Веськыда кӧ, дӧзми нин гижны телефон пыр ылӧдчысьяс йылысь, «Коми муын» мӧйму куим кымын гижӧд петаліс. Да и мукӧд газет, телевидение-радио, ӧтуввез быд лун йӧзӧдӧны та йылысь юӧрсӧ, полицияса сотрудникъяс профилактика могысь кытшлалӧны патераяс, подъездъясын ӧшлӧны ӧлӧдана листовкаяс. Но, кыдз шуласны, уналы юр выланыс кӧть майӧг ёсьты.
Кыдзи талун бӧбйӧдлӧны миянӧс да кутшӧм ногӧн видзчысьны? Март 21 лунӧ республикаса юралысьлӧн Общественнӧй приёмнӧйын «веськыд йитӧда» телефон пыр сёрниыс вӧлі буретш та йылысь.
– Мӧйму юӧр да телекоммуникация технологияӧн вӧдитчӧмӧн Сыктывкарын вӧчӧмаӧсь 1.600 мыж (воддза воын – 1.738). Та дырйи йӧзыс «козьналӧмаӧсь» ылӧдчысьяслы 194 миллион шайт. Тавося кык тӧлысьӧн нин телефон да компьютер пыр юркарын олысьясӧс бӧбйӧдлӧмаӧсь 336-ысь. Йӧз зептысь перйӧмаӧсь 57 миллион шайт, – висьталіс Сыктывкарын УМВД-ӧн веськӧдлысь Ильдар ХУСНУТДИНОВ. – Ӧти воштӧ некымын сюрс шайт, мӧд дзик тӧдтӧм мортлы ыстӧ некымын миллион. Та дырйи вуджӧдӧны кодлӧнкӧ тшӧт вылӧ ассьыныс чӧжӧм сьӧмсӧ, та могысь жӧ удждысьӧны рӧдвуж-тӧдсалысь, банкысь босьтӧны ыджыд кредит.
Нинӧм выльсӧ ылӧдчысьяслы оз и ков думыштны. Кызвын йӧзыс ас вӧляысь лэдзӧны асьнысӧ бӧбйӧдлыны. Став колана юӧрсӧ висьталӧны, ас кокнас мунӧны банкӧ, ас кинаныс босьтӧны сьӧмсӧ да сетӧны бокӧвӧй йӧзлы. Водзджыксӧ пӧръявлӧмаӧсь медсясӧ олӧмаясӧс да пӧрысьясӧс. Ӧні лэчкӧ веськалӧ и том да велӧдчӧм.
– Йӧз зептысь сьӧмсӧ перйӧны нёль ногӧн, – пырӧдчис сёрниӧ Сыктывкарын УМВД-лӧн уголовнӧй розыск юкӧнӧн веськӧдлысь Денис СИНЕЛЬНИК.
Ӧти-кӧ, мортыслы юӧртӧны, мый верӧсыс, гӧтырыс, пиыс, нылыс либӧ матысса рӧдвужсьыс нӧшта кодкӧ веськалӧма машинанас туй выв неминучаӧ да кувтӧдзыс кодӧскӧ талялӧма. Панӧны пӧ уголовнӧй делӧ. Но позьӧ на пӧ дорйыны матыссатӧ мыждӧмысь да некымын во кежлӧ дзескыдінӧ пуксьӧдӧмысь. Тырмымӧн пӧ следовательыслы сетны сьӧм.
Дерт, позьӧ звӧнитны гӧтыр-верӧсыдлы, ныв-пиыдлы да тӧдмавны, збыль-ӧ сійӧ веськаліс неминучаас. Но весьӧпӧрӧмаыдлы тайӧ юрас оз во. Сійӧ зэв ӧдйӧ чукӧртӧ индӧм мында сьӧмсӧ да сетӧ кутшӧмкӧ «курьерлы».
Кокньыда талун воштӧны чӧжӧм сьӧмсӧ и мӧд ногӧн.
