьӧ ӧдйӧджык босьтчыны бурдӧдны, сійӧ жӧ химиотерапиясӧ вӧчны, – висьталіс Лариса Карачёва.
Правительствоын тайӧ чукӧртчылӧм дырйиыс вӧлі пасйӧма, мый таво кар-районса больничаясын диспансеризация дырйи тӧдчымӧн унджык казялӧны быдсикас висьӧмсӧ, тшӧтш и лёк пыкӧссӧ.
–Та могысь муниципалитетъясӧ, кӧні абу онкологыс, ветлывлӧны юркарысь специалистъяс. Онкологъяс уджалӧны и врачьяслӧн мобильнӧй бригадаясын. Лёк пыкӧс туялӧм кузя колана тӧдӧмлун сетӧны ФАП-ын да участкӧвӧй амбулаторияын зільысьяслы. Такӧд йитӧдын жӧ нуӧдсьӧны видеоконференцияяс, – гӧгӧрвоӧдіс Лариса Карачёва.
* * *
Кыдзи юӧртлім нин, регионса кар-районын олысьяслы да врачьяслы отсӧг сетӧм могысь республикаса онкодиспансерын котыртӧма торъя служба, кытчӧ позьӧ звӧнитчыны луннас кӧть войнас 8-800-100-4028 да уджалан кадӧ 8(8212) 23-64-87 номера телефонъяс пыр. Специалистъяс висьталасны, кытчӧ да кор мортыс вермас шыӧдчыны, мед дзоньвидзалунсӧ пыдісянь туявны. Ковмас кӧ, и больничаӧ водлӧмӧн. <>
Гижӧдсӧ дасьтiс Александра АРТЕЕВА.
Снимокыс ӧтуввезйысь.