Таво «Жильё и городская среда» нацпроектлӧн «Формирование комфортной городской среды» уджтас збыльмӧдӧм могысь Комилы вичмас федеральнӧй бюджетысь 205 миллион шайт.
Колана мындаӧдзыс лоӧ торйӧдӧма республикаса да кар-районса кудъясысь.
Нацпроектъяс збыльмӧдӧмкӧд йитӧдын став уджсӧ кутӧ син улас регионса юралысь Владимир Уйба.
Кар-сиктса сквер-площадкаясын, олан керка ӧшинь увъясын да мукӧд йӧзаинын дзоньтасьӧм-пелькӧдчӧм йылысь юӧртіс республикаса юралысьӧс первой вежысь Эльмира Ахмеевалӧн юрнуӧдӧм улын министерство-ведомствоясысь да кар-районса администрацияясысь чина йӧзлӧн чукӧртчылӧм дырйи регионса правительствоӧ пырысь Наталья Хозяинова.
Сылӧн висьталӧм серти, таво шуӧма вайӧдны пӧрадокӧ квайт муниципалитетын 50 ӧшинь ув да кызь кар-районын 72-лаын йӧзлысь шойччан-прӧст кад колляланін, сы лыдын и мый бӧрйӧмаӧсь такӧд йитӧдын ӧтуввез пыр гӧлӧсуйтӧмӧн регионын олысьяс.
Сідз, Сыктывкарын выльмӧдасны-мичмӧдасны дас, Воркутаын – дас сизим, Интаын – куим, Ухтаын – дас, Сосногорскын – сизим да Удора районын – куим олан керка ӧшинь ув.
Юркарын сідзжӧ лоӧ дзоньталӧма-выльмӧдӧма Морозов уличаын сквер, Малышев уличаса 13-ӧд номера керка дорын площадка, 1-ӧд номера школа водзын Чернобыльын неминуча бырӧдысьяслы памятник, Эжваын Бумажник проспект пӧлӧн подӧн ветланін, Гӧрд Затон посёлокын сквер да с.в.
Тӧдчымӧн мичаммас чужӧмбаныс и Воркутаын, Вуктылын, Интаын, Усинскын, Ухтаын сквер-изэрдъяслӧн, челядь ворсанінъяслӧн да подӧн ветланінъяслӧн.
Апрель 15 – май 31 лунъясӧ республикаын олысьяс бара на вермасны ӧтуввез пыр гӧлӧсуйтӧмӧн бӧрйыны, кӧні да мый дзоньтавны-выльмӧдны локтан 2024 воын. <>
Гижӧдсӧ дасьтiс Александра АРТЕЕВА.
Снимокъясыс ӧтуввезйысь.