Звӧнитӧ ныв да мелі гӧлӧсӧн юӧртӧ, мый дӧзмӧдчӧ банкысь, МФЦ-ысь, «Госуслугиысь», полицияысь либӧ прокуратураысь сотрудник. Медым мортыс эскис, та дырйи мессенджерын ыстӧны вайӧдӧм ведомство-организацияыслысь печатя логотип, погоналӧн удостоверенньӧлысь скрин-снимок.
«Банкса уджалысь» шыӧдчӧ морт дорӧ ним-вичнас, ӧлӧдӧ, ӧні пӧ зэв уна быдсикас ылӧдчысьыс да, колӧ видзчысьны. И мӧдыс эскӧ сылы. А «банкын уджалысьыд» водзӧ мудеритӧ, со пӧ тіян тшӧт вылысь кодкӧ кӧсйӧ босьтны сьӧмсӧ. Йита пӧ тіянӧс миян «безопасносьт службакӧд». Сёрниӧ пырӧдчӧ мужичӧй да майшасяна гӧлӧсӧн юӧртӧ, тіян тшӧт вылысь пӧ банкса кутшӧмкӧ сотрудник видлӧма босьтны сьӧм, но абу вермӧма. И вӧзъям пӧ отсавны туявны кузь киасӧ. И со нин «полицияса сотрудник» повзьӧдчӧ, онӧ кӧ пӧ отсалӧй туявны гусясьысьсӧ, асьнытӧ кыскасны уголовнӧй кывкутӧмӧ. Та бӧрын нин «специалист-оператор» шӧпкӧдӧ-висьталӧ, мый быть колӧ восьтыны выль тшӧт, кодӧс некод нин оз вермы «жугӧдны», да кутшӧмкӧ кад кежлӧ вуджӧдлыны сэтчӧ сьӧмтӧ, а кор банк туялас гусясьысьсӧ, позяс бӧр важас ставсӧ вуджӧдны. Мортыд, дерт, татшӧм юӧрсьыд повзьӧ-весьӧпӧрӧ да оз нин гӧгӧрво, мый вӧчӧ. И со нин сылы телефон пыр висьтавлӧны кутшӧмкӧ номер, тшӧт, кытчӧ позьӧ «дзеблыны» сьӧмсӧ. И ачыс тшӧтш юӧртӧ карта номерсӧ, кодсӧ да с.в.
Та дырйи сылы тшӧктӧны включитны телефонсӧ да сюйны зептас либӧ сумкаас. Мыйла тайӧ колӧ ылӧдчысьыслы? Да сы вӧсна, мый мортыс ачыс оз вермы некодлы звӧнитны, и сылӧн телефоныс пыр лоас «занят». Шуам, виччысьтӧг кӧ звӧнитас кодкӧ тӧдса либӧ рӧдвуж пиысь да юалас мыйкӧ, мортыс вермас вочавидзны, мый банкын тшӧт вывсьыс босьтӧ сьӧм. Сэки сійӧс, дерт, ӧлӧдасны таысь, «пальӧдасны», эскӧдасны, мый тайӧ ылӧдчысьяс, и колӧ пыр жӧ шыӧдчыны полицияӧ…
Индӧд сеталысь «операторыс» тшӧтш стрӧжитӧ, медым мортыс эз сёрнит банкса уджалыськӧд, матыстчас кӧ кодкӧ. Вермас пӧ лоны, тайӧ буретш гусясьысьыс и эм. И операция йылысь гуся юӧрсӧ йӧзӧдӧмысь пӧ тіянӧс асьнытӧ вермасны пуксьӧдны дзескыдінӧ.
Колӧ быдӧнлы сюркнявны пель саяс, мый банкса уджалысь некор оз мӧд юасьны, кӧні да кор вӧдитчинныд картанад, оз кор висьтавны номер, пароль да код. Унджык юӧрыс налӧн эм нин. Найӧ и сідз аддзӧны, кытчӧ да кор видзӧма мортыс сьӧмсӧ, либӧ мыйта воӧма тшӧт вылас. И казяласны кӧ мыйкӧ неладнӧ, оз мӧдны звӧнитчыны, а «кынтасны» тшӧтсӧ.
