Тӧла либӧ зэрӧ, лымъялӧ либӧ шондіа… Кызвыннас поводдя серти мортыд и олӧ. Та понда метеорологлӧн уджыс зэв тӧдчана.
А буретш талун поводдя туялысьяс, тшӧтш и Евгения Гутченко, пасйӧны ассьыныс профессиональнӧй гаж.
Санкт-Петербургын Россияса государственнӧй гидрометеорология университет помалӧм бӧрын Евгения локтӧма Кӧрткерӧс районса Сюзяыбын «Лунь» метеостанцияӧ, и матӧ 21 во нин радейтана уджыскӧд оз янсӧдчы. Ӧні сійӧ зільӧ юркарын гидрометеорология службаын.
–Война бӧрын менам бабӧй, Антонина Дмитриевна Микушева, томиник нывкаӧн локтӧма Сюзяыбӧ да восьтӧма «Лунь» метеостанциясӧ. Сы вылӧ видзӧдӧмӧн и ми, челядьыс да внук-внучкаыс, бӧрйим тайӧ аслыспӧлӧс уджсӧ да метеорологъяслӧн быдса династия нин миян артмис, – висьталӧ Евгения. – Сьӧлӧмсянь чолӧмала батьӧс, вокӧс, чойӧс, тьӧткаӧс да уджъёртъясӧс Ставмирса метеоролог лунӧн! <>
Екатерина МИКУШЕВА.
Снимокыс Евгения ГУТЧЕНКОЛӦН гортса архивысь.