Аньяслӧн лун кежлӧ Виктор Савин нима драмтеатр петкӧдліс Владимир Гуркинлӧн пьеса серти «Кадриль». Выль спектакльлӧн режиссёрыс Захар Комлев пасйӧма постановкалысь жанрсӧ потешкиӧн.
Мӧдӧд «Кадриль»
Кыдзи висьталіс театрӧн веськӧдлысь Михаил Матвеев, Владимир Гуркинлӧн «Кадриль» вӧвлӧма нин репертуарын кольӧм нэмся 90-ӧд вояс помын. Спектакльяс вылас пыр вӧлӧма уна йӧза, окотапырысь видзӧдӧмаӧсь кар-районын олысьяс.
Воддза ворсысьясысь ӧні театрын уджалӧ сӧмын Виктор Градов, коді та пӧрйӧ оз ворс. Выльмӧдӧм постановкаын ворсӧны Мария Чукарева, Елена Янкова, Надежда Пешкина, Александр Кузнецов да Анатолий Колмаков.
– Миян театрын Владимир Гуркинлӧн тайӧ мӧдӧд постановка. Нӧшта вӧлі «Саня, Ваня и с ними Римас». Ме тӧдса вӧлі пьесалӧн авторыскӧд (кувсис 2010 воын), сёрнитлім, кор босьтчим дасьтыны сэки спектакльсӧ. Сійӧ вӧлі зэв интеллигентнӧй морт, роч культура видзысь да пыдди пуктысь. 90-ӧд вояс помын – 2000-ӧд вояс заводитчигӧн театрлы вӧлі сьӧкыд да, весиг ассьыс, кыдз авторлысь, гонорарсӧ чинтіс, – бурӧн казьтыліс Владимир Гуркинӧс Михаил Матвеев.
Пьеса сюрӧсыс тӧдса видзӧдысьлы (вӧвлі нин театрын, снимайтлісны кино, кӧні ворсӧны Олег Табаков, Любовь Полищук, Нина Усатова, Валентина Теличкина да Станислав Любшин), но та пӧрйӧ режиссёр Захар Комлев сійӧс дженьдӧдыштӧма, вӧчӧма ӧти актаӧн. И, дерт, аслыспӧлӧсӧн.
«Чӧскыд» шмонь
–Мыйла лои потешки? Да сы вӧсна мый коркӧ Михаил Николаевич матыстчис да шуис, вывті уна пӧ сцена вылын юӧмыс. Да, збыльысь уна, и киноын тшӧтш. Быдӧнлы тӧдса и, мый «Любовь и голубиын» (тайӧ тшӧтш Гуркинлӧн) уна жӧ юӧны. Но кыдзи сійӧс вӧчны, мед не «бырӧдны» авторсӧ? Колӧ вӧлі мӧвпыштны мыйкӧ сэтшӧмтор, мед дзебны юӧмсӧ, но кольны авторсӧ. Заводитім мӧвпавны и художниккӧд (Зураб Мачитадзе, Шахты кар, сыкӧд эм нин ӧтувъя удж – Лермонтов серти «Герой нашего времени»), и балетмейстеркӧд (Ангелина Комлева), и пластика кузя режиссёркӧд (Андрей Запускалов, сійӧ коркӧ вӧвлі «Лицедеи» театрын ворсысь).
И артмис эз, кыдз шуласны, бытӧвӧй теш, а мыйкӧ «чӧскыдджык». Шуны постановкасӧ тешӧн – оз лӧсяв, думайтім, гашкӧ, мися, фольклор теш – оз жӧ. Сэсся сюри потешки кыв. Потеха, потешки, сідзкӧ, шмонь. Водзті Русьын став аканьсӧ шулӧмаӧсь потешкаӧн и. Сысянь и йӧткыштчим сэсся да лӧсьӧдім спектакльсӧ. Декорацияясыс, артистъяслӧн вӧрасногыс ставсӧ тайӧс бура петкӧдлӧ, – висьталіс Захар Комлев.
Артистъяскӧд уджалӧма пластика кузя режиссёр Андрей Запускалов. Кыдзи висьталіс Ангелина Комлева, сійӧ пӧ уна выль вӧрасног петкӧдліс. И артистъяс кӧнсюрӧ аканьяс кодьӧсь и эм.
Художник вӧчӧма роч керка вежӧс, кӧні некымын ин. Тані быттьӧ и керка, и ӧшинь ув, и улича.
Спектакльсӧ петкӧдлӧны театрса ичӧт залын. Кыдзи пасйис режиссёр, тайӧ аслыспӧлӧс ин, и ворсанног, сы вӧсна мый ворсысьыс зэв матын видзӧдысь дорас.
– А позяс тайӧ постановкасӧ петкӧдны ыджыд сцена вылӧ? – юалі спектакль дасьтысьяслысь.
– Видзӧдысьыс кӧ лоӧ уна – да, – вочавидзис Михаил Матвеев. – Декорациясӧ вӧчӧма сідз, мед тайӧ спектакльсӧ нулыны и сиктса клубӧ, кӧні ичӧтджык сценаыс миян дорысь.