МФЦ-ын зільысьяслӧн эм жӧ став колана юӧрыс, да найӧ оз кутны телефон пыр юасьны. И погона йӧз оз корны тіянӧс отсасьны «гуся операцияын».
Кокньыда позьӧ ылавны и ӧтуввез пыр ньӧбасиг-вузасигӧн. Сэні зэв уна бӧбйӧдлан сайтыс. Со, шуам, кодкӧ кӧсйӧ ньӧбны запчасьт, санаторийӧ путёвка, самолётӧ либӧ поездӧ билет. Телефон пырыс сылы вӧзйӧны вуджны кутшӧмкӧ мессенджерӧ да ыстӧны ӧтуввезйын сідз шусяна фишингӧвӧй ссылка, мӧд ногӧн кӧ, ылӧдчана адрес. Мортыс восьтӧ тайӧ ссылкасӧ да пыртӧ сэтчӧ банкса картасьыс став юӧрсӧ. «Мынтыны» кнопка личкӧм бӧрын чайтӧ, мый вештысис колана услугаысь. Но збыльвылас та бӧрын сылӧн картаӧн вӧдитчӧ нин бокӧвӧй морт. Гӧгӧрвоана, вошас тшӧт вывсьыс став сьӧмыс, а сэсся и тӧвар-услугасӧ вӧзйысьыс, и сайтыс.
Медым тіянӧс эз бӧбйӧдлыны, колӧ зэв сюся видзӧдны домен нимсӧ. Ылӧдчанаыс быттьӧ дзик жӧ сэтшӧм, но сэні эмӧсь содтӧд шыпас, лыдпас да мукӧдтор. Медым сьӧмыд эз вош, ставсӧ колӧ вӧчны «Юла», Avito либӧ мукӧд сідз шусяна оригинальнӧй сайтын. Сэні кӧ тіянӧс ылӧдласны, сьӧмтӧ позьӧ на бергӧдны. Но сэсянь кӧ вуджинныд мессенджерӧ, кутшӧмкӧ тӧдтӧм ссылка вылӧ, сідзкӧ, козьналінныд кутшӧмкӧ дядьӧлы, и некод нин тіянлы оз отсав.
Ылӧдчысьяс бура тӧдӧны, мый унджык йӧзыс оз ӧтдортчыны «кокньыд» нажӧткасьыд. Та вылӧ и «кыйсьӧны».
Бӧръя кадӧ унаӧн воштісны сьӧмсӧ биржаын да инвестиция отсӧгӧн «нажӧвитчигӧн». Мортыслы звӧнитӧны да вӧзйӧны ньӧбны кутшӧмкӧ компаниялысь акция. Либӧ мортыс ачыс ӧтуввезйын веськалӧ наян «брокер-шулер» налькйӧ. Сылы медсясӧ вузалӧны биару, мусир перъян котыръяслысь дона кабала. Сэсся петкӧдлӧны ӧтуввез пыр таблицаяс, графикъяс, кыдзи «донсялӧны» тайӧ акцияясыс. Ньӧбин пӧ вит сюрс шайтысь, а ӧні тшӧт вылад куим пӧв унджык нин. Горш мортыд нӧшта на ыззьӧ да некымын миллион шайт дон «ньӧбӧ» содтӧд акция. Но кор кӧсъяс босьтны «нажӧвитӧмсӧ», вошас и сайтыс, и «брокерыс», и, дерт, став сьӧмыс.
Та вӧсна погона йӧз ӧлӧдӧны, горшасьӧмыд пӧ бурӧ оз вайӧд. Оз ков эскыны, мый компьютерад либӧ телефонад гоз-мӧдысь кнопка личкыштӧмӧн озырман. Сэтшӧма кӧ нин телепит озырмӧдчыны акция да биржа отсӧгӧн, тайӧс позьӧ вӧчны банкын либӧ предприятие-котырыслӧн офисын.
Сыктывкарын УМВД бердын общественнӧй сӧветын водзмӧстчысь, психолог Юлия ПЕРШУКОВА тӧдчӧдӧ, мый ылӧдчысьяс асьныс зэв бур психологъяс. Медсясӧ пӧ найӧ бӧбйӧдлӧны горшасьысьӧс, полысьӧс, мыжаӧс да слабӧс. Ылӧдчана «вугырӧ» вермас пысасьны морт, коді омӧля узьӧ, сы вылӧ кӧ ӧтарӧ личкӧ кутшӧмкӧ стресс. Татшӧмыс оз вермы водзсасьны наян мортлы паныд да ставсӧ вӧчӧ сылӧн индӧд серти.
Юлия Ивановна вӧзйис пыр жӧ кусӧдны телефонтӧ, казяланныд кӧ мыйкӧ неладнӧ, сёрнитысьыс кӧ эз во сьӧлӧм вылад да лоис деливӧ.
Сыкӧд сӧгласӧсь и Ильдар Рустамович да Денис Михайлович.
– Кӧть мед кутшӧм чинаӧн эз висьтась звӧнитчысьыс, эн полӧй дугӧдны сёрнисӧ. Ті кӧ ковманныд погона йӧзлы, найӧ аддзасны тіянӧс, – кывкӧрталіс Ильдар Хуснутдинов.
«Веськыд йитӧда» телефон пыр ӧти мужичӧй юаліс, позьӧ-ӧ кыдзкӧ кутны киӧдыс татшӧм ылӧдчысьсӧ?
– Телефона мошенниктӧ зэв сьӧкыд туявны, – вочавидзис Ильдар Рустамович. – Шӧркодя эрдӧдӧны 10 прӧчент татшӧм мыжсӧ. Ылӧдчысьыс вермас овны Россияса быд пельӧсын. И уна кад воштам, кор шыӧдчам странаса регионъясӧ, медым сэні туялісны да ыстісны миянлы ылӧдчысьыслысь адрессӧ, телефон да банкса тшӧт номерсӧ, кытчӧ вуджӧдалӧма гуӧм сьӧмсӧ. Но та дыранад некутшӧм «кок туй» нин оз коль. Весиг банкомат бӧрся видзӧдысьыс чышкӧ видеокамерасьыс гижӧдсӧ.
Сэсся ӧні эмӧсь телефон номер вежлалан программаяс. Видзӧдан да, звӧнитӧны полициялӧн дежурнӧй часьтсянь либӧ банксянь. А мӧдан туявны да, вӧлӧмкӧ, некод сэсянь абу звӧнитлӧма.
Мӧд-кӧ, сідз шусяна «левӧй», регистрируйттӧм SIM-каяс, банкса картаяс, кытчӧ кӧсйӧны вуджӧдны пӧръясьӧмӧн асалӧм сьӧмсӧ, гижӧны студентъяс, бомжъяс вылӧ, а сідзжӧ донтӧм донысь некымынысь вузалӧны. Помыс оз югды! Позьӧ шуны, весьшӧрӧ корсьысьны, кор асланьыс сюсь йӧз вӧдитчӧны сідз шусяна IP-телефонияӧн. Му шарса быд пельӧссянь позьӧ йитчывны, а ылӧдчӧм бӧрас вошны. Мукӧдысьсӧ туясьӧмыс вайӧдӧ Голландияӧ либӧ Украинаӧ. Гӧгӧрвоана, сэтчӧ миян юалӧм-корӧмным весиг оз мун, непӧштӧ нин виччысьны кутшӧмкӧ вочакыв. <>
Николай РАЗМЫСЛОВ.
Снимокъясыс авторлӧн да ӧтуввезйысь.