– Улич вылын весиг позьӧ ворсны. Та кузя некутшӧм падмӧг оз ло, сы вӧсна мый декорацияясыс универсальнӧйӧсь, – содтіс Зураб Мачитадзе.
Сьӧлӧм дойысь лекарство
«Кадрильын» сюрӧс серти петкӧдчӧны абу нин ёна том кык гозъя, Звягинцевъяс да Арефьевъяс. Найӧ олӧны зыксьӧмӧн. И гӧтыръясыс мӧвпыштӧны вежсьыны верӧсъяснас. Тадзи и заводитчӧ «кадриль». Гозъяяслӧн олӧмӧ сюйсьӧ и ӧтка олӧма ань Макеевна, коді гусьӧн новлӧ Звягинцевъяслӧн керка йӧрысь кирпич…
– Уджыс вӧлі интереснӧй, – висьталӧ артист Александр Кузнецов. – Захаркӧд, кыдз режиссёркӧд, тайӧ менам медводдза удж. Водзті кыкнанным сӧмын ворслім.
Сиктса теш – торъя нин меным воӧ сьӧлӧм вылӧ. Тыдалӧ, ачым сиктса морт да, сійӧн. Ичӧт сцена вылын ворсны зэв кывкутана, сы вӧсна мый видзӧдысь дорын матын. И мыйкӧ кӧ абу сідз, пыр и казялас. Чайта, тайӧ постановкаыс лоӧ интереснӧ и томъяслы, и верстьӧлы, и олӧмалы.
Мария Чукарева, коді ворсӧ Макеевнаӧс, тшӧтш шуӧ, мый сылы зэв любӧ петкӧдчыны «Кадрильын».
– Важӧн нин эг ворслы татшӧм серамбана роч спектакльын. «Кадриль» киноыс – бытӧвӧй теш, а миян режиссёр вӧчис потешки, нӧшта на интереснӧйджык удж. Ми и сералам, и сьылам, и йӧктам, и бӧрдам, и йӧйталам. Рольыс меным кажитчӧ. Ставыс кокниа мунӧ.
– Збыль олӧмын вермас татшӧмыс лоны? Гозъя вежсясны верӧсъясӧн. И ті эськӧ вежсинныд энӧ? – юася Мария Андреевналысь.
– Сиктын вермас нӧшта на чуймӧданаджыктор лоны. Пӧсьвывсьыд шуан, вӧчан, а сэсся вӧлисти нин думыштан. Ме эськӧ верми, вирӧй кӧ пузис…
Йӧктӧмыс тані эм жӧ. Мария Чукарева томдырйиыс удораса кадриль на йӧктылӧма.
– Ме думайті первойсӧ, мый лоӧ сӧмын ворсӧм. Но ковмис унатор вӧрасногӧн петкӧдлыны. Сідз и тадз читкылясям. Зэв кажитчис уджавны Ангелина да Захар Комлевъяскӧд. Найӧ енбиа гозъя. Спектакльыс видзӧдсьӧ кокньыда. Да и видзӧдысьыс виччысьӧ нин ӧнія сьӧкыд кадӧ татшӧм кокньыд руа спектакльсӧ. Мед ловсӧ личӧдны. Збыль тайӧ лоӧ сэтшӧм, позьӧ кӧ тадзи шуны, сьӧлӧм дой личӧдан лекарствоӧн. Да, дерт, и аньяслы козинӧн, – висьталіс Мария Чукарева.
Джуджыд мӧвп
– Ме чайта, мый медшӧр мӧвпыс абу верӧсӧн вежласьӧм. Тайӧ, дерт, петкӧдлӧ серамсӧ. Но колӧ пыдӧджык видзӧдны. Мукӧддырйиыс ассьыд он донъяв, чайтан, кодлӧнкӧ бурджык. Абу сідз. Збыль, колӧ мӧвпыштны аньяслы. Рочасьыштны кӧ, от добра добра не ищут. Тадзи и постановкаас тыдовтчӧ, мый аслад кӧть кутшӧм, но тайӧ тэнад пӧлыд. Сэсся сэтшӧма йӧктӧмъяс велӧдім, мый весиг узигӧн вӧлі паляла ки-кок вӧрӧмысь, – казьтыліс спектакль кежлӧ дасьтысьӧмсӧ Надежда Пешкина.
Захар Комлев пасйис жӧ, мый збыльвылас тані джуджыд мӧвп. Гозъя быдтӧны челядьӧс, и кор найӧ эновтӧны бать-мам керкасӧ, кольӧны ӧткӧн. А сідзкӧ, вежсьӧ оласногыс, оз тӧдны, мый йылысь сёрнитны, мый вӧчны ӧтув, и абу быд гозъя дась выль ног ладмӧдчыны. Тайӧ зэв на философскӧй пьеса.
Пластика боксянь тшӧтш петкӧдлӧма нывбаба да мужичӧй костын олӧмсӧ. Та вылын ковмис уджавны. И «Кадрильтӧг» тані некыдз.
* * *
Пасъям, коді эз вермы видзӧдны «Кадрильсӧ» март 7 лунӧ, матысса кадӧ спектакльыс лоӧ март 19 лунӧ. <>
Екатерина МАКАРОВА.
Снимокъясыс Анна БУДИНАЛӦН.